Imigani 19 - Bibiliya Yera

¹ Umukene ugenda atunganye, Aruta ufite ururimi rugoreka kandi ari umupfapfa.

² Kubaho udafite ubwenge si byiza, Umuntu wihutira ibyo atazi ayoba inzira.

³ Ubupfapfa bw'umuntu bumuyobya inzira ye, Kandi umutima we winubira Uwiteka.

⁴ Ubutunzi bugwiza incuti, Ariko umukene we atandukana na mugenzi we.

⁵ Umugabo w'indarikwa ntazabura guhanwa, Kandi uvuga ibinyoma ntazabikira.

⁶ Benshi bavuga amagambo ashyeshya imbere y'umunyabuntu, Kandi umuntu wese akunda utanga.

⁷ Abavandimwe b'umukene bose baramwanga, Incuti ze zikarushaho kumwirengagiza, Iyo abaganirije baramuninira bakigendera.

⁸ Uwishakira ubwenge aba akunda ubugingo bwe, Ukomeza kwitonda azabona ibyiza.

⁹ Umugabo w'indarikwa ntazabura guhanwa, Kandi uvuga ibinyoma azapfa abizize.

¹⁰ Umupfapfa ntakwiriye ibinezeza, N'umugaragu ntakwiriye gutegeka ibikomangoma.

¹¹ Amakenga umuntu afite amubuza kwihutira kurakara, Kandi bimuha icyubahiro kwirengagiza inabi yagiriwe.

¹² Uburakari bw'umwami bumera nk'ubw'intare itontoma, Ariko ineza ye ni nk'ikime gitonze ku bwatsi.

¹³ Umwana upfapfana abera se ikirumbo, Kandi intonganya z'umugore ni nk'ibitonyanga bidatuza.

¹⁴ Urugo n'amatungo umuntu abiragwa n'ababyeyi be, Ariko umugore witonda amuhabwa n'Uwiteka.

¹⁵ Ubute butera gusinzira ubuticura, Kandi uwinaniwe arananuka.

¹⁶ Ukomeza amategeko aba arinda ubugingo bwe, Ariko utita ku nzira ze azapfa.

¹⁷ Ubabariye umukene aba agurije Uwiteka, Na we azamwishyurira ineza ye.

¹⁸ Hana umwana wawe ubwo ukimwiringiye, Ariko ntumuhanire kumwica.

¹⁹ Umunyamujinya mwinshi azabihanirwa, Kandi naho wabimukiza uzongera wihete.

²⁰ Emera inama kandi wumve icyo wigishijwe, Kugira ngo mu maherezo yawe uzabe uzi ubwenge.

²¹ Mu mutima w'umuntu habamo imigambi myinshi, Ariko inama y'Uwiteka ni yo ihoraho.

²² Ineza y'umuntu ni yo imutera gukundwa, Kandi umukene aruta umunyabinyoma.

²³ Kūbaha Uwiteka bitera ubugingo, Umwubashye azahora ahaze, Ntazagerwaho n'ibibi.

²⁴ Inyanda ishyira ukuboko ku mbehe, Ariko ntiyitamike.

²⁵ Kubita umukobanyi kandi abaswa baziga kwitonda, Bwiriza ujijutse na we azamenya ubwenge.

²⁶ Usesagura ibya se agasendesha nyina, Ni umwana ukoza isoni akaba n'igitutsi.

²⁷ Mwana wanjye, reka gupfa kumva ibyo ubwirizwa, Ngo wiyobagize amagambo y'ubwenge.

²⁸ Umuhamya utagira umumaro agayisha imanza zitabera, Kandi akanwa k'umunyabyaha karyohera ibibi kakabimira.

²⁹ Ibihano biringanirijwe abakobanyi, Kandi inkoni zitegekewe ibitugu by'abapfapfa.