Imigani 17 - Bibiliya Yera

¹ Utwokurya dukakaye turimo amahoro, Turuta urugo rwuzuye ibyokurya, Ariko rufite intonganya.

² Umugaragu witonda azarera mwene shebuja ukora ibiteye isoni, Kandi azaragwa hamwe na bo.

³ Uruganda rutunganya ifeza n'itanura ritunganya izahabu, Ariko Uwiteka ni we ugerageza imitima.

⁴ Inkozi y'ibibi yumvira imvugo y'ibigoryi, Umunyabinyoma ategera amatwi ururimi rw'inkubaganyi.

⁵ Ushinyagurira umukene aba atuka Iyamuremye, Uwishimira ibyago by'abandi ntazabura guhanwa.

⁶ Abuzukuru ni ikamba ry'abasaza, Kandi ba se babera abana babo icyubahiro.

⁷ Imvugo itunganye ntiyizihira umupfapfa, Ariko cyane ururimi rubeshya ntirukwiriye imfura.

⁸ Uhabwa impongano yibwira ko afite ikintu cy'igiciro cyinshi, Aho ayerekewe hose abona ko imugiriye akamaro.

⁹ Uhishīra igicumuro aba ashaka urukundo, Ariko uhozaho urutoto atandukanya incuti z'amagara.

¹⁰ Gucyahwa kugera umunyabwenge ku mutima, Kuruta guhanisha umupfapfa inkoni ijana.

¹¹ Umuntu mubi ashaka ubugome gusa, Ni byo bizamuzanira intumwa y'inkazi.

¹² Guhura n'idubu ryibwe ibyana byaryo, Biruta guhura n'umupfu ku bupfu bwe.

¹³ Uwitura ibyiza ibibi, Ntabwo ibibi bizava mu rugo rwe.

¹⁴ Itangira ry'intonganya ni nk'ugomoroye amazi, Nuko reka impaka zitarabyara intonganya.

¹⁵ Uha urubanza ababi kandi utsindisha abakiranutsi, Bombi ni ikizira ku Uwiteka.

¹⁶ Impiya ziri mu ntoki z'umupfapfa zimaze iki? Zamugurira ubwenge kandi nta mutima agira?

¹⁷ Incuti zikundana ibihe byose, Kandi umuvandimwe avukira gukūra abandi mu makuba.

¹⁸ Umuntu ubuze ubwenge arahirira ubwishingire, Akishingira undi imbere y'umuturanyi we.

¹⁹ Ukunda intonganya aba akunze n'ibicumuro, Ushaka gusumbisha abandi urugo aba yishakiye kurimbuka.

²⁰ Ufite umutima unanirana nta byiza abona, Kandi uw'ururimi rugoreka azagwa mu makuba.

²¹ Ubyaye umupfapfa aba yiteye agahinda, Kandi se w'umupfapfa nta munezero agira.

²² Umutima unezerewe ni umuti mwiza, Ariko umutima ubabaye umutera konda.

²³ Umunyabyaha yakirira impongano zihishwe mu kwaha, Kugira ngo agoreke inzira z'imanza.

²⁴ Ubwenge buba hafi imbere y'ujijutse, Ariko umupfapfa ajya kubushakira ku mpera y'isi.

²⁵ Umwana upfapfana atera se agahinda, Kandi akabera nyina ikirumbo.

²⁶ Si byiza guca umukiranutsi igihano, Cyangwa gukubitira imfura gutunganya kwazo.

²⁷ Uwifata mu magambo ni umunyabwenge, Kandi ufite umutima witonze ni umuntu ujijutse.

²⁸ Ndetse n'umupfapfa iyo acecetse bagira ngo ni umunyabwenge, Kandi iyo abumbuye umunwa bamwita umunyamakenga.