Luka 23 - Bibiliya Yera

Yesu ashyikirizwa Pilato

¹ Bose barahaguruka bamujyana kwa Pilato.

² Batangira kumurega bati “Uyu twamubonye agandisha ubwoko bwacu, ababuza guha Kayisari umusoro, avuga kandi ko ari Kristo Umwami.”

³ Pilato aramubaza ati “Ni wowe mwami w'Abayuda?” Aramusubiza ati “Wakabimenye.”

⁴ Pilato abwira abatambyi bakuru na rubanda ati “Nta cyaha mbonye kuri uyu muntu.”

⁵ Na bo barashega bati “Agomesha abantu, yigisha i Yudaya hose uhereye i Galilaya ukageza n'ino.”

Pilato yohereza Yesu kwa Herode

⁶ Pilato abyumvise abaza ko ari Umunyagalilaya.

⁷ Amenye ko ari uwo mu gihugu cya Herode, amwohereza kwa Herode kuko na we yari i Yerusalemu muri iyo minsi.

⁸ Herode abonye Yesu aranezerwa cyane, kuko uhereye kera yashakaga kumubona, kuko yumvaga inkuru ze kandi yifuzaga kubona ikimenyetso yakora.

⁹ Amubaza amagambo menshi, ariko ntiyagira icyo amusubiza.

¹⁰ Abatambyi bakuru n'abanditsi barahagarara, bakomeza kumurega cyane.

¹¹ Herode n'abasirikare be baramunegura, baramushinyagurira, maze bamwambika umwenda ubengerana bamugarurira Pilato.

¹² Herode na Pilato baherako buzura uwo munsi, kuko mbere banganaga.

Pilato acira Yesu urubanza

¹³ Pilato ateranya abatambyi bakuru n'abatware n'abantu bose,

¹⁴ arababwira ati “Mwanzaniye uyu muntu ngo yagandishije abantu, none dore ubwanjye namubarije imbere yanyu, nyamara nta cyaha mbonye kuri we mu byo mwamureze.

¹⁵ Ndetse Herode na we nta cyo yabonye kuko yamutugaruriye, kandi dore nta cyo yakoze gikwiriye kumwicisha.

¹⁶ Nuko nimara kumukubita, ndamubohora.” [

¹⁷ Ibyo yabivugiye kuko yabaga akwiriye kubabohorera imbohe imwe, mu minsi mikuru yose.]

¹⁸ Ariko bose basakuriza icyarimwe bati “Kuraho uyu, utubohorere Baraba.”

¹⁹ Uwo bari bamushyize mu nzu y'imbohe, bamuhora ubugome n'ubwicanyi bwari mu murwa.

²⁰ Pilato yongera kuvugana na bo, ashaka kubohora Yesu.

²¹ Ariko bo barasakuza bati “Mubambe! Mubambe!”

²² Ababaza ubwa gatatu ati “Kuki? Uyu yakoze cyaha ki? Simubonyeho icyaha cyo kumwicisha. Nuko nimara kumukubita, ndamubohora.”

²³ Ariko baramukoranira basakuza n'amajwi arenga, bamuhata ko Yesu abambwa, amajwi yabo aramuganza.

²⁴ Nuko Pilato aca urubanza ngo icyo bashaka bagihabwe:

²⁵ abohora uwashyizwe mu nzu y'imbohe bamuhora ubugome n'ubwicanyi, uwo bashakaga, maze atanga Yesu ngo bamugire uko bashaka.

Abagore b'i Yerusalemu baborogera Yesu

²⁶ Baramujyana, batangīra umuntu witwaga Simoni w'Umunyakurene waturukaga imusozi, bamukorera umusaraba ngo awikorere akurikiye Yesu.

²⁷ Abantu benshi baramukurikira, barimo n'abagore bikubita mu bituza bamuborogera.

²⁸ Yesu arabakebuka arababwira ati “Bakobwa b'i Yerusalemu, ntimundirire, ahubwo mwiririre n'abana banyu,

²⁹ kuko iminsi izaza bazavuga bati ‘Hahirwa ingumba n'inda zitabyaye, n'amabere atonkeje.’

