Luka 24 - Bibiliya Yera

Kuzuka kwa Yesu

¹ Ku wa mbere w'iminsi irindwi, kare mu museke bajya ku gituro bajyanye bya bihumura neza batunganije.

² Babona igitare kibirinduye kivuye ku gituro,

³ binjiramo ntibasangamo intumbi y'Umwami Yesu.

⁴ Bakiguye mu kantu, abagabo babiri bahagarara aho bari bambaye imyenda irabagirana.

⁵ Abagore baratinya bubika amaso, nuko abo bagabo barababaza bati “Ni iki gitumye mushakira umuzima mu bapfuye?

⁶ Ntari hano ahubwo yazutse. Mwibuke ibyo yavuganye namwe akiri i Galilaya ati

⁷ ‘Umwana w'umuntu akwiriye kugambanirwa ngo afatwe n'amaboko y'abanyabyaha, abambwe maze azazuke ku munsi wa gatatu.’ ”

⁸ Bibuka amagambo ye.

⁹ Bava ku gituro basubirayo, ibyo byose babibwira abigishwa cumi n'umwe n'abandi bose.

¹⁰ Abo ni Mariya Magadalena na Yowana, na Mariya nyina wa Yakobo, n'abandi bagore bari hamwe na bo babwira intumwa ibyo babonye.

¹¹ Ariko ayo magambo ababera nk'impuha ntibayemera.

¹² Maze Petero arahaguruka yirukanka ajya ku gituro, arunama arungurukamo, abona imyenda y'ibitare iri yonyine. Asubira iwe atangazwa n'ibyabaye.

Yesu yiyereka abigishwa babiri bari mu nzira ijya Emawusi

¹³ Nuko uwo munsi babiri muri bo bajyaga mu kirorero cyitwa Emawusi. (Kuva i Yerusalemu kugerayo ni nka sitadiyo mirongo itandatu.)

¹⁴ Nuko baganira ibyabaye byose.

¹⁵ Bakiganira babazanya, Yesu arabegera ajyana na bo,

¹⁶ Ariko amaso yabo arabuzwa ngo batamumenya.

¹⁷ Arababaza ati “Muragenda mubazanya ibiki?” Bahagarara bagaragaje umubabaro.

¹⁸ Umwe muri bo witwaga Kilewopa aramusubiza ati “Mbese ni wowe wenyine mu bashyitsi b'i Yerusalemu, utazi ibyahabaye muri iyi minsi?”

¹⁹ Arababaza ati “Ni ibiki?” Bati “Ni ibya Yesu w'i Nazareti, wari umuhanuzi ukomeye mu byo yakoraga n'ibyo yavugaga imbere y'Imana n'imbere y'abantu bose,

²⁰ kandi twavuganaga uburyo abatambyi bakuru n'abatware bacu, bamutanze ngo acirwe urubanza rwo gupfa bakamubamba,

²¹ kandi twiringiraga yuko ari we uzacungura Abisirayeli. Uretse ibyo, dore uyu munsi ni uwa gatatu uhereye aho ibyo byabereye.

²² None abagore bo muri twe badutangaje, kuko bazindutse bajya ku gituro

²³ ntibasangamo intumbi ye. Nuko baraza batubwira ko babonekewe n'abamarayika, bakababwira ko ari muzima.

²⁴ Kandi bamwe mu bari bari kumwe na twe bagiye ku gituro basanga ari ko biri, uko abagore batubwiye, ariko we ntibamubona.”

²⁵ Arababwira ati “Mwa bapfu mwe, imitima yanyu itinze cyane kwizera ibyo abahanuzi bavuze byose.

²⁶ None se Kristo ntiyari akwiriye kubabazwa atyo, ngo abone kwinjira mu bwiza bwe?”

²⁷ Atangirira kuri Mose no ku bahanuzi bose, abasobanurira mu byanditswe byose ibyanditswe kuri we.

²⁸ Bageze bugufi bw'ikirorero bajyagamo, agira nk'ushaka kugicaho.

²⁹ Baramuhata bati “Se waretse tukagumana kuko bwije kandi umunsi ukaba ukuze?” Nuko arinjira ngo agumane na bo.

³⁰ Yicaye ngo asangire na bo, yenda umutsima arawushimira, arawumanyagura arawubaha.

³¹ Amaso yabo arahumuka baramumenya, maze aburira imbere yabo ntibongera kumubona.

³² Baravugana bati “Yewe, ntiwibuka ukuntu imitima yacu yari ikeye, ubwo yavuganaga natwe turi mu nzira adusobanurira ibyanditswe!”

³³ Uwo mwanya barahaguruka basubira i Yerusalemu, basanga abo cumi n'umwe bateranye hamwe n'abandi,

³⁴ bumva bavuga bati “Ni ukuri Umwami Yesu yazutse, ndetse yabonekeye Simoni.”

³⁵ Nuko ba bandi babiri na bo babatekerereza ibyabereye mu nzira, n'uburyo bamumenyeshejwe n'uko amanyaguye umutsima.

Yesu yiyereka abigishwa be

³⁶ Bakivuga ibyo, Yesu ahagarara hagati yabo arababwira ati “Amahoro abe muri mwe.”

³⁷ Maze barikanga, bagira ubwoba bwinshi bagira ngo ni umuzimu babonye.

³⁸ Arababwira ati “Ikibahagaritse imitima ni iki, kandi ni iki gitumye mwiburanya mu mitima yanyu?

³⁹ Nimurebe ibiganza byanjye n'ibirenge byanjye, mumenye ko ari jye ubwanjye. Ndetse nimunkoreho murebe, kuko umuzimu atagira umubiri n'amagufwa nk'ibyo mundebana.”

⁴⁰ Avuze ibyo abereka ibiganza bye n'ibirenge bye.

⁴¹ Nuko ibinezaneza bikibabujije kubyemera, bagitangara arababaza ati “Hari icyo kurya mufite hano?”

⁴² Bamuha igice cy'ifi yokeje,

⁴³ aracyākira akirīra imbere yabo.

Yesu asezera ku bigishwa be

⁴⁴ Maze arababwira ati “Aya ni amagambo nababwiraga nkiri kumwe namwe, yuko ibyanditswe kuri jye byose mu mategeko ya Mose, no mu byahanuwe no muri Zaburi bikwiriye gusohora.”

⁴⁵ Maze abungura ubwenge ngo basobanukirwe n'ibyanditswe,

⁴⁶ ati “Ni ko byanditswe ko Kristo akwiriye kubabazwa no kuzuka ku munsi wa gatatu,

⁴⁷ kandi ko kwihana no kubabarirwa ibyaha bikwiriye kubwirwa amahanga yose mu izina rye, bahereye kuri Yerusalemu.

⁴⁸ Ni mwe bagabo b'ibyo.

⁴⁹ Kandi dore ngiye kuboherereza ibyo Data yasezeranye, ariko mugume mu murwa kugeza ubwo muzambikwa imbaraga zivuye mu ijuru.”

Yesu ajya mu ijuru

⁵⁰ Abajyana hanze, abageza i Betaniya arambura amaboko hejuru, abaha umugisha.

⁵¹ Akibaha umugisha atandukanywa na bo, ajyanwa mu ijuru.

⁵² Na bo baramuramya, basubirana i Yerusalemu umunezero mwinshi,

⁵³ baguma mu rusengero iteka bashima Imana.