Mariko 14 - Bibiliya Yera

Bajya inama yo kwica Yesu

¹ Hari hasigaye iminsi ibiri hakabaho iminsi mikuru ya Pasika, ari yo bariramo imitsima idasembuwe. Abatambyi bakuru n'abanditsi bashaka uburyo bwo koshyoshya Yesu, ngo babone uko bamufata bamwice,

² ariko baravuga bati “Twe kumufata mu minsi mikuru, bidatera abantu imidugararo.”

Yesu asīgirwa amavuta mu nzu ya Simoni w'umubembe

³ Ubwo Yesu yari i Betaniya mu nzu ya Simoni umubembe yicaye arya, haza umukobwa ufite umukōndo w'amavuta meza y'igiciro cyinshi cyane, ameze nk'amadahano y'agati kitwa narada, nuko amena umukōndo amavuta ayamusuka ku mutwe.

⁴ Bamwe muri bo bararakara bati “Aya mavuta apfushirijwe iki ubusa,

⁵ ko yajyaga kugurwa idenariyo zisaga magana atatu zigahabwa abakene?” Baramwivovotera.

⁶ Ariko Yesu arababwira ati “Nimumureke! Muramuterera iki agahinda ko angiriye neza cyane?

⁷ Abakene bo muba muri kumwe na bo iteka, kandi aho mwashakira mwabagirira neza, ariko jyeweho ntituzahorana iteka.

⁸ Akoze uko ashoboye, abanje kunsīga amavuta ku mubiri, kuwutunganiriza guhambwa.

⁹ Ndababwira ukuri yuko aho ubutumwa bwiza buzigishirizwa hose mu isi yose, icyo uyu mugore ankoreye kizavugirwa kugira ngo bamwibuke.”

Yuda agambanira Yesu

¹⁰ Nuko Yuda Isikariyota wari umwe muri abo cumi na babiri, asanga abatambyi bakuru ngo abamugambanireho.

¹¹ Babyumvise baranezerwa, basezerana kumuha ifeza. Ashaka uburyo yamubagenzereza.

Yesu n'abigishwa be basangira ibya Pasika

¹² Nuko ku munsi wa mbere w'iyo minsi y'imitsima idasembuwe, ari wo babagiraho umwana w'intama wa Pasika, abigishwa be baramubaza bati “Urashaka ko tujya he ngo tugutunganirize ibya Pasika ngo ubirye?”

¹³ Atuma babiri mu bigishwa be arababwira ati “Mujye mu murwa, umugabo muri buhure wikoreye ikibindi cy'amazi mumukurikire.

¹⁴ Aho ari bwinjire mubwire nyir'urugo muti ‘Umwigisha arababaza ngo: Icumbi rye riri hehe, aho ari busangirire ibya Pasika n'abigishwa be?’

¹⁵ Nuko ari bubereke icyumba cyo hejuru gishashwemo giteguwe, abe ari mo mudutunganiriza.”

¹⁶ Abigishwa baragenda bajya mu murwa, babisanga uko yabibabwiye, batunganya ibya Pasika.

¹⁷ Bugorobye azana n'abo cumi na babiri.

¹⁸ Bicaye barya, Yesu arababwira ati “Ndababwira ukuri yuko umwe muri mwe, uwo dusangira ari bungambanire.”

¹⁹ Batangira kubabara bamubaza umwe umwe bati “Ni jye?”

²⁰ Arabasubiza ati “Umwe muri mwebwe cumi na babiri, uwo duhuriza amaboko ku mbehe, ni we uwo.

²¹ Umwana w'umuntu aragenda nk'uko byanditswe kuri we, ariko uwo muntu ugambanira Umwana w'umuntu azabona ishyano! Ibyajyaga kumubera byiza ni uko aba atavutse.”

Yesu atanga Ifunguro ryera

²² Bakirya yenda umutsima, amaze kuwushimira arawumanyagura, arawubaha arababwira ati “Nimwakire, uyu ni umubiri wanjye.”

²³ Yenda igikombe, amaze kugishimira arakibaha banywera ho bose.

²⁴ Arababwira ati “Aya ni amaraso yanjye y'isezerano rishya, ava ku bwa benshi.

²⁵ Ndababwira ukuri yuko ntazongera kunywa ku mbuto z'imizabibu, kugeza umunsi nzasangirira namwe vino nshya mu bwami bw'Imana.”

²⁶ Bamaze kuririmba barasohoka, bajya ku musozi wa Elayono.

Yesu ahanura ko Petero ari bumwihakane gatatu

²⁷ Maze Yesu arabwira ati “Mwese muri bugushwe, kuko byanditswe ngo ‘Nzakubita umwungeri, intama zisandare.’

²⁸ Ariko nimara kuzurwa, nzababanziriza kujya i Galilaya.”

²⁹ Ariko Petero aramubwira ati “Naho bose bari buhemuke, ariko jye sindi buhemuke.”

³⁰ Yesu aramubwira ati “Ndakubwira ukuri yuko muri iri joro rya none, inkoko itarabika kabiri, wowe ubwawe uri bunyihakane gatatu.”

³¹ Ariko we arirenga arahamya ati “N'aho byatuma mpfana nawe, sindi bukwihakane na hato.” Nuko bose bavuga batyo.

Yesu asengana umubabaro ari i Getsemani

³² Bagera ahitwa i Getsemani, maze abwira abigishwa be, ati “Nimube mwicaye hano mbanze nsenge.”

³³ Ajyana Petero na Yakobo na Yohana, atangira kumirwa no guhagarika umutima cyane.

³⁴ Arababwira ati “Umutima wanjye ufite agahinda kenshi kenda kunyica, mugume hano mube maso.”

