Imigani 13 - Bibiliya Yera

¹ Umwana ufite ubwenge yemera icyo se amwigisha Ariko umukobanyi ntiyemera guhanwa.

² Umuntu azahazwa ibyiza n'imbuto zituruka mu kanwa ke, Ariko ubugingo bw'abagambana buzahazwa urugomo.

³ Ufashe ururimi rwe aba arinze ubugingo bwe, Ariko ubumbura akanwa ke azarimbuka.

⁴ Umutima w'umunyabute urifuza kandi nta cyo ari bubone, Ariko umutima w'umunyamwete uzahazwa.

⁵ Umukiranutsi yanga ibinyoma, Ariko umunyabyaha arigayisha kandi akikoza isoni.

⁶ Gukiranuka birinda ugenda atunganye mu nzira ze, Ariko gukiranirwa bigusha umunyabyaha.

⁷ Hariho uwigira umukire kandi nta cyo afite, Hariho uwigira umukene kandi ari umukire cyane.

⁸ Incungu y'ubugingo bw'umuntu ni ubutunzi bwe, Ariko umukene nta cyo akangishwa.

⁹ Umucyo w'umukiranutsi uranezeza, Ariko urumuri rw'umunyabyaha ruzazima.

¹⁰ Ubwibone butera intonganya gusa, Ariko ubwenge bufitwe n'abagirwa inama nziza.

¹¹ Ubutunzi bw'amahugu buzagabanuka, Ariko urundarunda ibintu avunika azunguka.

¹² Ubwiringiro burerezwe butera umutima kurwara, Ariko iyo icyifujwe kibonetse kiba igiti cy'ubugingo.

¹³ Uhinyura ijambo aba yizanira kurimbuka, Ariko uwumvira itegeko azagororerwa.

¹⁴ Kwigisha kw'abanyabwenge ni isōko y'ubugingo, Gutuma umuntu ava mu mitego y'urupfu.

¹⁵ Kumenya gutunganye gutera igikundiro, Ariko inzira z'abagambanyi zirarushya.

¹⁶ Umunyamakenga wese akorana ubwenge, Ariko umupfapfa agaragaza ubupfu bwe.

¹⁷ Intumwa mbi igwa mu kaga, Ariko intumwa idatenguha itera kugubwa neza.

¹⁸ Uwanga guhanwa bimutera ubukene kandi bikamukoza isoni, Ariko uwemera gucyahwa azakuzwa.

¹⁹ Ibyifuzwa iyo bibonetse binezeza umutima, Ariko abapfu bo ni ikizira kuri bo kureka ibibi.

²⁰ Ugendana n'abanyabwenge azaba umunyabwenge na we, Ariko mugenzi w'abapfu azabihanirwa.

²¹ Ibyago bikurikirana abanyabyaha, Ariko abakiranutsi bazagororerwa ibyiza.

²² Umuntu mwiza asiga umwandu uzagera ku buzukuru be, Kandi ubutunzi bw'abanyabyaha bubikiwe abakiranutsi.

²³ Imyaka myinshi iva mu mirima y'abakene, Ariko hari ikeneshejwe n'akarengane.

²⁴ Urinda umwana inkoni aba amwanze, Ariko ukunda umwana we amuhana hakiri kare.

²⁵ Umukiranutsi ararya agahaga, Ariko inda y'umunyabyaha izasonza.