Imigani 29 - Bibiliya Yera

¹ Ucyahwa kenshi agashinga ijosi, Azavunagurika atunguwe nta kizamukiza.

² Iyo abakiranutsi bagwiriye abantu barishima, Ariko iyo hategeka umunyabyaha abantu bacura imiborogo.

³ Ukunda ubwenge anezeza se, Ariko ubana n'abamaraya yiyaya ibintu bye.

⁴ Umwami akomeresha igihugu imanza zitabera, Ariko uhongesha aragitsinda.

⁵ Umuntu ushyeshya umuturanyi we, Aba asa nk'uteze amaguru ye ikigoyi.

⁶ Mu gicumuro cy'umunyabyaha harimo umutego ategewemo, Ariko umukiranutsi arishima akavuza impundu.

⁷ Umukiranutsi azi urubanza rw'abakene, Ariko umunyabyaha nta bwenge afite bwo kurumenya.

⁸ Abakobanyi bakongeza umudugudu imivurungano, Ariko abanyabwenge bahosha uburakari.

⁹ Umunyabwenge iyo agiye impaka n'umupfapfa, Naho yarakara cyangwa agaseka ntabwo zakoroha.

¹⁰ Abakunda kwicana banga intungane, Kandi n'umukiranutsi bashaka uko bamwica.

¹¹ Umupfapfa agaragaza uburakari bwe bwose, Ariko umunyabwenge arifata akabucubya.

¹² Iyo umutware yumviye amazimwe, Abagaragu be bose baba abanyabyaha.

¹³ Umukene n'urenganya amahuriro yabo ni amwe, Uwiteka ahwejesha amaso ya bombi.

¹⁴ Umwami ucira abakene imanza zitabera, Ingoma ye izakomera iteka ryose.

¹⁵ Umunyafu no gucyaha byigisha ubwenge, Ariko umwana bandaritse akoza nyina isoni.

¹⁶ Iyo abanyabyaha bagwiriye, Ibicumuro na byo biragwira, Ariko abakiranutsi bazabitegereza bahenebera.

¹⁷ Hana umwana wawe azakuruhura, Ndetse azanezeza umutima wawe.

¹⁸ Aho guhishurirwa kutari abantu bigira ibyigenge, Ariko ukomeza amategeko aba ahirwa.

¹⁹ Ikiretwa ntigihanishwa amagambo, N'iyo kiyumvise ntikiyitaho.

²⁰ Mbese wabonye umuntu uhuta amagambo? Bakwemera umupfapfa kumurutisha uwo.

²¹ Umugaragu warezwe neza uhereye mu bwana bwe, Hanyuma azabera shebuja umwana.

²² Umunyamujinya abyutsa intonganya, Kandi umuntu w'inkazi agwiza ibicumuro.

²³ Ubwibone bw'umuntu buzamucisha bugufi, Ariko uwicisha bugufi mu mutima azabona icyubahiro.

²⁴ Uwiyuzuza n'umujura aba yiyanga, Yumva uko arahizwa akanga kubivuga.

²⁵ Gutinya abantu kugusha mu mutego, Ariko uwiringira Uwiteka azaba amahoro.

²⁶ Benshi bashaka gutona ku mutware, Ariko Uwiteka ni we ucira abantu imanza.

²⁷ Ukiranirwa azirana n'abakiranutsi, Kandi ugenda ari intungane azirana n'abanyabyaha.