³⁵ Yigira imbere ho hato, yubama hasi, arasenga ngo niba bishoboka icyo gihe kimurenge.

³⁶ Ati “Aba, Data, byose biragushobokera, undenze iki gikombe, ariko bye kuba uko jyeweho nshaka, ahubwo bibe uko wowe ushaka.”

³⁷ Araza asanga basinziriye, abaza Petero ati “Simoni, urasinziriye? Harya ntubashije kuba maso n'isaha imwe?

³⁸ Mube maso musenge, mutajya mu moshya. Umutima ni wo ukunze, ariko umubiri ufite intege nke.”

³⁹ Yongera kugenda arasenga, avuga amagambo amwe n'aya mbere.

⁴⁰ Yongera kugaruka asanga basinziriye kuko amaso yabo aremereye, ntibamenya icyo bamusubiza.

⁴¹ Agaruka ubwa gatatu arababwira ati “Noneho nimusinzire muruhuke. Birarangiye. Igihe kirasohoye, dore Umwana w'umuntu agambaniwe mu maboko y'abanyabyaha.

⁴² Nimubyuke tugende, dore ungenza ari hafi.”

Bafata Yesu

⁴³ Akibivuga, Yuda umwe muri abo cumi na babiri azana n'igitero gifite inkota n'inshyimbo, giturutse ku batambyi bakuru n'abanditsi n'abakuru.

⁴⁴ Ariko umugambanira yari yabahaye ikimenyetso ati “Uwo ndi busome, ni we uwo. Mumufate, mumujyane mumukomeje.”

⁴⁵ Nuko asohoye, uwo mwanya aramwegera aramubwira ati “Mwigisha”, aramusomagura.

⁴⁶ Baramusumira, baramufata.

⁴⁷ Maze umwe mu bahagaze aho akura inkota, ayikubita umugaragu w'umutambyi mukuru amuca ugutwi.

⁴⁸ Yesu arababaza ati “Harya muhurujwe no kumfata nk'uko muzira umwambuzi, mufite inkota n'inshyimbo?

⁴⁹ Iminsi yose nahoranaga namwe mu rusengero nigisha ko mutamfashe? Ariko ibi bibereyeho kugira ngo ibyanditswe bisohore.”

⁵⁰ Maze abe bose baramuhāna barahunga.

⁵¹ Nuko umusore umwe amukurikira yifubitse umwenda w'igitare, baramufata

⁵² basigarana umwenda we, ahunga yambaye ubusa.

Abatambyi bacira Yesu urubanza rwo gupfa

⁵³ Bajyana Yesu ku mutambyi mukuru, nuko abatambyi bakuru bose n'abakuru n'abanditsi bamuteraniraho.

⁵⁴ Petero amukurikira arenga ahinguka, agera no mu rugo rw'umutambyi mukuru, yicarana n'abagaragu yota umuriro.

⁵⁵ Nuko abatambyi bakuru n'abanyarukiko bose bashaka Yesu ho ibirego ngo babone uko bamwica, barabibura.

⁵⁶ Nubwo abamubeshyeraga bari benshi, amagambo yabo ntiyari ahuye.

⁵⁷ Bamwe barahaguruka baramubeshyera bati

⁵⁸ “Twumvise avuga ati ‘Nzasenya uru rusengero rwubatswe n'intoki, nubake urundi mu minsi itatu rutubatswe n'intoki.’ ”

⁵⁹ Nyamara n'ayo magambo yabo ntiyari ahuye.

⁶⁰ Umutambyi mukuru arahaguruka ahagarara hagati, abaza Yesu ati “Mbese ntiwiregura na hato? Ntiwumvise ibyo aba bakureze?”

⁶¹ Aricecekera ntiyagira icyo amusubiza. Umutambyi mukuru yongera kumubaza ati “Mbese ni wowe Kristo koko, Umwana w'Imana idahinyuka?”

⁶² Yesu aramusubiza ati “Ndi we, kandi muzabona Umwana w'umuntu yicaye iburyo bw'ubushobozi bw'Imana aje ku bicu byo mu ijuru.”

⁶³ Umutambyi mukuru abyumvise atyo ashishimura imyenda ye ati “Turacyashakira iki abagabo?

⁶⁴ Dore noneho mwiyumviye kwigereranya kwe. Muratekereza iki?” Bose bamucira urubanza, ngo akwiriye kwicwa.

⁶⁵ Bamwe baherako bamucira amacandwe, bamupfuka mu maso, bamukubita ibipfunsi bati “Hanura.” N'abagaragu bamukubita inshyi.

Petero yihakana Yesu

⁶⁶ Ubwo Petero yari akiri hanze mu rugo haza umwe mu baja b'umutambyi mukuru,

⁶⁷ abonye Petero yota umuriro, aramwitegereza aramubwira ati “Nawe wari kumwe na Yesu w'i Nazareti.”

⁶⁸ Na we arabihakana ati “Ibyo uvuze sinzi ibyo ari byo, kandi simbimenye”, maze arasohoka. Ageze mu bikingi by'amarembo inkoko irabika.

⁶⁹ Umuja amubonye aherako yongera kubwira abahagaze aho ati “Uyu ni uwo muri bo.”

⁷⁰ Na we yongera kubihakana. Hashize umwanya muto, abahagaze aho bongera kubwira Petero bati “Uri uwo muri bo rwose kuko uri Umunyagalilaya.”

⁷¹ Na we atangira kwivuma no kurahira ati “Sinzi uwo muntu muvuga uwo ari we.”

⁷² Muri ako kanya inkoko ibika ubwa kabiri. Petero yibuka ijambo Yesu yari yamubwiye ati “Inkoko itarabika kabiri, uri bunyihakane gatatu.” Ariyumvīra, agira agahinda kenshi ararira.