Matayo 14 - Bibiliya Yera

Uko Herode yishe Yohana Umubatiza

¹ Icyo gihe Umwami Herode yumvise inkuru ya Yesu,

² abwira abagaragu be ati “Uwo ni Yohana Umubatiza wazutse, ni cyo gituma akora ibitangaza.”

³ Kuko Herode yari yarafashe Yohana akamuboha, akamushyira mu nzu y'imbohe ku bwa Herodiya wari muka mwene se Filipo,

⁴ kuko Yohana yari yabwiye Herode ati “Amategeko ntiyemera ko umucyura.”

⁵ Yifuzaga kumwica ariko atinya abantu, kuko bemeraga ko ari umuhanuzi.

⁶ Umunsi wo kwibuka kuvuka kwa Herode usohoye, umukobwa wa Herodiya abyinira imbere y'abararitswe, ashimisha Herode.

⁷ Ni cyo cyatumye asezerana arahira ko amuha icyo amusaba cyose.

⁸ Na we amaze koshywa na nyina aramubwira ati “Mpa igihanga cya Yohana Umubatiza ku mbehe.”

⁹ Umwami arababara, ariko ategeka ko bakimuha ku bw'indahiro yarahiriye imbere y'abasangiraga na we,

¹⁰ atuma mu nzu y'imbohe ngo bace igihanga cya Yohana.

¹¹ Bazana igihanga cye ku mbehe bagiha umukobwa, agishyīra nyina.

¹² Abigishwa be barazabajyana umurambo, barawuhamba maze bajya kubibwira Yesu.

Yesu ahaza abantu ibihumbi bitanu

¹³ Yesu abyumvise arahava, agenda mu bwato ajya aho abantu bataba kwiherera. Abantu benshi babyumvise bava mu midugudu baramukurikira, baca iy'ubutaka.

¹⁴ Yomotse abona abantu benshi arabababarira, abakiriza abarwayi.

¹⁵ Umunsi ukuze, abigishwa be baramwegera bati “Aha ngaha ntihagira abantu none umunsi urakuze, sezerera abantu bajye mu birorero bīhahire ibyokurya.”

¹⁶ Yesu arabasubiza ati “Ntakibajyanayo, mube ari mwe mubagaburira.”

¹⁷ Baramusubiza bati “Nta cyo dufite hano, keretse imitsima itanu n'ifi ebyiri.”

¹⁸ Arababwira ati “Nimubinzanire hano.”

¹⁹ Ategeka abantu ko bicara mu byatsi, yenda iyo mitsima itanu n'izo fi ebyiri, arararama areba mu ijuru arabishimira, amanyagura iyo mitsima ayiha abigishwa be, abigishwa bayiha abantu.

²⁰ Bararya bose barahāga, bateranya ubuvungukira bw'imitsima busigaye, bwuzura intonga cumi n'ebyiri.

²¹ Abariye bari nk'ibihumbi bitanu, abagore n'abana batabariwemo.

Yesu agendesha amaguru hejuru y'amazi

²² Uwo mwanya ahata abigishwa be ngo bikire mu bwato babanze hakurya, amare gusezerera abantu.

²³ Amaze kubasezerera aragenda, azamuka umusozi wenyine ajya gusenga. Bwari bugorobye, ari yo wenyine.

²⁴ Ariko ubwato bugeze imuhengeri buteraganwa n'umuraba, kuko umuyaga ubaturutse imbere.

²⁵ Nuko mu nkoko aza aho bari agendesha amaguru hejuru y'inyanja.

²⁶ Ariko abigishwa bamubonye agendesha amaguru hejuru y'inyanja bahagarika imitima, batakishwa n'ubwoba bati “Ni umuzimu.”

²⁷ Ariko uwo mwanya Yesu avugana na bo ati “Nimuhumure ni jyewe, mwitinya.”

²⁸ Petero aramusubiza ati “Mwami niba ari wowe, untegeke nze aho uri ngendesha amaguru hejuru y'amazi.”

²⁹ Aramusubiza ati “Ngwino.” Petero ava mu bwato, agendesha amaguru hejuru y'amazi ngo asange Yesu.

³⁰ Ariko abonye umuyaga ko ari mwinshi aratinya, atangiye kurengerwa arataka ati “Databuja nkiza.”

³¹ Uwo mwanya Yesu arambura ukuboko kwe aramufata, aramubwira ati “Yewe ufite kwizera guke we, ni iki gitumye ushidikanya?”

³² Baratambuka bajya mu bwato, umuyaga uratuza.

³³ Abari mu bwato baramupfukamira, baramubwira bati “Ni ukuri uri Umwana w'Imana.”

³⁴ Nuko bamaze gufata hakurya, bagera imusozi mu gihugu cy'i Genesareti.

³⁵ Ab'aho baramumenya, batuma muri icyo gihugu cyose bamuzanira abarwayi bose,

³⁶ baramwinginga ngo bakore ku nshunda z'umwenda we gusa, abazikozeho bose barakira.