Romɨ 6 - Yipma

Kayaa'nanyaburɨne dɨragɨnyavɨna baidaa Kɨraazɨtɨyarɨ gaala mwaaiho'nesɨ.

¹ Sarevɨdaa'nyɨ nemɨ be yagaala daathevaka? “ ‘Gotɨyare yanga gaimwanga tewaanya' naangaanga yɨma'nana!’ dawaajɨ nemɨ kayaa'nanyabwi kuna yaade'nanyɨ,” daathe' daaka!

² Arɨkewɨnyɨra! Nemɨ Kɨraazɨtɨyarɨ lɨmwagona kayaa'nanya saburɨne dɨragɨnyavɨna baloina navɨka myawɨryadaa pɨzɨ'gwa sareburɨ kuna gatha'dara mwalaadeinaavaka!

³ Dara myawɨranganyadɨvɨtaihi daa! Kɨraazɨtɨyai Jizaazarɨ bavɨtaazɨya mena neyeta saina, sahwalyɨ mena ye'mwannayɨrakuro saina yɨ sasare sabwi yuyaina bavɨtaazɨya ma'daa gamɨre balyabwi mena yɨrakuroinera.

⁴ Sarevɨdaa'nyɨ bavɨtaazɨyavɨ nemɨ gamɨjɨ ye'mwannabaidaa yɨ Kɨraazɨtɨyarɨjɨ ye'mwannayɨrakuralɨkirakya neya'. Nɨmware byaanna dɨragɨnyasɨ kavi'nɨnnyavɨ Kɨraazɨtɨyarɨ yɨdɨkaavakabaaibɨ' “Gaala mudɨkevɨ kaanya yamaryɨpɨka!” daka neye'mwannayɨrakuraneyɨdɨkaavakeinera.

⁵ Sare' dare'nesɨ. Nemɨ gamɨjɨ yɨraku'daa gamɨ balakabaaibɨ' ye'mwannayɨrakurabaloina yɨ nabaai gamɨnyɨ yɨdɨkaavakabaaibɨ' nebwina neyɨdɨkaavadeinera.

⁶ Sare' nemɨ dara yawɨ'manɨgo. Gotɨyai nemɨnyɨna “Kumɨre kɨlaakejɨkɨ kayaa'nanyabure dɨragɨnya' kayaaka yɨwawana!” kada' nemɨre sɨmunya aya yawaka sa' yɨsavɨri Jizaazarɨ tamesalyɨ ye'mwannabalakesɨ. Sarevɨ yɨ nemɨ kayaa'nanyabure wɨdayadaanyaina ayahi mamwalaanne'nanyɨ. Kayaa'nanyaburɨne dɨragɨnya' ayahi manemaremwaalanne'nanyɨ.

⁷ Sare' dare'nesɨ. A'mwei mena balojɨyai kayaa'nanyabwi mamuwɨ'ma'nyɨ yadelyɨ. (Kɨraazɨtɨyarɨ lɨmwagabalojɨyarɨ kayaa'nanyabwi ayɨna mamaremwaalyɨ yannelyɨ).

⁸ Yɨ nemɨ kayaa'nanyaburɨna Kɨraazɨtɨyalyɨ mena yɨraku'na, baloina mwalaajaina dara yawɨralɨmwadaanyainera “Nemɨ gamɨ kwalyɨ gaala yɨraku'na, mwalaadeine.”

⁹ Sare' nemɨ dara yawɨ'manɨgo. Kɨraazɨtɨyarɨ bainɨkeraayawɨ mena yɨdɨkaavakei ayahi mabalyɨ yadelyɨ. Gamɨnyɨna balya' dɨragɨnya maayasɨ. Ayahi galavɨlavadei mɨ'. Gamɨnyɨ maremwaaladei mɨ'.

¹⁰ Sare' dare'nesɨ. Sahwai balakevɨ nemɨre kayaa'nanyabwine'na gave pɨgaa' mena yune'na balakelyɨ. Yɨ balya dazavɨ gamɨ kayaa'nanyabure dɨragɨnyavɨ kayaaka yɨgalakelyɨ. Nabaai gaala mwaalɨkevɨ, Gotɨyarɨne yaya' munyaba makɨlya'nei gaala mwaaidelyɨ.

¹¹ Sarebaaibɨ' sarɨmɨ kwaihi sarɨmɨnyɨne'na nayaa dara jawɨrila! “Kayaa'nanyabure dɨragɨnyavɨna nemɨ bainɨkeinera. Dɨragɨnya savɨ kwaakewɨ mula'naraanneine. Aawa. Kɨraazɨtɨyai Jizaazarɨ wɨlamwaidaa Gotɨyarɨne yaya' munyaba makɨlya'neina gaala mwalaadeine.”

