Luka 22 - Bibiliya Yera

Yuda agambanira Yesu

¹ Nuko iminsi mikuru y'imitsima idasembuwe yitwa Pasika, yendaga gusohora.

² Abatambyi bakuru n'abanditsi bashaka uko bamwica, kuko batinyaga rubanda.

³ Satani yinjira muri Yuda witwaga Isikariyota, yari mu mubare w'abo cumi na babiri.

⁴ Aragenda avugana n'abatambyi bakuru n'abatware b'abasirikare, uko azamubagenzereza.

⁵ Baranezerwa basezerana kumuha ifeza.

⁶ Aremera maze ashaka uburyo yamubagenzereza, rubanda rudahari.

Yesu n'abigishwa basangira ibya Pasika

⁷ Nuko umunsi w'imitsima idasembuwe urasohora, ari wo ukwiriye kubāgirwamo umwana w'intama wa Pasika.

⁸ Atuma Petero na Yohana ati “Nimugende mudutunganirize ibya Pasika kugira ngo turye.”

⁹ Baramubaza bati “Urashaka ko tubitunganiriza hehe?”

¹⁰ Arabasubiza ati “Dore nimumara kugera mu murwa, muraza guhura n'umugabo wikoreye ikibindi cy'amazi, mumukurikire mu nzu ari bwinjiremo.

¹¹ Nuko mubwire nyir'inzu muti ‘Umwigisha arakubaza ngo: Icumbi riri hehe, aho ari busangirire ibya Pasika n'abigishwa be?’

¹² Na we ari bubereke icyumba kinini cyo hejuru giteguye, abe ari ho mubitunganiriza.”

¹³ Baragenda babisanga uko yabibabwiye, batunganya ibya Pasika.

¹⁴ Igihe gisohoye aricara ngo afungure, kandi intumwa na zo zicarana na we.

¹⁵ Arazibwira ati “Kwifuza nifujije gusangira namwe Pasika iyi, ntarababazwa.

¹⁶ Ndababwira yuko ntazongera rwose kuyirya, kugeza aho izasohorera mu bwami bw'Imana.”

¹⁷ Yenda igikombe aragishimira, arababwira ati “Mwende iki musangire.

¹⁸ Ndababwira yuko uhereye none ntazanywa ku mbuto z'imizabibu, ukageza aho ubwami bw'Imana buzazira.”

¹⁹ Yenda umutsima arawushimira, arawumanyagura arawubaha, arababwira ati “Uyu ni umubiri wanjye [ubatangiwe. Mujye mukorera mutya kugira ngo munyibuke.”

²⁰ N'igikombe akigenza atyo bamaze kurya ati “Iki gikombe ni isezerano rishya ryo mu maraso yanjye ava ku bwanyu.]

²¹ “Ariko dore ukuboko k'ungambanira kuri kumwe n'ukwanjye ku meza.

²² Kuko Umwana w'umuntu agenda nk'uko byamugenewe, ariko uwo muntu umugambanira azabona ishyano!”

²³ Batangira kubazanya muri bo, uwenda kugira atyo uwo ari we.

Abigishwa bajya impaka z'ubukuru

²⁴ Maze habyuka impaka muri bo, ngo ni nde muri bo ukwiriye gutekerezwa ko ari we mukuru.

²⁵ Arababwira ati “Abami b'amahanga barayategeka, n'abafite ubutware bwo kuyatwara bitwa ba ruhekerababyeyi.

²⁶ Ariko mwebweho ntimukabe mutyo, ahubwo ukomeye muri mwe abe nk'uworoheje, n'utwara abe nk'uhereza.

²⁷ Umukuru ni uwuhe? Ni uherezwa cyangwa ni uhereza? Si uherezwa? Ariko jyewe ndi hagati yanyu meze nk'uhereza.

²⁸ “Ni mwe mwagumanye nanjye, twihanganana mu byo nageragejwe.

²⁹ Nanjye mbabikiye ubwami nk'uko Data yabumbikiye,

³⁰ kugira ngo muzarye munywe mwegereye ameza yanjye mu bwami bwanjye. Kandi muzicara ku ntebe z'icyubahiro, mucire imanza imiryango cumi n'ibiri y'Abisirayeli.”

Yesu avuga ko Petero agiye kumwihakana

³¹ Kandi Umwami Yesu aravuga ati “Simoni, Simoni, dore Satani yabasabye kugira ngo abagosore nk'amasaka,

³² ariko weho ndakwingingiye ngo kwizera kwawe kudacogora. Nawe numara guhinduka ukomeze bagenzi bawe.”

³³ Aramubwira ati “Mwami, niteguye kujyana nawe mu nzu y'imbohe ndetse no mu rupfu.”

³⁴ Aramubwira ati “Petero, ndakubwira yuko uyu munsi inkoko itaza kubika, utaranyihakana gatatu ko utanzi.”

³⁵ Kandi arababaza ati “Ubwo nabatumaga mudafite impago, cyangwa imvumba cyangwa inkweto, mbese hari icyo mwakennye?” Baramusubiza bati “Nta cyo.”

