Matayo 13 - Bibiliya Yera

Umugani w'umubibyi

¹ Uwo munsi Yesu asohoka mu nzu, yicara mu kibaya cy'inyanja.

² Abantu benshi bateranira aho ari, bituma yikira mu bwato yicaramo, abantu bose bahagarara mu kibaya.

³ Abigisha byinshi, abacira imigani aravuga ati “Umubibyi yasohoye imbuto.

⁴ Akibiba zimwe zigwa mu nzira, inyoni ziraza zirazitoragura.

⁵ Izindi zigwa ku kāra kadafite ubutaka bwinshi, uwo mwanya ziramera kuko ubutaka atari burebure,

⁶ izuba rivuye ziraraba, maze kuko zitari zifite imizi ziruma.

⁷ Izindi zigwa mu mahwa, amahwa arāruka araziniga.

⁸ Izindi zigwa mu butaka bwiza zera imbuto, imwe ijana, indi mirongo itandatu, indi mirongo itatu, bityo bityo.

⁹ Ufite amatwi niyumve.”

¹⁰ Abigishwa baramwegera baramubaza bati “Ni iki gituma ubigishiriza mu migani?”

¹¹ Arabasubiza ati “Mwebweho mwahawe kumenya ubwiru bw'ubwami bwo mu ijuru ariko bo ntibabihawe,

¹² kuko ufite wese azahabwa kandi akarushirizwaho, ariko udafite wese azakwa n'icyo yari afite.

¹³ Igituma mbigishiriza mu migani ni iki: ‘Ni uko iyo barebye batitegereza, n'iyo bumvise batumva kandi ntibasobanukirwe.’

¹⁴ Ndetse ibyo Yesaya yahanuye bibasohoyeho ngo ‘Kumva muzumva, ariko ntimuzabisobanukirwa, Kureba muzareba, ariko ntimuzabibona.

¹⁵ Kuko umutima w'ubu bwoko ufite ibinure, Amatwi yabo akaba ari ibihurihuri, Amaso yabo bakayahumiriza, Ngo batarebesha amaso, Batumvisha amatwi, Batamenyesha umutima, Bagahindukira ngo mbakize.’

Yesu asobanura umugani w'umubibyi

¹⁶ “Ariko amaso yanyu arahirwa kuko abona, n'amatwi yanyu kuko yumva.

¹⁷ Ndababwira ukuri, yuko abahanuzi benshi n'abakiranutsi bifuzaga kureba ibyo mureba ntibabibone, no kumva ibyo mwumva ntibabyumve.

¹⁸ “Nuko nimwumve umugani w'umubibyi.

¹⁹ Uwumva wese ijambo ry'ubwami ntarimenye, Umubi araza agasahura ikibibwe mu mutima we. Uwo ni we usa n'izibibwe mu nzira.

²⁰ Kandi usa n'izibibwe ku kāra, uwo ni we wumva ijambo, uwo mwanya akaryemera anezerewe,

²¹ ntagire imizi muri we, maze agakomera umwanya muto. Iyo habayeho amakuba cyangwa kurenganywa azira iryo jambo, uwo mwanya biramugusha.

²² Kandi usa n'izibibwe mu mahwa, uwo ni we wumva ijambo, maze amaganya y'iyi si n'ibihendo by'ubutunzi bikaniga iryo jambo ntiryere.

²³ Kandi usa n'izibibwe mu butaka bwiza, uwo ni we wumva ijambo akarimenya, akera imbuto umwe ijana, undi mirongo itandatu, undi mirongo itatu.”

Umugani w'urukungu mu masaka

²⁴ Nuko abacira undi mugani aravuga ati “Ubwami bwo mu ijuru bugereranywa n'umuntu wabibye imbuto nziza mu murima we,

²⁵ nuko abantu basinziriye, umwanzi araza abiba urukungu mu masaka, aragenda.

²⁶ Nuko amaze kumera no kwera, urukungu na rwo ruraboneka.

²⁷ Abagaragu be baraza babaza umutware bati ‘Mutware, ntiwabibye imbuto nziza mu murima wawe? None urukungu rurimo rwavuye he?’

²⁸ Ati ‘Umwanzi ni we wagize atyo.’ Abagaragu be baramubaza bati ‘Noneho urashaka ko tugenda tukarurandura?’

²⁹ Na we ati ‘Oya, ahari nimurandura urukungu murarurandurana n'amasaka,

³⁰ mureke bikurane byombi bigeze igihe cyo gusarurwa. Mu isarura nzabwira abasaruzi nti: Mubanze muteranye urukungu muruhambire imitwaro rutwikwe, maze amasaka muyahunike mu kigega cyanjye.’ ”

Umugani w'akabuto ka sinapi n'uw'umusemburo

³¹ Abacira undi mugani ati “Ubwami bwo mu ijuru bugereranywa n'akabuto ka sinapi, umuntu yenze akakabiba mu murima we.

