Yɨvɨru 1 - Yipma

Gamɨre Gawaalɨvaangei dakevɨ Gotɨyai nedake'nesɨ.

¹ Kɨgaakuna kwala naangegaa' Gotɨyai gamɨnyɨ wɨ'nawɨjɨwaakyaraavɨ sɨmunya pɨnɨnna pɨrɨ' wɨdɨna, pɨnɨnna pɨrɨ' wɨdɨna. Yɨ sara kujaa' sahwara nemɨre Ne sɨnnawɨnyaraavɨ sɨmunya nabinabinya pɨbura wɨjaasara kwalaalyare.

² Kɨrɨ' nabaai dahaa' aayagasa Gotɨyai yagaala nedake' gamɨre Gawaalɨvaangei nedakesɨ. Sahwarɨ Ganɨmaangere yuya maarya'nerɨ Gotɨyai mena dahɨlakakelyɨ. Nabaai Gawaalɨvaanga sahwarɨ Kwaaka dasɨ sɨgunya kɨrɨsɨ Gotɨyai yavɨkaryaakengɨ.

³ Gawaalɨvaangei sahwai Gotɨyare byaanna dɨragɨnya' lɨvamwaja naangelyɨ. Yɨ nemɨnyɨ Baaka naanga nemwadadelyɨ. Sahwai Gotɨyarɨ avaaina nebulya'nanyalyɨ. Gamɨre yagaala dɨragɨnya kɨnɨnnake' dada yuyangɨ dɨragɨnya yɨvaimwada yuya sarengɨ lɨmwaga'delyɨ. Kayaa'nanyangɨne tɨvɨkɨsa duimwagasɨta ya'ne' sahwai wawɨnya yunebanna yɨ'mwannaka Kingɨya Naangei munya ke'beva mwaalɨkere aangasɨmagɨ dɨragɨnnakeba mwaala'.

Gotɨyare Gawaalɨvaangei ejelɨyara mamaayaraavɨ wavɨlavɨkerɨnesɨ.

⁴ Gawaalɨvaangei Ganɨmaangerɨ yaya tewaanya nawɨ'nyaange' mena maarake' yɨ mamaayaraavɨre yayavɨ wavɨlavakabaaibɨ' yɨ sasare sahɨrɨvɨ gamɨ sai mamaayaraavɨna naanga nebulya'na yɨma'nakelyɨ. Yɨ sahwara sarɨ kwaakewɨ wɨla'nakasalyɨ.

⁵ Sare' darevɨnyɨ. Sɨnnawɨ sagaa' Gotɨyai mamaayarajɨya aane pwai kwarɨ dara muja' “Gɨmɨ nɨmɨnyɨ nyɨbwaalɨvaangeigɨnyɨra. Dahaa' gɨmaamaangeinyɨ gɨmwaaihɨweigɨnyɨ.” Kɨrɨ' Gawaalɨvaangerɨ sara wɨda'. Yɨ sahwai mamaayarɨna ayahi muja' “Gamɨnyɨ ganɨmaangeinyɨ yɨma'nɨdeinyɨ. Nɨmɨnyɨ nyɨbwaalɨvaangei yɨma'nadelyɨ.”

⁶ Kɨrɨ' Kwaakevakɨ mwaalyaraayawɨnna sahwai gamɨre aaya mudɨkaimɨraayarɨ makwalaabakegaa' sarei da' “Mamaaya yuya Gotɨyainyɨrera sahwarɨ yɨlaaya nayaa maripɨka!”

⁷ Nabaai sahwai mamaayaraavɨna dara wɨda' “Gamɨre mamaayaraavɨ yɨhusa'bɨsaraavɨ wɨmwaaihadere. Gamɨre wɨdaayadɨvɨsaraavɨ dɨtaalɨsa'bɨsaraavɨ wɨmwaaihadere.”

⁸ Kɨrɨ' Gawaalɨvaangerɨna dara wɨda' “Gotɨyaigɨ, yuyagaa' yuyagaa'ne kingɨnamwaalyɨsavɨ dɨmaremwaaideigɨnyɨ. Gɨmɨre a'mweraavɨ kingɨyɨsarɨsɨ yɨda'nanyabwina yawɨbwaramaremwaaidɨnyaigɨnyɨ.

⁹ Gɨmɨnyɨ yɨda'maraanga sabwina tewaanya gɨvu'nadeigɨnyɨ. Kɨwɨnyangɨ galazekɨvalyabwina sɨmɨlɨka gwimwaalɨkeigɨnyɨ. Mɨdɨnagɨnyavɨdaa'nyɨ Gotɨyainyɨ gɨmɨre Gotɨyainyɨ yɨlewelivananya' gɨthɨngeigɨnyɨ. Yɨ welivananya daza' gɨmɨnyɨ yɨlaaya gihalakeigɨnyɨ. Ja'mwera yɨvanɨgɨnyabaaibɨ' yɨlaaya yɨvanɨgatara mɨ'.”

¹⁰ Nabaai Gawaalɨvaangerɨna dara wɨda' “Naangeigɨ sɨnnawɨ Kwaaka datha' wakyeigɨnyɨ. Nabaai sɨgunya' gɨnnya asɨraalyɨ yavɨkaryeigɨnyɨ.

¹¹ Yuyawaai yɨnahu kayaaka yɨnyɨna yadewaalyɨ. Kɨrɨ' gɨmɨ aawa. Yuyagaa' mwaaidɨnyaigɨnyɨ. Yuyawaalyɨ yuya pɨnɨjɨ aya yɨma'nadengɨ. Baazɨ'ma'nya pɨrɨ' aya yɨma'nadevaaibɨsangɨ.

¹² Yɨ yɨvɨta aya' gɨ'mwagakɨna yadevaaibɨ' Gɨmɨ yuya sangɨ dɨhɨ'mwagakɨdeigɨnyɨ. A'mwei baazɨ'ma'nya yadaihamaa'na yadevaaibɨ' Gɨmɨ yuya sangɨ yadaihamaata jɨthengɨ. Kɨrɨ' gɨmɨ yuna sana dɨmwaaideigɨnyɨ. Gɨmɨre kwaramegasa mi'na yɨwawade mɨ'.”

¹³ Pɨgaa' kɨgaa' Gotɨyai mamaaya darajɨya bewarɨ wɨdakelaka! Aawa. Gawaalɨvaangerɨna dara dɨnɨ' “Gɨmɨ nɨmɨre aangasɨrɨ dɨragɨnyaba dɨmwaala! Gɨmɨnyɨ dalaangewɨ wɨla'narya'negaa'na yɨkamaangeraavɨ gwakɨdehaa'nanyɨ.”

¹⁴ Aawa. Mamaayara yɨ sahwara kuryarera. Yɨ kurya sahwara Gotɨyarɨ wɨdaayadɨvɨsare. Gotɨyai a'mwera gamɨre yuna padaihasamaarya'neraavɨna gaimwagya'ne mamaayaraavɨ maryaasadere.