Imigani 26 - Bibiliya Yera

¹ Nk'uko urubura rwo mu cyi rudakwiriye, Haba n'imvura yo mu isarura, Ni ko kūbaha umupfapfa bidakwiriye.

² Nk'uko igishwi kijarajara, N'intashya uko iguruka, Ni ko n'umuvumo w'ubusa utagira uwo ufataho.

³ Ikibōko gikwiriye ifarashi, Icyuma mu kanwa gikwiriye indogobe, N'inkoni na yo ikwiriye ibitugu by'abapfapfa.

⁴ Ntusubize umupfapfa ibihwanye n'ubupfapfa bwe, Kugira ngo udasa na we.

⁵ Subiza umupfapfa ibikwiriye ubupfapfa bwe, Ye kwirata ko ari umunyabwenge.

⁶ Utuma umupfapfa, Aba yivunnye amaguru akaba yihaye gupfirwa.

⁷ Nk'uko amaguru y'ikimuga agenda ajegajega, Ni ko umugani umera mu kanwa k'umupfapfa.

⁸ Guha umupfapfa icyubahiro, Ni nko kujugunya isaho y'utubuyenge tw'igiciro kinini ku kirundo cy'amabuye.

⁹ Nk'uko ihwa rihanda mu kiganza cy'umusinzi, Ni ko umugani uciwe n'abapfapfa uvugwa.

¹⁰ Ugurira umupfapfa cyangwa umuhisi, Ameze nk'umurashi ukomeretsa abantu bose.

¹¹ Nk'uko imbwa isubira ku birutsi byayo, Ni ko umupfapfa asubira ku bupfapfa bwe.

¹² Mbese wabonye umuntu wiyogeza ko ari umunyabwenge? Wapfa kwemera umupfapfa kumurutisha uwo.

¹³ Umunyabute arahwaganya ati “Mu nzira hari intare, Ni ukuri iri mu nzira nyabagendwa.”

¹⁴ Nk'uko urugi ruhindukira ku mapata yarwo, Ni ko umunyabute agaragurika ku buriri bwe.

¹⁵ Umunyabute akora ku mbehe, Akananirwa kwitamika.

¹⁶ Umunyabute yibwira ko ari umunyabwenge, Kurusha abantu barindwi basubizanya impamvu.

¹⁷ Umugenzi urakazwa n'intonganya zitamwerekeyeho, Ameze nk'ufashe imbwa amatwi.

¹⁸ Nk'uko umusazi arasa imyambi iriho amafumba bikazana urupfu,

¹⁹ Ni ko umuntu ameze ushukisha umuturanyi we amashyengo, Ati “Nagukinishaga.”

²⁰ Iyo inkwi zibuze umuriro urashira, Aho inzimuzi zitari intonganya zirashira.

²¹ Nk'uko amakara acwekēra bakongeraho andi, Cyangwa inkwi zishyirwa ku muriro, Ni ko ukunda intonganya acana impaka.

²² Amagambo y'inzimuzi yongorerana aryohera amatwi, Kandi akuzura umutima.

²³ Ururimi ruvuga urukundo ruvanze n'umutima mubi, Ni nk'ikibindi gihomeshejwe inkamba z'ifeza.

²⁴ Uwangana ahorana amagambo ashukana, Ariko mu mutima we abitsemo uburyarya.

²⁵ Nagira imvugo nziza ntukamwizere, Kuko mu mutima we harimo ibizira birindwi.

²⁶ Naho urwango rwe yaruhisha ku buryarya, Ububi bwe buzagaragarira imbere y'iteraniro.

²⁷ Ucukura urwobo azarugwamo, Kandi uhirika ibuye rizamubirindukana.

²⁸ Ururimi rubeshya rwanga abo rwakomerekeje, Kandi akanwa gashyeshya kararimbura.