³² Na ko ni gato hanyuma y'imbuto zose, nyamara iyo gakuze kaba kanini kakaruta imboga zose kakaba igiti, maze inyoni zo mu kirere zikaza zikarika ibyari mu mashami yacyo.”

³³ Abacira undi mugani ati “Ubwami bwo mu ijuru bugereranywa n'umusemburo umugore yenze, akawuhisha mu myariko itatu y'ifu kugeza aho iri busemburwe yose.”

³⁴ Ayo magambo yose Yesu ayigisha abantu mu migani, kandi nta cyo yabigishaga atabaciriye umugani,

³⁵ kugira ngo ibyavuzwe n'umuhanuzi bisohore ngo “Nzabumbura akanwa kanjye nce imigani, Nzavuga amagambo yahishwe uhereye ku kuremwa kw'isi.”

³⁶ Maze asezera ku bantu yinjira mu nzu, abigishwa be baramwegera bati “Dusobanurire umugani w'urukungu rwo mu murima.”

³⁷ Arabasubiza ati “Ubiba imbuto nziza ni Umwana w'umuntu,

³⁸ umurima ni isi, imbuto nziza ni zo bana b'ubwami, urukungu ni abana b'Umubi,

³⁹ umwanzi warubibye ni Umwanzi, isarura ni imperuka y'isi, abasaruzi ni abamarayika.

⁴⁰ Nk'uko urukungu rurandurwa rugatwikwa, ni ko bizaba ku mperuka y'isi.

⁴¹ Umwana w'umuntu azatuma abamarayika be, bateranye ibintu bigusha byose n'inkozi z'ibibi babikure mu bwami bwe,

⁴² babajugunye mu itanura ry'umuriro. Ni ho bazaririra bakahahekenyera amenyo.

⁴³ Icyo gihe abakiranutsi bazarabagirana nk'izuba mu bwami bwa Se. Ufite amatwi niyumve.

Umugani w'izahabu n'imaragarita n'urushundura

⁴⁴ “Ubwami bwo mu ijuru bugereranywa n'izahabu zahishwe mu murima, umuntu azigwaho arazitwikīra aragenda, umunezero umutera kugura ibyo yari atunze byose ngo abone kugura uwo murima.

⁴⁵ “Kandi ubwami bwo mu ijuru bugereranywa n'umutunzi ushaka imaragarita nziza,

⁴⁶ abonye imaragarita imwe y'igiciro cyinshi, aragenda agura ibyo yari atunze byose ngo abone kuyigura.

⁴⁷ “Nuko kandi ubwami bwo mu ijuru bugereranywa n'urushundura bajugunya mu nyanja, ruroba ifi z'amoko yose.

⁴⁸ Iyo rwuzuye barukururira ku nkombe, bakicara bagatoranyamo inziza bakazishyira mu mbehe, imbi bakazita.

⁴⁹ Uko ni ko bizaba ku mperuka y'isi: abamarayika bazasohoka batoranye abanyabyaha mu bakiranutsi,

⁵⁰ babajugunye mu itanura ry'umuriro, ni ho bazaririra bakahahekenyera amenyo.

⁵¹ “Ayo magambo yose aho murayumvise?” Baramusubiza bati “Yee.”

⁵² Arababwira ati “Ni cyo gitumye umwanditsi wese wigishijwe iby'ubwami bwo mu ijuru agereranywa na nyir'urugo utanga ibintu bishya n'ibya kera, abikuye mu bubiko bwe.”

Yesu asuzugurwa n'abo mu gihugu cy'iwabo

⁵³ Yesu amaze kubacira iyo migani, avayo

⁵⁴ ajya mu gihugu cy'iwabo, aheraho yigishiriza mu masinagogi yabo, bituma batangara bati “Ubu bwenge n'ibi bitangaza uyu yabikuye he?

⁵⁵ Mbese harya si we wa mwana w'umubaji? Nyina ntiyitwa Mariya, na bene se si Yakobo na Yosefu na Simoni na Yuda?

⁵⁶ Bashiki be na bo bose ntiduturanye? Mbese ibyo byose yabikuye he?”

⁵⁷ Ibye birabagusha. Yesu arababwira ati “Umuhanuzi ntabura icyubahiro, keretse mu gihugu cy'iwabo no mu nzu yabo.”

⁵⁸ Aho Yesu ntiyakorerayo ibitangaza byinshi abitewe n'uko batamwizeye.