Matayo 15 - Bibiliya Yera

Yesu ahinyura imyigishirize y'Abafarisayo

¹ Nuko Abafarisayo n'abanditsi bavuye i Yerusalemu baza aho Yesu ari baramubaza bati

² “Ni iki gituma abigishwa bawe bataziririza imigenzo y'abakera, ntibajabike intoki mu mazi bagiye kurya?”

³ Na we arababaza ati “Namwe ni iki gituma mucumurira itegeko ry'Imana imigenzo yanyu?

⁴ Kuko Imana yavuze iti ‘Wubahe so na nyoko’, kandi iti ‘Ututse se cyangwa nyina bamwice.’

⁵ Ariko mwebweho muravuga muti ‘Umuntu wese ubwira se cyangwa nyina ati: Icyo najyaga kugufashisha nagituye Imana,umeze atyo ntahatwa kubaha se cyangwa nyina.’

⁶ Nuko ijambo ry'Imana mwarihinduye ubusa ngo mukomeze imigenzo yanyu.

⁷ Mwa ndyarya mwe, Yesaya yahanuye ibyanyu neza ati

⁸ ‘Ubu bwoko bunshimisha iminwa, Ariko imitima yabo imba kure.

⁹ Bansengera ubusa, Kuko inyigisho bigisha ari amategeko y'abantu.’ ”

¹⁰ Ahamagara abantu arababwira ati “Nimwumve musobanukirwe.

¹¹ Ikijya mu kanwa si cyo gihumanya umuntu, ahubwo ikiva mu kanwa ni cyo kimuhumanya.”

¹² Maze abigishwa baramwegera baramubaza bati “Uzi yuko Abafarisayo barakajwe no kumva ayo magambo?”

¹³ Arabasubiza ati “Igiti cyose Data wo mu ijuru adateye kizarandurwa.

¹⁴ Nimubareke ni abarandata impumyi kandi na bo bahumye. Ariko impumyi iyo irandase indi zombi zigwa mu mwobo.”

¹⁵ Petero aramusubiza ati “Dusobanurire uwo mugani.”

¹⁶ Aramubaza ati “Mbese namwe ntimurajijuka?

¹⁷ Ntimuzi yuko ikintu cyose kigiye mu kanwa kijya mu nda kikanyura mu nzira yacyo?

¹⁸ Ariko ibiva mu kanwa biba bivuye mu mutima, ni byo bihumanya umuntu.

¹⁹ Kuko mu mutima w'umuntu ari ho haturuka ibitekerezo bibi: kwica no gusambana no guheheta, kwiba no kubeshyera abandi n'ibitutsi.

²⁰ Ibyo ni byo bihumanya umuntu, ariko kurisha intoki zitajabitse mu mazi ntiguhumanya umuntu.”

Yesu akiza umukobwa w'Umunyakanānikazi

²¹ Yesu arahava ajya mu gihugu cy'i Tiro n'i Sidoni.

²² Umunyakanānikazi aturuka muri icyo gihugu arataka cyane ati “Mwami mwene Dawidi, mbabarira, umukobwa wanjye atewe na dayimoni cyane.”

²³ Ntiyagira icyo amusubiza. Nuko abigishwa be baramwegera baramwinginga bati “Musezerere kuko adutakira inyuma.”

²⁴ Arabasubiza ati “Sinatumiwe abandi, keretse intama zazimiye zo mu muryango wa Isirayeli.”

²⁵ Na we araza aramupfukamira aramubwira ati “Mwami, ntabara.”

²⁶ Aramusubiza ati “Si byiza kwenda ibyokurya by'abana ngo mbijugunyire imbwa.”

²⁷ Na we ati “Ni koko Mwami, ariko imbwa na zo zirya ubuvungukira bugwa buvuye ku meza ya ba nyirazo.”

²⁸ Maze Yesu aramusubiza ati “Mugore, kwizera kwawe ni kwinshi, bikubere uko ushaka.” Umukobwa we aherako arakira.

Yesu akiza abarwayi, ahaza abantu ibihumbi bine

²⁹ Yesu avayo ajya ku Nyanja y'i Galilaya, azamuka umusozi aricara.

³⁰ Abantu benshi baza aho ari, bazana abacumbagira n'ibirema, n'impumyi n'ibiragi n'abandi barwayi benshi, babarambika hasi imbere ye arabakiza,

³¹ bituma abantu batangara babonye ibiragi bivuga, ibirema ari bizima, abacumbagira bagenda, n'impumyi zireba, bahimbaza Imana y'Abisirayeli.

³² Yesu ahamagara abigishwa be arababwira ati “Mbabariye abo bantu kuko uyu munsi ari uwa gatatu turi kumwe, none ntibafite ibyokurya. Sinshaka kubasezerera batariye, isari itabatsinda ku nzira.”

³³ Abigishwa baramubaza bati “Muri ubu butayu twakura he imitsima ingana ityo yo guhaza abantu bangana batya?”

³⁴ Yesu na we arababaza ati “Mufite imitsima ingahe?” Baramusubiza bati “Ni irindwi n'udufi duke.”

³⁵ Ategeka abantu ko bicara hasi.

³⁶ Yenda iyo mitsima irindwi n'udufi, arabishimira, arabimanyagura, abiha abigishwa be, na bo babiha abantu.

³⁷ Bose bararya barahaga, bateranya ubuvungukira busigaye, bwuzura ibitebo birindwi.

³⁸ Abariye bari abagabo ibihumbi bine, abagore n'abana batabariwemo.

³⁹ Asezerera abantu, yikira mu bwato ajya mu gihugu cy'i Magadani.