Imigani 14 - Bibiliya Yera

¹ Umugore w'umutima wese yubaka urugo, Ariko umupfu we ubwe ararusenya.

² Ugenda atunganye yubaha Uwiteka, Ariko ugoreka inzira ze aba amusuzuguye.

³ Akarimi k'umupfu w'umwibone gasemera umusaya, Ariko ururimi rw'abanyabwenge rurabakiza.

⁴ Urugo rutarimo inka rubamo isuku, Ariko intege z'inka zihinga zitera kunguka.

⁵ Umuhamya w'ukuri ntabeshya, Ariko umugabo w'indarikwa arabeshya.

⁶ Umukobanyi ashaka ubwenge ntabubone, Ariko kumenya kubangukira umunyabwenge.

⁷ Nusanga umupfapfa, Nta jambo ry'ubwenge uzamwumvana.

⁸ Ubwenge bw'umunyamakenga ni ukumenya inzira ye, Ariko ubupfu bw'abapfapfa ni ukuriganya.

⁹ Abapfapfa bahinyura igitambo cy'ibyaha, Ariko mu bakiranutsi ho hariho gushimwa n'Imana.

¹⁰ Umutima wiyiziho uwawo mubabaro, Kandi umunezero wawo nta mushyitsi wawujyamo.

¹¹ Urugo rw'umunyabyaha ruzasenywa, Ariko ihema ry'umukiranutsi rizakomera.

¹² Hariho inzira itunganiye umuntu, Ariko iherezo ryayo ni inzira z'urupfu.

¹³ Naho aseka mu mutima we harimo agahinda, Kandi amaherezo y'ibitwenge ni ugushavura.

¹⁴ Usubira inyuma mu mutima azahazwa n'ibyo akurikiye, Ariko umuntu mwiza azahazwa n'ibimuturukamo.

¹⁵ Umuswa yemera ikivuzwe cyose, Ariko umunyamakenga yitegereza aho anyura.

¹⁶ Umunyabwenge atinya ibibi ndetse akabihunga, Ariko umupfapfa agenda ari icyigenge, Akagira umutima udatinya.

¹⁷ Uwihutira kurakara azakora iby'ubupfu, Kandi uw'imigambi mibi baramwanga.

¹⁸ Abaswa baragwa ubupfu, Ariko ikamba ry'abanyamakenga ni ubuhanga.

¹⁹ Umubi yikubita hasi imbere y'umwiza, N'abanyabyaha bapfukama mu marembo y'abakiranutsi.

²⁰ Umukene arangwa ndetse n'abaturanyi be bakamubonerana, Ariko umukire agira incuti nyinshi.

²¹ Ugaya umuturanyi we aba akora icyaha, Ariko ugirira umukene imbabazi aba ahiriwe.

²² Mbese abagambirira ibibi ntibaba bayobye? Ariko abagambirira ibyiza bazabona imbabazi n'umurava.

²³ Umurimo wose utera inyungu, Ariko amazimwe y'ururimi atera ubukene agatubya.

²⁴ Ikamba ry'abanyabwenge ni ubutunzi bwabo, Ariko ubupfu bw'abapfapfa ni ubupfu gusa.

²⁵ Umuhamya w'ukuri akiza ubugingo bw'abantu, Ariko uvuga ibinyoma arashukana.

²⁶ Uwubaha Uwiteka afite ibyiringiro bikomeye, Kandi abana be bazabona ubuhungiro.

²⁷ Kūbaha Uwiteka ni isōko y'ubugingo, Bigatuma abantu batandukana n'imitego y'urupfu.

²⁸ Igihesha umwami icyubahiro ni uko aba afite abantu benshi cyane, Ariko iyo ababuze aba arimbutse.

²⁹ Utihutira kurakara aba afite ubwenge bwinshi, Ariko uwihutira kurakara akuza ubupfu.

³⁰ Umutima utuje ni wo bugingo bw'umubiri, Ariko ishyari ni nk'ikimungu kiri mu magufwa.

³¹ Urenganya umukene aba atuka Iyamuremye, Ariko ubabariye umutindi aba ayubashye.

³² Umunyabyaha anyitswa n'ibibi bye akora, Ariko umukiranutsi afite ubuhungiro ndetse no mu rupfu rwe.

³³ Ubwenge buba mu mutima w'ujijutse, Ariko ibiri mu mutima w'umupfapfa biramenyekana.

³⁴ Gukiranuka gushyira ubwoko hejuru, Ariko ibyaha bikoza isoni amoko yose.

³⁵ Ineza y'umwami ayigirira umugaragu ukorana ubwenge, Ariko umujinya we awugirira ukora ibiteye isoni.