Imigani 15 - Bibiliya Yera

¹ Gusubizanya ineza guhosha uburakari, Ariko ijambo ribabaza ribyutsa umujinya.

² Ururimi rw'abanyabwenge rugaragaza ubuhanga uko bikwiriye, Ariko akanwa k'abapfapfa gasesagura ubupfu.

³ Amaso y'Uwiteka aba hose, Yitegereza ababi n'abeza.

⁴ Ururimi rukiza ni igiti cy'ubugingo, Ariko urugoreka rukomeretsa umutima.

⁵ Umupfapfa ahinyura igihano se amuhana, Ariko uwemera gucyahwa ni we ugira amakenga.

⁶ Mu nzu y'umukiranutsi harimo ubutunzi bwinshi, Ariko indamu y'umunyabyaha ibamo ibyago.

⁷ Ururimi rw'umunyabwenge rwamamaza ubuhanga, Ariko umutima w'umupfapfa si ko ukora.

⁸ Igitambo cy'umunyabyaha ni ikizira ku Uwiteka, Ariko gusenga k'umukiranutsi kuramunezeza.

⁹ Inzira y'umunyabyaha ni ikizira ku Uwiteka, Ariko akunda ukurikira gukiranuka.

¹⁰ Umuntu wiyobagiza ahanishwa igihano kibabaza, Kandi uwanga gucyahwa azapfa.

¹¹ Ikuzimu no Kurimbuka biri imbere y'Uwiteka, Nkanswe ibiri mu mitima y'abantu.

¹² Umukobanyi ntakunda gucyahwa, Kandi ntagenderera abanyabwenge.

¹³ Umutima unezerewe ukesha mu maso, Ariko umutima ubabaye utera ubwihebe.

¹⁴ Umutima w'ujijutse ushaka ubwenge, Ariko akanwa k'abapfapfa gatungwa n'ubupfu.

¹⁵ Iminsi y'umunyamubabaro yose ni mibi, Ariko ufite umutima unezerewe ahora mu birori.

¹⁶ Uduke turimo kūbaha Uwiteka, Turuta ubutunzi bwinshi burimo impagarara.

¹⁷ Kugaburirwa imboga mu rukundo, Biruta ikimasa gishishe kigaburwa mu rwango.

¹⁸ Umunyamujinya abyutsa intonganya, Ariko utihutira kurakara arazihosha.

¹⁹ Inzira y'umunyabute imeze nk'uruzitiro rurimo amahwa, Ariko inzira y'umukiranutsi ni nyabagendwa.

²⁰ Umwana ufite ubwenge anezeza se, Ariko umupfapfa asuzugura nyina.

²¹ Ubupfapfa bunezeza ubuze ubwenge, Ariko umuntu witonda yibonereza inzira itunganye.

²² Aho inama itari imigambi ipfa ubusa, Ariko aho abajyanama benshi bari irakomezwa.

²³ Umuntu yishimira ibyo asubiza abandi, Ariko ijambo rivuzwe mu gihe gitunganye ko ari ryo ryiza!

²⁴ Ku munyabwenge inzira y'ubugingo irazamuka, Kugira ngo ave ikuzimu mu bapfuye.

²⁵ Uwiteka azasenya urugo rw'umwibone, Ariko azakomeza urubibi rw'umupfakazi.

²⁶ Imigambi mibi ni ikizira ku Uwiteka, Ariko amagambo anezeza aramutunganira.

²⁷ Urarikira indamu ateza urugo rwe imidugararo, Ariko uwanga impongano azarama.

²⁸ Umutima w'umukiranutsi utekereza icyo ari busubize, Ariko akanwa k'umunyabyaha gasesagura ibigambo.

²⁹ Uwiteka aba kure y'inkozi z'ibibi, Ariko yumva gusaba k'umukiranutsi.

³⁰ Amaso akeye anezeza umutima, Kandi inkuru nziza zikomeza intege.

³¹ Utegera ugutwi igihano kiyobora mu bugingo, Azaba mu banyabwenge.

³² Uwanga guhanwa ntiyita ku bugingo bwe, Ariko uwemera gucyahwa yunguka ubwenge.

³³ Kūbaha Uwiteka ni ko kwigisha ubwenge, Kandi kwicisha bugufi kubanziriza icyubahiro.