Imigani 24 - Bibiliya Yera

¹ Ntukagirire abantu babi ishyari, Kandi ntukifuze kubana na bo,

² Kuko imitima yabo itekereza kurenganya, Kandi ururimi rwabo ruvuga ibyo kugira nabi.

³ Ubwenge ni bwo bwubaka urugo, Kandi rukomezwa no kujijuka.

⁴ Kumenya ni ko kuzuza amazu yo muri rwo, Mo ibintu byose by'igiciro cyinshi n'iby'igikundiro.

⁵ Umunyabwenge arakomeye, Kandi ujijutse yunguka imbaraga.

⁶ Uzajye gusembura intambara ufite inama z'ubwenge, Aho abajyanama benshi bari haba amahoro.

⁷ Ubwenge burenga umupfapfa ntabushyikire, Iyo ari mu iteraniro ntabumbura umunwa.

⁸ Ugambirira gukora ibibi, Bamwita umugira nabi.

⁹ Imigambi y'ubupfapfa ni yo cyaha, Kandi umukobanyi ni umuziro mu bantu.

¹⁰ Nugamburura mu makuba, Gukomera kwawe kuba kubaye ubusa.

¹¹ Abajyanirwa gupfa ubarokore, Kandi abarindiriye kwicwa ntubazibukire.

¹² Nuvuga uti “Dore ntabwo twabimenye”, Ntuzi ko Igera imitima ari yo ibizi? Irinda ubugingo bwawe ni yo ibimenya, Mbese ntizagororera umuntu wese ibihwanye n'imirimo yakoze?

¹³ Mwana wanjye, jya urya ubuki kuko buryoha, Kandi ingabo zabwo ziryohera akanwa kawe.

¹⁴ Ni ko kumenya ubwenge bizamerera ubugingo bwawe, Nububona ni bwo n'ingororano zizaboneka, Kandi ibyiringiro byawe ntibizaba iby'ubusa.

¹⁵ Wa munyabyaha we, ntugace igico ku rugo rw'umukiranutsi, Ntugasahure ubuturo bwe,

¹⁶ Kuko umukiranutsi naho yagwa karindwi yakongera akabyuka, Ariko abanyabyaha bazagushwa n'amakuba.

¹⁷ Ntukishime umwanzi wawe aguye, Kandi ntukagire umutima unezezwa n'uko atsembwe,

¹⁸ Kugira ngo Uwiteka atabireba akababazwa na byo, Akirengagiza uburakari yamurakariye.

¹⁹ Ntugahagarikwe umutima n'inkozi z'ibibi, Ntukifuze iby'abanyabyaha,

²⁰ Kuko nta ngororano y'umuntu mubi, Urumuri rw'ukiranirwa ruzazima.

²¹ Mwana wanjye, wubahe Uwiteka n'umwami, Kandi ntukishyire mu by'abajya irya n'ino,

²² Kuko amakuba yabo azabatungura. Ni nde wamenya kurimbuka kwabo bose?

Iyindi migani y'abanyabwenge

²³ Ibi na byo ni imigani y'abanyabwenge: Kuba intinyamaso mu rubanza si byiza,

²⁴ Ukiza umunyabyaha ati “Ufite urubanza”, Azavumwa n'igihugu kandi amahanga azamwanga urunuka.

²⁵ Ariko abamucyaha bazagubwa neza, Kandi umugisha mwiza uzabazaho.

²⁶ Ushubije ibitunganye, Aba asomye ku munwa.

²⁷ Banza witegure ibyo ku gasozi, Uringanize imirima yawe, Hanyuma uzabone kūbaka inzu.

²⁸ Ntugashinje umuturanyi wawe nta mpamvu, Kandi ntugashukanishe ururimi rwawe.

²⁹ Ntukavuge uti “Ibyo yankoreye nzabimwitura, Mwiture ibihwanye n'imirimo yakoze.”

³⁰ Nanyuze ku murima w'umunyabute, No ku ruzabibu rw'umuntu ubuze ubwenge.

³¹ Nasanze hose ari amahwa, Hose ifurwe yarahazimagije, Kandi uruzitiro rwaho rw'amabuye rwarasenyutse.

³² Nuko ndebye mbyitegereza neza, Mbibonye mbikuramo gusobanukirwa.

³³ Uti “Henga nsinzire gato, Nihweture kanzinya, Kandi nipfunyapfunye nsinzire.”

³⁴ Uko ni ko ubukene buzagufata nk'umwambuzi, N'ubutindi bukagutera nk'ingabo.