Imigani 18 - Bibiliya Yera

¹ Uwitandukanya n'abandi aba ashaka ibyo ararikiye, Akanga ubwenge bwose butunganye afite ubukana.

² Umupfapfa ntanezezwa no kujijuka, Ahubwo anezezwa no kugaragaza ibiri mu mutima we.

³ Iyo hatungutse inkozi z'ibibi haba haje umugayo, Kandi ubushizi bw'isoni buzana n'igitutsi.

⁴ Amagambo yo mu kanwa k'umunyabwenge ni nk'amazi maremare, Kandi isōko y'ubwenge ni nk'akagezi gasūma.

⁵ Si byiza kwita ku cyubahiro cy'umunyabyaha mu rubanza, Kandi si byiza kwirengagiza urubanza rw'umukiranutsi.

⁶ Amagambo y'umupfapfa azana intonganya, Kandi ururimi rwe rusemera agasaya.

⁷ Akanwa k'umupfapfa ni ko kazamurimbura, Kandi ikigusha umutima we mu mutego ni ururimi rwe.

⁸ Amagambo y'inzimuzi aryohera amatwi, Aba nk'uturyohera umuntu asamuye tujya mu nda ye.

⁹ Ugira ubute ku murimo we, Aba ameze nk'umuvandimwe w'umurimbuzi.

¹⁰ Izina ry'Uwiteka ni umunara ukomeye, Umukiranutsi awuhungiramo, agakomera.

¹¹ Ubutunzi bw'umukire ni umudugudu we ukomeye, Kandi ibyo yibwira bimugota nk'inkike ndende zihomye.

¹² Kwishyira hejuru k'umutima kubanziriza kurimbuka, Kandi kwicisha bugufi kubanziriza guhabwa icyubahiro.

¹³ Usubiza bakimubwira, Bigaragaza ubupfu bwe n'ubushizi bw'isoni.

¹⁴ Umutima wihanganye ukomeza umuntu mu ndwara ye, Ariko umutima wihebye ni nde wawihanganira?

¹⁵ Umutima w'umunyamakenga uronka kumenya, Kandi ugutwi k'umunyabwenge ni cyo gushaka.

¹⁶ Amaturo y'umuntu amuhesha inzira, Akamugeza imbere y'abakomeye.

¹⁷ Mu rubanza ubanje kuvuga asa n'ukiranuka, Ariko uwo yaregaga iyo aje aramuhinyuza cyane.

¹⁸ Ubufindo bumara impaka, Kandi bukiranura abakomeye.

¹⁹ Umuntu ubabajwe n'uwo bava inda imwe, Kumugorora biraruhije biruta guhindūra umurwa ukomeye, Kandi intonganya zabo zimeze nk'ibyuma byugariye ibihome.

²⁰ Ururimi rwiza ni rwo ruhaza inda y'umuntu, Kandi amagambo meza yunguka ni yo amuhesha guhaga.

²¹ Ururimi ni rwo rwica kandi ni rwo rukiza, Abarukunda bazatungwa n'icyo ruzana.

²² Ubonye umugore mwiza aba abonye ikintu cyiza, Akaba agize umugisha ahawe n'Uwiteka.

²³ Umukene avuga yihonga, Ariko umukire asubizanya umwaga.

²⁴ Incuti nyinshi zisenya urugo, Ariko haba incuti iramba ku muntu, Imurutira umuvandimwe.