Imigani 23 - Bibiliya Yera

¹ Igihe wicajwe no gusangira n'umutware, Ushyire umutima kuri uwo uri imbere yawe.

² Niba uzi yuko uri umunyandanini, Wifatira icyuma ku muhogo wawe.

³ Ntiwishinge ibyokurya bye biryoshye, Kuko bishukana.

⁴ Ntukarushywe no gushaka ubutunzi, Ihebere bwa bwenge bwawe.

⁵ Mbese wahanga amaso ku bitariho? Kuko ubutunzi butabura kwitera amababa, Bukaguruka nk'uko igisiga kirenga mu bushwi.

⁶ Ntukarye ibyokurya by'ufite ijisho ribi, Kandi ntukifuze ibyokurya bye biryoshye,

⁷ Kuko uko atekereza ku mutima ari ko ari. Yenda arakubwira ati “Ngwino ngufungurire”, Ariko umutima we ntabwo uba uhuje nawe.

⁸ Intore wamize uzayiruka, Kandi uzaba wapfushije ubusa amagambo yawe wamushimishije.

⁹ Ntukagire icyo uvuga umupfapfa akumva, Kuko azahinyura ubwenge bw'amagambo yawe.

¹⁰ Ntugashingure imbago zerekana imbibi za kera, Kandi ntukarengēre mu mirima y'impfubyi,

¹¹ Kuko Umurengezi wabo akomeye, Azakuburanya ababuranira.

¹² Hugurira umutima wawe kwigishwa, N'amatwi yawe ku magambo yo kumenya.

¹³ Ntukange guhana umwana, Kuko numukubita umunyafu atazapfa.

¹⁴ Uzamukubita umunyafu, Maze uzakiza ubugingo bwe kujya ikuzimu.

¹⁵ Mwana wanjye, umutima wawe nugira ubwenge, Uwanjye na wo uzanezerwa.

¹⁶ Ni ukuri umutima wanjye uzanezerwa, Nuvuga ibitunganye.

¹⁷ Ntugakundire umutima wawe kwifuza iby'abanyabyaha, Ahubwo uhore wubaha Uwiteka burinde bwira.

¹⁸ Kuko hariho ingororano koko, Kandi ibyiringiro byawe ntibizakurwaho.

¹⁹ Tega amatwi mwana wawe, ugire ubwenge, Kandi uyobore umutima wawe mu nzira nziza.

²⁰ Ntukabe mu iteraniro ry'abanywi b'inzoga, No mu ry'abanyandanini bagira amerwe y'inyama.

²¹ Kuko umusinzi n'umunyandanini bazakena, Kandi umunyabitotsi bizamwambika ubushwambagara.

²² Umvira so wakubyaye, Kandi ntugahinyure nyoko ageze mu za bukuru.

²³ Gura ukuri ntuguranure, Gura ubwenge no kwigishwa n'ubuhanga.

²⁴ Se w'umukiranutsi azishima cyane, Kandi ubyara umwana ufite ubwenge azamwishimira,

²⁵ So na nyoko bishime, Kandi utere nyoko wakubyaye kuvuza impundu.

²⁶ Mwana wanjye, mpa umutima wawe, Kandi amaso yawe yishimire inzira zanjye.

²⁷ Kuko umugore wa maraya ari uruhavu rurerure, Kandi umugore w'inzaduka ari urwobo rufunganye.

²⁸ Ni ukuri aca igico nk'umwambuzi, Kandi atuma hagwira abagambanyi mu bantu.

²⁹ Ni nde ubonye ishyano? Ni nde utaka? Ni nde ufite intonganya? Ni nde wiganyira? Ni nde ufite inguma zitagira impamvu? Ni nde utukuza amaso?

³⁰ Ni abarara inkera, N'abagenda bavumba inturire.

³¹ Ntukarebe vino uko itukura, Igihe ibirira mu gikombe, Ikamanuka neza.

³² Amaherezo iryana nk'inzoka, Igatema nk'impiri.

³³ Amaso yawe ukayahanga ku by'inzaduka, Kandi umutima wawe ukavuga ibigoramye.

³⁴ Ni ukuri ukazengerezwa nk'uryamye mu nyanja hagati, Cyangwa nk'umuntu uryamye hejuru y'umuringoti wo mu nkuge.

³⁵ Ukavuga uti “Bankubise nyamara nta cyo mbaye, Bampondaguye kandi sinumvise, Ndakanguka ryari ngo nongere njye kuvumba?”