Mariko 15 - Bibiliya Yera

Bashyira Yesu Pilato

¹ Umuseke utambitse, uwo mwanya abatambyi bakuru n'abakuru n'abanditsi, n'abanyarukiko bose bajya inama baboha Yesu, baramujyana bamushyira Pilato.

² Pilato aramubaza ati “Ni wowe mwami w'Abayuda?” Na we aramusubiza ati “Wakabimenye.”

³ Maze abatambyi bakuru bamurega byinshi.

⁴ Pilato yongera kumubaza ati “Mbese nta cyo wireguza ko bakureze byinshi?”

⁵ Ariko Yesu ntiyagira ikindi amusubiza, bituma Pilato atangara.

Pilato acira Yesu urubanza rwo kubambwa

⁶ Nuko muri iyo minsi mikuru, uko umwaka utashye yari yaramenyereye kubohorera abantu imbohe imwe, iyo babaga bamusabye.

⁷ Nuko muri icyo gihe hariho uwitwaga Baraba wabohanywe n'abari bagomye, bishe abantu muri ubwo bugome.

⁸ Abantu barazamuka, batangira gusaba ko abagirira nk'uko yamenyereye.

⁹ Pilato arababaza ati “Murashaka ko mbabohorera umwami w'Abayuda?”

¹⁰ Kuko yamenye yuko ishyari ari ryo ryatumye abatambyi bakuru bamutanga.

¹¹ Maze abatambyi bakuru boshya rubanda bati “Ahubwo Baraba abe ari we ababohorera.”

¹² Pilato yongera kubabaza ati “Ndamugira nte uwo mwita umwami w'Abayuda?”

¹³ Maze bongera gusakuza bati “Mubambe.”

¹⁴ Pilato arababaza ati “Kuki? Yakoze cyaha ki?” Maze barushaho gusakuza cyane bati “Mubambe.”

¹⁵ Nuko Pilato ashatse gushimisha abantu ababohorera Baraba, amaze gukubita Yesu imikoba aramutanga ngo abambwe.

¹⁶ Maze abasirikare bamujyana imbere mu rugo rw'urukiko, bahamagara ingabo zose ziraterana.

¹⁷ Bamwambika umwenda w'umuhengeri, baboha ikamba ry'amahwa bararimwambika,

¹⁸ baherako batangira kumuramutsa bati “Ni amahoro, mwami w'Abayuda!”

¹⁹ Bamukubita urubingo mu mutwe, bamucira amacandwe, barapfukama baramuramya.

²⁰ Bamaze kumushinyagurira bamwambura wa mwenda w'umuhengeri, bamwambika imyenda ye baramusohokana, bamujyana kumubamba.

Yesu abambwa

²¹ Batangīra umugenzi waturukaga imusozi witwaga Simoni w'Umunyakurene, ari we se wa Alekizanderi na Rufo, baramuhata ngo yikorere umusaraba wa Yesu.

²² Bamujyana ahitwa i Gologota, hasobanurwa ngo “I Nyabihanga.”

²³ Baha Yesu vino ivanze na sumuruna, ariko ntiyayinywa.

²⁴ Baramubamba, bagabana imyenda ye bayifindiye ngo umuntu amenye uwo ari butware.

²⁵ Bamubambye ku isaha eshatu.

²⁶ Urwandiko rw'ikirego rwandikwa hejuru ye, ngo “UMWAMI W'ABAYUDA.”

²⁷ Bamubambana n'abambuzi babiri, umwe iburyo bwe, n'undi ibumoso. [

²⁸ Ni bwo ibyanditswe byasohoye ngo “Yabaranywe n'abanyabyaha.”]

²⁹ Abahisi baramutuka, bamuzunguriza imitwe bavuga bati “Ngaho wowe usenya urusengero ukarwubaka mu minsi itatu,

³⁰ ikize umanuke uve ku musaraba.”

³¹ Abatambyi bakuru n'abanditsi na bo baramucyurira, bamushinyagurira batyo barengurana bati “Yakijije abandi, ntabasha kwikiza.

³² Kristo, Umwami w'Abisirayeli! Namanuke ave ku musaraba nonaha, tubirebe twemere.” Ndetse n'abari babambanywe na we baramutuka.

Urupfu rwa Yesu

³³ Maze isaha zibaye esheshatu, haba ubwirakabiri mu gihugu cyose bugeza ku isaha ya cyenda.

³⁴ Ku isaha ya cyenda Yesu avuga ijwi rirenga ati “Eloyi, Eloyi, lama sabakitani?” Risobanurwa ngo “Mana yanjye, Mana yanjye, ni iki kikundekesheje?”

³⁵ Maze bamwe mu bahagaze aho babyumvise baravuga ngo “Dorere, arahamagara Eliya.”

³⁶ Nuko umwe arirukanka yenda sipongo ayuzuza inzoga ikerēta, ayishyira ku rubingo arayimusomesha ati “Reka turebe ko Eliya aza kumubambūra.”

³⁷ Maze Yesu avuga ijwi rirenga, umwuka urahera.

³⁸ Umwenda ukingiriza Ahera cyane h'urusengero utabukamo kabiri, uhereye hejuru ukageza hasi.

³⁹ Umutware utwara umutwe w'abasirikare wari uhagaze yerekeye Yesu, abonye apfuye atyo aravuga ati “Ni ukuri uyu muntu yari Umwana w'Imana.”

⁴⁰ Hari n'abagore bari bahagaze kure bareba, muri bo harimo Mariya Magadalena, na Mariya nyina wa Yakobo muto na Yosefu, na Salome.

⁴¹ Abo ubwo yabaga i Galilaya ni bo bamukurikiraga bamukorera, n'abandi bagore benshi bazamukanye i Yerusalemu.

Bahamba Yesu

⁴² Bugorobye kuko wari umunsi wo Kwitegura, ari wo munsi ubanziriza isabato,

⁴³ Yosefu Umunyarimataya, umujyanama w'icyubahiro kandi na we yategerezaga ubwami bw'Imana, aratinyuka ajya kwa Pilato asaba intumbi ya Yesu.

⁴⁴ Ariko Pilato yari agitangara yuko yaba amaze gupfa, ni ko guhamagaza umutware w'abasirikare, amubaza yuko amaze gupfa koko.

⁴⁵ Amaze kubyemezwa n'umutware w'abasirikare aha Yosefu intumbi.

⁴⁶ Na we agura umwenda w'igitare, arayibambūra ayizingira muri uwo mwenda w'igitare, amushyira mu mva ye yakorogoshowe mu rutare, abirindurira igitare ku munwa w'imva.

⁴⁷ Mariya Magadalena na Mariya nyina wa Yosefu babona aho ahambwe.