Imigani 8 - Bibiliya Yera

Bwenge yongera guhugura

¹ Ntimwumva ko Bwenge ashyira ejuru, Akarangurura ijwi ry'ubuhanga?

² Ahagaze mu mpinga z'imisozi, Mu mahuriro y'inzira.

³ Mu marembo no mu miharuro y'umurwa, Ashyira ejuru ari mu bikingi by'amarembo ati

⁴ “Yemwe bagabo, ni mwe mpamagara, N'abana b'abantu ni bo ijwi ryanjye ribwira.

⁵ Yemwe mwa njiji mwe, nimujijuke, Namwe mwa bapfu mwe, mugire umutima usobanukiwe.

⁶ Nimwumve ngiye kuvuga ibikomeye, Kandi umunwa wanjye ndawubumburira kuvuga ibitunganye.

⁷ Kuko akanwa kanjye kaza kuvuga ukuri, Kandi gukiranirwa ari ikizira kuri jye.

⁸ Amagambo yo mu kanwa kanjye yose ni akiranuka, Nta buriganya cyangwa ubugoryi buyabamo.

⁹ Asobanukira ujijutse, Kandi atunganira ababonye ubwenge.

¹⁰ Aho gushaka ifeza mutore ibyo nigisha, Mushake ubwenge kuburutisha izahabu nziza.

¹¹ “Kuko ubwenge buruta amabuye ya marijani, Kandi mu bintu byifuzwa byose nta gihwanye na bwo.

¹² Jyewe Bwenge nagize umurava ho ubuturo bwanjye, Mfite ubwenge bwo kugenzura.

¹³ Kūbaha Uwiteka ni ukwanga ibibi, Ubwibone n'agasuzuguro n'inzira y'ibibi, N'akanwa k'ubugoryi ni byo nanga.

¹⁴ Ni jye nyir'inama no kumenya gutunganye, Ni jye Muhanga kandi mfite n'ububasha.

¹⁵ Ni jye wimika abami, Ngaha ibikomangoma guca imanza zitabera.

¹⁶ Ni jye uha abatware gutwara, N'imfura na zo ndetse n'abacamanza bo mu isi bose.

¹⁷ Nkunda abankunda, Kandi abanshakana umwete bazambona.

¹⁸ Ubukire n'icyubahiro biri iwanjye, Kandi n'ubutunzi buhoraho, no gukiranuka na byo.

¹⁹ Imbuto zanjye ziruta izahabu, ni ukuri ziruta izahabu nziza, Kandi indamu yanjye iruta ifeza y'indobanure.

²⁰ Ngendera mu nzira yo gukiranuka, No mu nzira z'imanza zitabera,

²¹ Kugira ngo ntungishe abankunda, Nuzuze ububiko bwabo.

²² “Uwiteka mu itangira ry'imirimo ye yarangabiye, Ataragira icyo arema.

²³ Uhereye kera kose narimitswe, Uhereye mbere na mbere isi itararemwa.

²⁴ Ikuzimu hatarabaho naragaragajwe, Amasōko adudubiza amazi menshi ataraboneka.

²⁵ Imisozi miremire itarahagarikwa, Iyindi itarabaho naragaragajwe.

²⁶ Yari itararema isi no mu bweru, N'umukungugu w'isi utaratumuka.

²⁷ Igihe yaringanije amajuru nari mpari, Igihe yashingaga urugabano rw'ikuzimu,

²⁸ Mu gihe yakomereje ijuru hejuru, No mu gihe amasōko y'ikuzimu yahawe imbaraga,

²⁹ Igihe yahaye inyanja urubibi rwayo, Kugira ngo amazi atarenga itegeko ryayo, Kandi no mu gihe yagaragaje imfatiro z'isi.

³⁰ Icyo gihe nari kumwe na yo ndi umukozi w'umuhanga, Kandi nari umunezero wayo iminsi yose, Ngahora nezerewe imbere yayo,

³¹ Nkishimira mu isi yayo yaremewe guturwamo, Kandi ibinezeza byanjye byari ukubana n'abantu.

³² “Nuko rero bana banjye nimunyumvire, Kuko hahirwa abakomeza inzira zanjye.

³³ Mwumve ibyo mbahugura mugire ubwenge, Ntimubwange.

³⁴ Hahirwa umuntu unyumvira, Akaba maso mu marembo yanjye iminsi yose, Agategerereza ku nkomo z'imiryango yanjye.

³⁵ Kuko umbonye wese aba abonye ubugingo, Kandi azahabwa umugisha n'Uwiteka,

³⁶ Ariko uncumuraho aba yononnye ubugingo bwe, Abanyanga bose baba bakunze urupfu.”