Imigani 25 - Bibiliya Yera

Iyindi migani ya Salomo

¹ Iyi na yo ni imigani ya Salomo yimuwe, yandikwa n'abagaragu ba Hezekiya umwami w'u Buyuda.

² Icyubahisha Imana ni uko ikinga ibintu, Ariko abami bo bubahishwa no kubigenzura.

³ Uko ijuru riri hejuru cyane n'isi igera ikuzimu, Ni ko n'imitima y'abami itamenyekana.

⁴ Kura inkamba mu ifeza, Maze hazavamo icyuma gihabwa umusennyi.

⁵ Kura abagome imbere y'umwami, Maze ingoma ye izakomezwa no gukiranuka.

⁶ Ntukibonabone imbere y'umwami, Kandi ntugahagarare mu mwanya w'abakomeye.

⁷ Kuko ibyiza ari uko wahamagarwa ngo “Ngwino witabe”, Biruta ko wasubizwayo imbere y'umwami murebana.

⁸ Ntukihutire kuburanya mugenzi wawe, Yagutsinda wakorwa n'isoni, Hanyuma ukabura uko ugira.

⁹ Ahubwo mwikiranure muri ukwanyu, Kandi ntukabitarange,

¹⁰ Kugira ngo ubyumva atazakugaya, Kandi umugayo wawe ukazaguhamaho.

¹¹ Ijambo ryizihiye rivuzwe mu gihe gikwiriye, Ni nk'amatunda y'izahabu ku mbehe y'ifeza.

¹² Gucyaha k'umunyabwenge gutunganira ubyumva, Nk'impeta y'izahabu cyangwa imitamirizo y'izahabu nziza.

¹³ Uko imbeho ya shelegi imera mu gihe cy'isarura, Ni ko intumwa idatenguha imerera abayitumye, Kuko inyura umutima wa ba shebuja.

¹⁴ Nk'uko imvura irimo umuyaga ikuba igapfa, Ni ko uwo muntu amera wishimiriza ibyo azatanga kandi abeshya.

¹⁵ Kwitonda ukarindīra byemeza umutware, Kandi ururimi rworoheje ruvuna igufwa.

¹⁶ Mbese ubonye ubuki? Uryeho ubuguhagije, Nturenze urugero kugira ngo utaburuka.

¹⁷ Ntugahoze ikirenge cyawe mu nzu y'umuturanyi, Kugira ngo ataguhararuka akakwanga.

¹⁸ Umuntu ushinja umuturanyi we ibinyoma, Ni nk'imangu n'inkota n'umwambi utyaye.

¹⁹ Kwizera umuhemu mu gihe cy'amakuba, Ni nk'iryinyo ricitse n'ikirenge gitanye.

²⁰ Udabagirira umuntu ubabaye mu mutima, Ameze nk'uwiyambika ubusa mu mbeho, Cyangwa nk'umushari wa vino usutswe ku munyu.

²¹ Umwanzi wawe nasonza umugaburire, Nagira inyota umuhe amazi yo kunywa,

²² Kuko uzaba urunze amakara yaka ku mutwe we, Kandi Uwiteka azakugororera.

²³ Umuyaga uva ikasikazi uzana imvura, Ni ko n'ururimi ruzimura rutera kwiraburirwa mu maso.

²⁴ Kuba mu gakinga k'urusenge, Biruta kubana n'umugore w'ingare mu nzu y'inyumba.

²⁵ Nk'uko amazi afutse amerera umutima waka, Ni ko n'inkuru nziza zimera zivuye mu gihugu cya kure.

²⁶ Umukiranutsi wiyoroshya imbere y'abanyabyaha, Ameze nk'iriba ritobamye n'isōko yandujwe.

²⁷ Si byiza kurya ubuki bwinshi, Kandi icyubahiro abantu bishakira si cyo cyubahiro nyakuri.

²⁸ Umuntu utitangīra mu mutima, Ameze nk'umudugudu usenyutse utagira inkike.