³⁶ Arababwira ati “Ariko nonaha ufite uruhago rurimo ifeza arujyane, n'ufite imvumba ni uko. Ariko utabifite agure umwitero we, ngo abone kugura inkota.

³⁷ Ndababwira yuko ibi byanditswe bikwiriye kunsohoraho, ngo ‘Yabaranywe n'abagome’, kuko ibyanjye byenda gusohora.”

³⁸ Baramubwira bati “Mwami, dore inkota ebyiri ngizi.” Arababwira ati “Ziramaze!”

Yesu asengana umubabaro

³⁹ Arasohoka ajya ku musozi wa Elayono nk'uko yamenyerey, abigishwa be baramukurikira.

⁴⁰ Agezeyo arababwira ati “Nimusenge kugira ngo mutajya mu moshya.”

⁴¹ Atandukana na bo umwanya ureshya n'ahaterwa ibuye, arapfukama arasenga ati

⁴² “Data, nubishaka undenze iki gikombe, ariko bye kuba uko nshaka, ahubwo bibe uko ushaka.” [

⁴³ Marayika uvuye mu ijuru aramubonekera, amwongera imbaraga

⁴⁴ kuko yari ababaye bikabije, asenga cyane, n'ibyuya bye byari bimeze nk'ibitonyanga by'amaraso bitonyanga hasi.]

⁴⁵ Amaze gusenga arahaguruka ajya ku bigishwa be, asanga basinjirijwe n'agahinda.

⁴⁶ Arababaza ati “Ikibasinjirije ni iki? Nimubyuke musenge kugira ngo mutajya mu moshya.”

Bafata Yesu

⁴⁷ Akibivuga haza igitero kizanywe n'uwitwa Yuda, umwe muri abo cumi na babiri akigiye imbere. Nuko Yuda uwo yegera Yesu ngo amusome.

⁴⁸ Yesu aramubaza ati “Yuda, uragambanishiriza Umwana w'umuntu kumusoma?”

⁴⁹ Abari kumwe na we babonye ibyenda kubaho baramubaza bati “Databuja, tubakubite inkota?”

⁵⁰ Umwe muri bo ayikubita umugaragu w'Umutambyi mukuru, amuca ugutwi kw'iburyo.

⁵¹ Yesu aravuga ati “Rekera aho.” Amukora ku gutwi aragukiza.

⁵² Yesu abwira abatambyi bakuru n'abatware b'abasirikare barinda urusengero, n'abakuru bamuteye ati “Munteye nk'abateye umwambuzi, mufite inkota n'inshyimbo.

⁵³ Nahoranaga namwe mu rusengero iminsi yose, ko mutarambuye amaboko ngo mumfate? Ariko noneho iki ni igihe cyanyu n'icy'ubutware bw'umwijima.”

Petero yihakana Yesu

⁵⁴ Baramufata baramujyana, bamushyira mu nzu y'Umutambyi mukuru, ariko Petero amukurikira arenga ahinguka.

⁵⁵ Nuko bamaze gucana umuriro mu rugo hagati baricara, Petero na we yicara hagati yabo.

⁵⁶ Umuja amubonye yicaye ahabona aramwitegereza aravuga ati “N'uyu na we yari kumwe na we.”

⁵⁷ Arabihakana ati “Mugore, simuzi.”

⁵⁸ Hashize umwanya muto, undi aramubona aramubwira ati “Nawe uri uwo muri bo.” Petero ati “Wa muntu we, si ndi uwabo.”

⁵⁹ Hashize umwanya nk'isaha imwe, undi amuhamiriza abikomeje cyane ati “Ni ukuri n'uyu yari kumwe na we, kuko ari Umunyagalilaya.”

⁶⁰ Petero ati “Wa muntu we, icyo uvuze sinzi icyo ari cyo.” Akibivuga, muri ako kanya inkoko irabika.

⁶¹ Umwami Yesu arakebuka yitegereza Petero, nuko Petero yibuka amagambo Umwami yari yamubwiye ati “Uyu munsi inkoko itarabika, uri bunyihakane gatatu.”

⁶² Arasohoka ajya hanze ararira cyane.

Bashinyagurira Yesu

⁶³ Abagabo bari bafashe Yesu baramushinyagurira, baramukubita,

⁶⁴ bamupfuka mu maso baramubaza bati “Hanura, ni nde ugukubise?”

⁶⁵ Bamubwira n'ibindi byinshi bamutuka.

⁶⁶ Nuko iryo joro rikeye abakuru b'ubwo bwoko baraterana, ari bo batambyi bakuru n'abanditsi, bamujyana mu rukiko rwabo bati

⁶⁷ “Niba uri Kristo, tubwire.” Arababwira ati “Nubwo nababwira ntimwabyemera na hato,

⁶⁸ naho nababaza ntimwansubiza.

⁶⁹ Ariko uhereye none, Umwana w'umuntu azaba yicaye iburyo bw'ubushobozi bw'Imana.”

⁷⁰ Bose bati “Noneho uri Umwana w'Imana?” Arabasubiza ati “Mwakabimenye ko ndi we.”

⁷¹ Na bo bati “Turacyashakira iki abagabo, ko twumvise ubwacu abyivugiye ubwe?”