³⁰ Ni bwo bazatangira kubwira imisozi bati ‘Nimutugwire’, babwire n'udusozi bati ‘Nimudutwikire.’

³¹ Mbese ubwo bagenje batya igiti kikiri kibisi, nikimara kuma bizacura iki?”

³² Kandi bajyana n'abandi babiri bari inkozi z'ibibi, ngo babīcane na we.

Babamba Yesu bamushinyagurira

³³ Nuko bageze ahitwa i Nyabihanga, bamubambanaho n'abo bagome, umwe iburyo bwe n'undi ibumoso.

³⁴ Yesu aravuga ati “Data, ubababarire kuko batazi icyo bakora.” Bagabana imyenda ye barayifindira.

³⁵ Abantu barahagarara bareba. Abatware na bo baramukoba cyane bati “Yakijije abandi, ngaho na we niyikize niba ari we Kristo watoranijwe n'Imana.”

³⁶ Abasirikare na bo baramushinyagurira, bamwegereye bamuha inzoga isharira

³⁷ bati “Niba uri umwami w'Abayuda ikize.”

³⁸ Hejuru ye hari urwandiko rwanditswe ngo “UYU NI UMWAMI W'ABAYUDA.”

Umugome umwe yihana

³⁹ Umwe muri abo bagome babambwe aramutuka ati “Si wowe Kristo? Ngaho ikize natwe udukize.”

⁴⁰ Ariko uwa kabiri amusubiza amucyaha ati “No kūbaha Imana ntuyubaha, uri mu rubanza rumwe n'urwe?

⁴¹ Twebweho duhowe ukuri, tukaba twituwe ibihwanye n'ibyo twakoze, ariko uyu nta kibi yakoze.”

⁴² Nuko abwira Yesu ati “Mwami, uzanyibuke ubwo uzazira mu bwami bwawe.”

⁴³ Aramusubiza ati “Ndakubwira ukuri, yuko uyu munsi turi bubane muri Paradiso.”

Urupfu rwa Yesu

⁴⁴ Nuko isaha zibaye nk'esheshatu, haza ubwirakabiri mu gihugu cyose kugeza ku isaa cyenda,

⁴⁵ izuba ntiryava, umwenda ukingiriza Ahera cyane h'urusengero utabukamo kabiri.

⁴⁶ Yesu avuga ijwi rirenga ati “Data, mu maboko yawe ni ho nshyize ubugingo bwanjye.” Amaze kuvuga atyo umwuka urahera.

⁴⁷ Nuko umutware w'abasirikare abonye ibibaye ahimbaza Imana ati “Ni ukuri uyu muntu yari umukiranutsi.”

⁴⁸ Inteko z'abantu bari bateraniye aho kurebēra, babonye ibibaye basubirayo bīkubita mu bituza.

⁴⁹ N'incuti ze zose n'abagore bavanye i Galilaya, bari bahagaze kure babireba.

Yosefu ahamba Yesu

⁵⁰ Umuntu witwaga Yosefu, yari umujyanama wo mu Bayuda, w'umunyangeso nziza kandi ukiranuka.

⁵¹ Uwo ntiyafatanije n'inama zabo n'ibyo bakoze, yari Umunyarimataya, umudugudu w'Abayuda, na we yategerezaga ubwami bw'Imana.

⁵² Nuko ajya kwa Pilato asaba intumbi ya Yesu.

⁵³ Arayibambūra ayizingira mu mwenda w'igitare, ayihamba mu mva yakorogoshowe mu rutare, itarahambwamo umuntu.

⁵⁴ Hāri ku munsi wo Kwitegura, isabato yenda gusohora.

⁵⁵ Nuko abagore bavanye na Yesu i Galilaya bamukurikiye, babona imva n'intumbi ye uko ihambwe,

⁵⁶ basubirayo batunganya ibihumura neza n'imibavu. Kandi ku munsi w'isabato bararuhuka nk'uko byategetswe.