Imigani 12 - Bibiliya Yera

¹ Ukunda guhugurwa aba akunda ubwenge, Ariko uwanga guhanwa aba asa n'inka.

² Umuntu mwiza azabona ihirwe ku Uwiteka, Ariko azatsinda ugambirira ibibi.

³ Nta muntu ukomezwa no gukora ibibi, Kandi umuzi w'umukiranutsi ntuzarandurwa.

⁴ Umugore w'ingeso nziza abera umugabo we ikamba, Ariko ukoza isoni ni nk'ikimungu kiri mu magufwa ye.

⁵ Ibyo umukiranutsi atekereza biratunganye, Ariko inama z'umunyabyaha ni uburiganya.

⁶ Amagambo umunyabyaha avuga ni ayo kubikīra kuvusha abantu amaraso, Ariko akanwa k'utunganye kazabarokora.

⁷ Abanyabyaha bazubikwa ntibazaba bakiriho, Ariko urugo rw'umukiranutsi ruzakomera.

⁸ Umuntu azashimirwa uko ubwenge bwe buri, Ariko ufite umutima ugoramye azagawa.

⁹ Umuntu woroheje ariko afite akagaragu, Aruta umwirasi utagira ikimutunga.

¹⁰ Umukiranutsi yita ku matungo ye, Ariko imbabazi z'umunyabyaha ni umwaga.

¹¹ Uhinga umurima we asanzuye azabona ibyokurya bimuhagije, Ariko ukurikirana ibitagira umumaro ntabwo agira umutima.

¹² Umunyabyaha yifuza gutungwa n'iminyago y'ababi, Ariko imizi y'umukiranutsi ituma yera imbuto.

¹³ Ururimi rucumura rubera umuntu mubi umutego, Ariko umukiranutsi azakira amakuba.

¹⁴ Imbuto z'ibituruka mu kanwa k'umuntu ni zo zimuhesha ibyiza, Kandi umuntu ahabwa ibihwanye n'imirimo y'amaboko ye.

¹⁵ Imirimo y'umupfu ihora imutunganira, Ariko umunyabwenge yemera kugirwa inama.

¹⁶ Uburakari bw'umupfapfa bugaragara vuba, Ariko umunyamakenga yirengagiza ibitutsi.

¹⁷ Uvuga iby'ukuri yerekana gukiranuka, Ariko umugabo w'indarikwa avuga ibinyoma.

¹⁸ Habaho uwihutira kuvuga amagambo yicana nk'inkota, Ariko ururimi rw'umunyabwenge rurakiza.

¹⁹ Ikivuzwe cy'ukuri kiraramba, Ariko iby'ururimi rubeshya bishira vuba.

²⁰ Uburiganya buba mu mitima y'abajya inama y'ibibi, Ariko abajya inama y'amahoro ibyabo ni umunezero.

²¹ Nta cyago kizaba ku mukiranutsi, Ariko abanyabyaha bazuzurwamo n'ibibi.

²² Ururimi rubeshya ni ikizira ku Uwiteka, ahubwo anezezwa n'abakora iby'ukuri.

²³ Umunyamakenga abumbatira ubwenge bwe, Ariko umutima w'abapfapfa wamamaza ubupfu bwabo.

²⁴ Ukuboko k'umunyamwete kuzatwara, Ariko ukuboko k'umunyabute kuzakoreshwa uburetwa.

²⁵ Amaganya yo mu mutima atera umuntu akiyumviro, Ariko ijambo ryiza risusurutsa uwo umutima.

²⁶ Umukiranutsi ayobora umuturanyi we, Ariko inzira y'abanyabyaha irabayobya.

²⁷ Umunyabute ntahigura umuhigo we, Ariko umwete w'umuntu umugirira akamaro kanini.

²⁸ Mu nzira yo gukiranuka hari ubugingo, No mu mayira yako nta rupfu rubamo.