Matayo 17 - Bibiliya Yera

Yesu ahinduka ishusho irabagirana

¹ Iminsi itandatu ishize, Yesu ajyana Petero na Yakobo na Yohana mwene se, bajyana mu mpinga y'umusozi muremure bonyine.

² Ahindurirwa imbere yabo, mu maso he harabagirana nk'izuba, imyenda ye yera nk'umucyo.

³ Maze Mose na Eliya barababonekera bavugana na we.

⁴ Petero abwira Yesu ati “Mwami, ni byiza ubwo turi hano. Nushaka ndaca ingando eshatu hano, imwe yawe, indi ya Mose, indi ya Eliya.”

⁵ Akibivuga igicu kirabakingiriza, ijwi rikivugiramo riti “Nguyu Umwana wanjye nkunda nkamwishimira, mumwumvire.”

⁶ Abigishwa babyumvise bikubita hasi bubamye, baratinya cyane.

⁷ Yesu arabegera abakoraho arababwira ati “Nimuhaguruke mwitinya.”

⁸ Bubura amaso ntibagira undi babona, keretse Yesu wenyine.

⁹ Bakimanuka umusozi, Yesu arabihanangiriza ati “Ntihagire umuntu mubwira ibyo mweretswe, kugeza aho Umwana w'umuntu azazukira.”

¹⁰ Abigishwa be baramubaza bati “Ni iki gituma abanditsi bavuga bati ‘Eliya akwiriye kubanza kuza’?”

¹¹ Arabasubiza ati “Ni ukuri ko Eliya akwiriye kubanza kuza, akagarura byose akabitunganya.

¹² Ariko ndababwira yuko Eliya yaje ntibamumenya, ahubwo bamugira uko bashaka. N'Umwana w'umuntu ni ko bazamugira.”

¹³ Nuko abigishwa bamenya yuko ababwiye ibya Yohana Umubatiza.

Yesu akiza umwana urwaye igicuri

¹⁴ Bageze mu bantu, umuntu araza aramwegera, aramupfukamira aramubwira ati

¹⁵ “Mwami, babarira umuhungu wanjye kuko arwaye igicuri, kiramubabaza cyane kuko kenshi cyane kimutura mu muriro no mu mazi.

¹⁶ Namuzaniye abigishwa bawe ntibabasha kumukiza.”

¹⁷ Yesu aramusubiza ati “Yemwe bantu b'iki gihe biyobagiza batizera, nzageza he kubana namwe? Nzabihanganira kugeza ryari? Nimumunzanire hano.”

¹⁸ Yesu aramucyaha, dayimoni amuvamo, umuhungu aherako arakira.

¹⁹ Maze abigishwa begera Yesu biherereye bati “Ni iki cyatumye twebwe bitunanira kumwirukana?”

²⁰ Arabasubiza ati “Ni ukwizera kwanyu guke: ndababwira ukuri yuko mwaba mufite kwizera kungana n'akabuto ka sinapi, mwabwira uyu musozi muti ‘Va hano ujye hirya’ wahava, kandi ntakizabananira. [

²¹ Ariko bene uwo ntavanwamo n'ikindi keretse gusenga no kwiyiriza ubusa.]”

Yesu avuga iby'urupfu rwe

²² Bakigenda i Galilaya, Yesu arababwira ati “Umwana w'umuntu arenda kuzagambanirwa afatwe n'abantu,

²³ bazamwica maze ku munsi wa gatatu azurwe.” Barababara cyane.

²⁴ Bagera i Kaperinawumu, abantu basoresha umusoro w'ididarakama baza aho Petero ari baramubaza bati “Mbese umwigisha wanyu ntatanga ididarakama?”

²⁵ Arabasubiza ati “Arayitanga.” Yinjiye mu nzu, Yesu aramutanguranwa aramubaza ati “Utekereza ute, Simoni? Abami bo mu isi abo baka umusoro n'ihoro ni abahe? Ni abana babo cyangwa ni rubanda?”

²⁶ Aramusubiza ati “Ni rubanda.” Yesu aramubwira ati “Nuko rero abana bo bibereye mu mudendezo.

²⁷ Ariko kugira ngo tutababera igisitaza, jya ku nyanja ujugunyemo ururobo, ifi uri bubanze gufata uyende, uyasamure urasangamo sitateri, uyijyane uyibahe ku bwanjye no ku bwawe.”