Mariko 16 - Bibiliya Yera

Kuzuka kwa Yesu

¹ Isabato ishize, Mariya Magadalena na Mariya nyina wa Yakobo na Salome, bagura ibihumura neza ngo bajye kubimusīga.

² Nuko mu museke ku wa mbere w'iminsi irindwi baragenda, bagera ku gituro izuba rirashe.

³ Barabazanya bati “Ni nde uri butubirindurire cya gitare kiri ku munwa w'igituro?”

⁴ Ariko bararamye babona igitare kibirunduriwe hirya, nubwo cyari kinini cyane.

⁵ Binjiye mu gituro babona umusore wicaye mu ruhande rw'iburyo wambaye umwenda wera, baratangara cyane.

⁶ Arababwira ati “Mwitangara. Nzi yuko mushaka Yesu w'i Nazareti wabambwe, ariko yazutse ntari hano, dore aho bari baramushyize.

⁷ Nimugende mubwire abigishwa be na Petero muti ‘Arababanziriza kujya i Galilaya, iyo ni ho muzamubonera nk'uko yababwiye.’ ”

⁸ Bava mu gituro batangara bahinda umushyitsi, nuko barahunga. Ariko ntibagira umuntu babibwira, kuko bari batinye. [

Yesu abonekera abigishwa be

⁹ Nuko amaze kuzuka mu museke ku wa mbere w'iminsi irindwi, abanza kubonekera Mariya Magadalena, uwo yirukanyemo abadayimoni barindwi.

¹⁰ Uwo aragenda abibwira ababanaga na we, asanga baganya barira bari mu majune.

¹¹ Na bo bumvise yuko ari muzima abonywe na we, ntibabyemera.

¹² Hanyuma y'ibyo Yesu abonekera babiri muri bo afite indi shusho, bagenda bajya imusozi.

¹³ Na bo basubirayo babibwira ba bandi, nyamara ntibabemerera na bo.

¹⁴ Ubwa nyuma abonekera abigishwa be cumi n'umwe bicaye bafungura, abagaya ku bwo kutizera kwabo no kunangirwa kw'imitima kwabo, kuko batemereye abamubonye amaze kuzuka.

¹⁵ Arababwira ati “Mujye mu bihugu byose, mwigishe abaremwe bose ubutumwa bwiza.

¹⁶ Uwizera akabatizwa azakizwa, ariko utizera azacirwaho iteka.

¹⁷ Kandi ibimenyetso bizagumana n'abizera ngibi: bazirukana abadayimoni mu izina ryanjye, bazavuga indimi nshya,

¹⁸ bazafata inzoka, kandi nibanywa ikintu cyica nta cyo kizabatwara na hato, bazarambika ibiganza ku barwayi bakire.”

¹⁹ Nuko Umwami Yesu amaze kuvugana na bo, ajyanwa mu ijuru yicara iburyo bw'Imana.

²⁰ Abo barasohoka bigisha hose, Umwami Yesu ari kumwe na bo abafasha, akomeresha ijambo rye ibimenyetso byagendanaga na ryo.]