Imigani 21 - Bibiliya Yera

¹ Umutima w'umwami uri mu kuboko k'Uwiteka, Awuganisha aho ashatse hose nk'uyobora amazi mu migende yayo.

² Inzira y'umuntu yose imutunganiye ubwe, Ariko Uwiteka ni we ugerageza imitima.

³ Gukiranuka n'imanza zitabera, Birutira Uwiteka ibitambo.

⁴ Kurebana igitsure n'umutima w'ubwibone, Ni byo rumuri rw'abanyabyaha, Byose ni icyaha.

⁵ Ibyo umunyamwete atekereza bizana ubukire, Ariko ubwira bwinshi bwiriza ubusa.

⁶ Ubutunzi bushakishwa ururimi rubeshya buyoka nk'umwuka, Ababushaka baba bashaka urupfu.

⁷ Urugomo rw'abanyabyaha ruzabahitana, Kuko banga gukora ibitunganye.

⁸ Inzira y'uremerewe n'ibyaha iragoramanga cyane, Ariko imirimo y'uboneye ihora itunganye.

⁹ Kuba mu gakinga k'urusenge, Biruta kubana n'umugore w'ingare mu nzu y'inyumba.

¹⁰ Umutima w'umunyabyaha wifuza ibyaha, Umuturanyi we ntabwo yabona ineza imuturukaho.

¹¹ Iyo umukobanyi ahanwe injiji yumviraho, Kandi umunyabwenge iyo yigishijwe ahabwa kumenya.

¹² Umukiranutsi yitegereza inzu y'abanyabyaha, Uko bubikwa bakarimbuka.

¹³ Uwica amatwi ngo atumva gutaka k'umukene, Na we azataka kandi ntazumvwa.

¹⁴ Ituro ritanzwe rwihishwa rihosha uburakari, N'impongano zihishwe mu kwaha zoroshya umujinya ukaze.

¹⁵ Umukiranutsi anezezwa no gukora ibitunganye, Ariko ku nkozi z'ibibi bizazibera icyishi.

¹⁶ Umuntu ujarajara akava mu nzira y'ubwenge, Azaba mu iteraniro ry'abapfuye.

¹⁷ Ukunda kuba inkorabishungo azaba umukene, Ukunda vino n'amavuta ya elayo ntabwo azaba umutunzi.

¹⁸ Umunyabyaha azaba incungu y'umukiranutsi, N'umugambanyi azagwa mu kigwi cy'intungane.

¹⁹ Kwibera ku gasozi kadatuwe, Kuruta kubana n'umugore w'umwaga utera intonganya.

²⁰ Mu rugo rw'umunyabwenge hari ubutunzi bw'igiciro cyinshi n'amavuta ya elayo, Ariko umupfapfa we abipfusha ubusa akabimaraho.

²¹ Ukurikiza gukiranuka n'imbabazi, Ni we uzabona ubugingo no gukiranuka n'icyubahiro.

²² Umunyabwenge yurira inkike z'umudugudu w'intwari, Kandi acogoza ibyiringiro byabakomezaga.

²³ Utabumbuye akanwa ke agafata ururimi rwe, Ni we urinda ubugingo bwe amakuba.

²⁴ Umwibone w'umunyakizizi yitwa umunyagasuzuguro, Akorana ubwirasi bwibona.

²⁵ Umunyabute yicwa no kwifuza, Kuko yanga gukoresha amaboko ye.

²⁶ Hariho uhorana uburūra umunsi ukira, Ariko umukiranutsi aratanga ntiyimane.

²⁷ Igitambo cy'umunyabyaha ni ikizira, Nkanswe noneho iyo agitanganye umutima mubi.

²⁸ Umugabo uhamya ibinyoma azarimburwa, Ariko umuntu wumva neza nta wuzamubuza kuvuga.

²⁹ Umunyabyaha ntagira imbebya ku maso ye, Ariko umuntu w'intungane atunganya inzira ze.

³⁰ Nta bwenge cyangwa ubuhanga cyangwa inama, Byabasha kurwanya Uwiteka.

³¹ Ifarashi irindirijwe umunsi w'urugamba, Ariko kunesha kuva ku Uwiteka.