Taaitazai 1 - Yipma

¹ Taaitazai, Polɨnyɨ pɨkarya da' yɨda'manɨgeinyɨ. Gotɨyare yaasɨwa'wawɨnyainyɨ, Jizaazai Kɨraazɨtɨyai Nyɨdaasadeinyɨ Apozelɨyainyɨ mwaaihe. Gotɨyai yune gamɨnne dahɨlakake a'mwera kwalaalyara Kɨraazɨtɨyarɨ lɨmwagya'neraavɨna nyɨmaryaasadeinyɨ. Nabaai Gotɨyarebwi mɨdɨbɨ'devɨna yagaala nebulya' yawɨramaarya'nevɨnajɨ gaimwanga ya'neinyɨ nyɨmaryaasadeinyɨ.

² Yuyagaa' yuyagaa'ne gaalyabwina sahwara yɨlaaya yadɨvɨ' yemwaaibɨ'de'na wɨgaimwadɨnyainyɨ. Sɨnnawɨ kɨgaakuna Gotɨyai Kwaakeva' mwakyaakegaa' gaala daza' nemɨnyɨ wɨjaaya'na yune naanga nebulya'na mena wɨjaakelyɨ. Sai kwaasɨya dadei mɨ'. Sa' yanga nejaavadelyɨ.

³ Nabaai dɨvi, dazagaa' gamɨ sai dahɨlakajahaa' gaala dazavɨne yagaalya' ku'maayaba yɨma'naabakesɨ. Yɨ yagaala sa' a'mwera wɨjɨwaakya'neraavɨ wɨdakesɨ. Sahwai nemɨnyɨne padaihasamaasai Gotɨyai kɨwɨnya dakaka yagaala sa' lɨmwagarawɨjɨwaakya'neinyɨna nyɨjaavadelyɨ.

⁴ Taaitazaigɨ, gɨmɨnyɨ kagɨzɨwaake nɨmɨ Naangerɨ lɨmwagarebaaibɨ' gɨmɨ lɨmwagaragɨ. Sare' nɨmɨre kaimɨraaya tewaanyaigɨ yɨma'nagɨ. Yɨ sasareigɨnyɨ Gotɨyai Nenɨmaangelyɨ Kɨraazɨtɨyai Jizaazai nemɨre nevadaihasamaa'delyɨ yanga gaimwange'na gyakɨlyɨ gɨmɨnyɨ kwaamu'nanyabwi tewaanya gwakika!

Ahu'manna Kɨritɨ Taaitazare wawɨnyavɨnesɨ.

⁵ Ahu'manna Kɨritɨ kuna mwaaidɨnyaigɨnyɨ gyahalya'maveigɨnyɨ “Wawɨnya pɨnɨ nɨmɨ myengɨ ja! Nabaai anga gazabazaba Naangerɨ lɨmwadɨvɨsaraavɨ maremwaala'ne a'mwe naanga pwaraavɨ dakya!” dena sɨnnawɨ gɨthevaaibɨ' jɨtheigɨnyɨ.

⁶ Dara gɨthe. A'mwe pwai a'mweraavɨre tɨnnyarɨ yɨwetawakya pɨnɨ myaderɨ wangana'gɨzɨ sai a'mwe yune gave pɨrɨ'nanyarɨ nabaai gamɨre kaimɨraaya kɨmɨlɨkajɨ Kɨraazɨtɨyarɨ lɨmwaga'dɨvɨsamɨlɨkaavɨ, kayaa'nanya sabwi ya'na yagaala pɨnɨ maayamɨlɨkaavɨ, kuvɨnɨmaangeyuraavɨ galazekɨvala myadɨvɨsamɨlɨkaavɨ, yɨ a'mwe sasare dazarɨ maremwaala'nerɨ dɨthahɨlakɨdeigɨnyɨ.

⁷ Sare' darevɨnyɨ. Gotɨyare wawɨnyavɨ maremwaala ya'ne mwaalɨkabaaibɨ' Naangereraavɨ maremwaaidei nayaa yɨda'na yamaryadelyɨ. Sara yadaawori a'mwera yɨwetawakya pɨrɨ' kɨrɨvɨ mabɨramaari yɨpɨ'delyɨ. Sarei mwaalana! Sai pihadɨka mi yadelyɨ. Sai sɨnna tɨka yarai mudayɨ yadelyɨ. Sai biyaaya nada yɨmaka widei mɨ'. Sarei mwaalana! Sai a'mweraavɨ mala yaasɨwa'na maramamaryadelyɨ. Sai nɨgwia gɨlyɨvɨta kwalaalyanna tɨganaarya myadelyɨ.

