Imigani 22 - Bibiliya Yera

¹ Kuvugwa neza biruta ubutunzi bwinshi, No gukundwa kuruta ifeza n'izahabu.

² Umutunzi n'umukene bahurira hamwe, Uwiteka ni we wabaremye bose.

³ Umunyamakenga iyo abonye ibibi bije arabyikinga, Ariko umuswa arakomeza akabijyamo akababazwa na byo.

⁴ Uwicisha bugufi, akūbaha Uwiteka, Ingororano ye ni ubukire n'icyubahiro n'ubugingo.

⁵ Amahwa n'imitego biri mu nzira y'ikigoryi, Urinda ubugingo bwe azanyura kure yabyo.

⁶ Menyereza umwana inzira akwiriye kunyuramo, Azarinda asaza atarayivamo.

⁷ Umukire ategeka umukene, Kandi uguza aba ari nk'umugaragu w'umugurije.

⁸ Ubiba gukiranirwa azasarura ishyano, Inkoni y'uburakari bwe izavunika.

⁹ Urebana ibambe azahirwa, Kuko agaburira umukene ibyokurya bye.

¹⁰ Irukana umukobanyi kandi intonganya zizajyana na we, Ndetse imivurungano no gukozwa isoni bizashira.

¹¹ Ukunda kugira umutima uboneye, Akagira imbabazi mu byo avuga, Umwami azaba incuti ye.

¹² Amaso y'Uwiteka arinda ufite ubwenge, Ariko atsembaho iby'abagambanyi.

¹³ Umunyabute arahwaganya ati “Hanze hari intare, nasohoka yanyicira mu nzira.”

¹⁴ Akanwa k'abagore b'inzaduka ni imva ndende, Uwo Uwiteka azinutswe azayigwamo.

¹⁵ Ubupfapfa buhambiriwe ku mutima w'umwana, Ariko inkoni ihana izabumucaho.

¹⁶ Uwishakira ubutunzi akarenganya abakene, Kandi uhongera abakire, Bombi bazakena nta kabuza.

Inama umunyabwenge atanga

¹⁷ Tega ugutwi wumve amagambo y'umunyabwenge, Kandi umutima wawe ushishikarire kumenya ubwenge bwanjye,

¹⁸ Kuko ari byiza nubikomeza mu mutima wawe, Bigahora mu kanwa kawe.

¹⁹ Nabikumenyesheje uyu munsi wowe ubwawe, Kugira ngo ibyiringiro byawe bibe ku Uwiteka.

²⁰ Mbese sinakwandikiye ibyiza by'inama n'ibyo kumenya,

²¹ Kugira ngo nkwemeze amagambo y'ukuri, Usubiraneyo ayo magambo ku bagutumye?

²² Ntukanyage umukene kuko ari umukene, Kandi ntukarenganye indushyi mu manza,

²³ Kuko Uwiteka azababuranira, Kandi ababarenganya azabanyaga ubugingo bwabo.

²⁴ Ntugacudike n'umunyamujinya, Kandi ntukagendane n'umunyaburakari,

²⁵ Kugira ngo utiga ingeso ze, Zikabera ubugingo bwawe umutego.

²⁶ Ntukabe mu bīshingirisha gukorana mu biganza, Cyangwa abīshingira abanyamyenda.

²⁷ Niba udafite ibyo kumwishyurira, Washaka ko agutwara uburiri waryamagaho?

²⁸ Ntugashingure imbago za kera, Izo ba sogokuruza bashinze.

²⁹ Hari umuntu w'umunyamwete mu byo akora ubonye? Bene uwo azaba imbere ku mwami, Ntazakorera abagufi.