⁸ Aawa. Sai a'mwe anga pɨbadaa'nyɨ angyɨrɨ'maakaanya bɨpɨjaraavɨ maa'da nayaa maremwaaidelyɨ. Sai yuya tewaanya nawɨ'nya sabwina yada sɨmunya yune nawɨ'nyaburɨna mɨdɨnadelyɨ. Sai nayaa yɨda'na nebwina mwaaida Gotɨyare yuya sabwi mɨdɨnadelyɨ. Gɨrɨka maayalyɨ. Sai nabaai gannya sabwina nayaa maremwaainadelyɨ.

⁹ Sai yagaala nebula tewaanya' gamɨnyɨ wɨjɨwaakɨnɨke' nayaa dɨragɨnna lɨmwaga'delyɨ. Gotɨyai “Sai a'mweraavɨ wɨjɨwaakya yagaala maamɨdaryavɨna yɨvaimwagannei mwaalana! Sara yada a'mwe yagaalya galazekɨvaidɨvɨsaraavɨ dɨragɨnna yɨnɨga wɨdannei mwaalana!” kada' yagaala sa' lɨmwaga'delyɨ.

Kɨritɨ saba a'mwe kwaasɨya kwalaalyara mwaaihasaraavɨnesɨ.

¹⁰ Sare' darevɨnyɨ. A'mwe kwalaalyara yagaala tewaamaraange galazekɨvaidɨvɨsara mwaaiha'. Sahwara yagaala yaasɨwa'na dadɨvɨ' a'mweraavɨre sɨmunyangɨna kwaasɨ wɨdadɨvɨsare. A'mwe kwalaalya sasarera “Kɨlaaka gurya dɨtha'nyɨla!” dadɨvɨsare Juyara.

¹¹ A'mwe sasarera “A'mweraavɨre nɨgwia mwagi'nya'neina sasarebura wɨjɨwɨryaana!” yawɨ'dɨvɨsara nemɨ myaanne sabwina nɨgwia wagɨla wɨjaaya'nenna wɨjɨwɨryadɨvɨsare. Sasare sabwi pwaraavɨre sɨmunyangɨ mwagi'nadaapi jɨlɨkaimɨraaya yuyangɨre kwaamu'nanyabwi yɨwɨna yɨvanɨkere. A'mwe sasare saraavɨre maangengɨ bɨpaibɨka!

¹² Ahu'manna Kɨritɨ mwaaida'gɨzɨyaba mwaalyai dazahɨbadaa'nyai sɨdu'naka akwai sɨnnawɨ kɨgaa' gamɨreraavɨna dara dɨna “A'mwe Ahu'manna Kɨritɨ mwaalyara yuyagaa' kwaasɨyabwina dadɨvɨsarera. Malakayaawarya kayaa'nanyare. Sahwara tɨka kwalaalya nadɨvɨ' wana maa'na widere.”

¹³ Jalɨkurakya daza' nebulyasɨ. Sarevɨdaa'nyɨ “Kumɨre dɨragɨnna lɨmwangeburɨ maamɨdaryara mwaaibɨka!” da'gɨzɨ sahwaraavɨ maanga dɨragɨnna duthana!

¹⁴ Nabaai sahwara Juyaraavɨre wajɨngyagaalyajɨ a'mwe yagaala nebulya' bule'na wɨjaavadɨvɨsaraavɨre yagaaikɨwɨnya dala pɨnɨnna pɨnɨnnanyajɨ kadɨki' wakamaremwaala nyɨpɨka!

¹⁵ A'mwe Gotɨyai sɨmunyavɨ nawɨ'nyabwi yavada'galawakakera nawɨ'nyabwi kɨnɨnnakeraavɨna yuya sa tewaanya gɨrɨka maayangɨ. Kɨrɨ' nabaai a'mweraavɨre sɨmunyangɨ sɨmunya gɨrɨkita'nanyabwi kɨnɨnnakera “Kɨraazɨtɨyai yuya sa kɨmaakɨya dakɨnɨkebwi wasɨ'nakebulyɨ,” myawɨralɨmwagyadɨvɨsaraavɨna tewaanya aane pɨnɨ kɨnɨ mi. Aawa. Kumɨre sɨmunyasɨ sɨmunya padaihɨrakyalyɨ yuyawaai yuna gɨrɨkita'nanyawaalyɨ.

¹⁶ Kumɨre maangengɨdaa'nyɨ ku'maayaba dara dadɨvɨsare “Nɨmɨ Gotɨyarɨna yawɨ'dɨnyainyɨra.” Kɨrɨ' kumɨre yamaryabwina Gotɨyarɨna bule'na wɨjaavadɨvɨsare. Sare sabwina Gotɨyarɨ yuna maa'na wima'nadelyɨ. A'mwe yagaala nawɨ'nya' galazekɨvaidɨvɨsare. Nabaai wawɨnya tewaanya ya yuya ya'nera yɨnɨga wi'na yɨpɨnera mɨ'. Gotɨyai sahwaraavɨ yawɨramaaradera mɨ'.