¹² Sarevɨdaa'nyɨ sarɨmɨre sɨmunyavɨ kayaa'nanyabwi mɨdɨnya'neihi kayaa'nanya sabwi sarɨmɨre kɨlaakejɨ' baladezɨ' mamareyɨhɨmwaalanna! Kayaa'nanya sabwi nayɨhimwagi'nadɨka!

¹³ Nabaai sarɨmɨre kɨlaaka yuyajɨkɨya sa kayaa'nanya saburɨna wana kayaa'na ya'ne sangɨ kuna mujaavɨpɨna! Aawa. Sarɨmɨre kɨlaaka yuyajɨkɨya sa yɨda'maraanga saburɨna wana nawɨ'nya ya'ne sangɨ duzaavɨnyɨla! Yɨ mena bainɨkeihi kuna mamwaalyeva ayɨna gaala mwaaihasarabɨsaihi Gotɨyarɨna sarɨmɨnyɨ nayaa duzaavɨnyɨla!

¹⁴ Sare' dare'nesɨ. Kayaa'nanyabwi sarɨmɨre naangebwi mwaranna! Ayahi mamareyɨhɨmwaalannera! Sare' dare'nesɨ. Dahaa' sarɨmɨ Kɨwɨnyaburɨ kwaakewɨ mamwaalyɨga'. Aawa. Sarɨmɨ Gotɨyare yanga gaimwanga tewaanyaburɨ kwaakewɨ mwaaiha'.

Nemɨ yɨda'maraangeburɨne wɨdayadaanyaina mwaaiho'nesɨ.

¹⁵ Sarevɨdaa'nyɨ gara yaanneka? Nemɨ Kɨwɨnyaburɨ kwaakewɨ mamwaalyɨgo. Aawa. Gotɨyarɨ yanga gaimwanga tewaanyaburɨ kwaakewɨ mwaaiho. Yɨ sare'na kayaa'nanyabwi yaadeina dɨngaka! Arɨkewɨnyɨ.

¹⁶ Sare' dara myawɨrijɨvanɨgava! Sarɨmɨnyɨ a'mwe pware yagaalya' mɨdɨnya'neihi yaasɨwa'wawɨnya'neihi wɨjaavɨnapɨjɨ yɨ sahwarɨ mɨdɨbɨzaihi sahware yaasɨwa'wawɨnyaihi dɨmwaalyideihɨlyɨ. Kayaa'nanya sabwi mɨdɨbɨzaihi sahɨrɨvɨ balyabwi yuna naanga dɨmaaryideihɨlyɨ. Gotɨyarɨ mɨdɨbɨzaihi sahɨrɨvɨ “Yɨda'maraangeigɨ nɨmɨreigɨnyɨ,” wɨja' dɨmaaryideihɨlyɨ.

¹⁷ “Su! Su!” Gotɨyarɨ dare'na wɨdaana! Sɨnnawɨ sarɨmɨ kayaa'nanyabure yaasɨwa'wawɨnyaihi mwaalesaihɨlyɨ. Kayaa'nanyaburɨne dɨragɨnya' yɨhɨmaremwaalakeihɨlyɨ. Kɨrɨ' yagaala nebulya' yɨhɨzɨwaakesa' sarɨnnya sɨmunyavɨ wakadɨvɨsavɨ nayaa pada'galamɨdɨdɨvɨkɨ.

¹⁸ Gotɨyai kayaa'nanyaburɨne kalavuzɨwawɨnya sabwi yɨhyarasɨ'naka “Yɨda'maraanga sabure kalavuzɨwawɨnyavɨ wɨdaayadɨvɨsaihi dɨmwaalyɨla!” yɨhɨthakeihɨlyɨ.

¹⁹ A'mweihɨre sɨduta yawɨta sabwi dɨragɨnya nayaa myasɨ. Sarɨmɨ Gotɨyare yawɨta yarai myawɨranganyaihi mɨ'. Sarevɨna a'mweinaavɨre kunya yawɨta sabwi mɨdɨdɨ yaasɨwa'wawɨnyaraavɨreburɨne ke'ba'nanya' yɨhɨthɨwesɨ. Sare' dare'nesɨ. Sɨnnawɨ sarɨmɨre kɨlaakejɨkɨya sa kɨwɨnya galazekɨvala yɨma'nya'neihi gɨrɨkita'nanya saburajɨ kɨwɨnya galazekɨvala saburajɨ saburɨne yaasɨwa'wawɨnyajɨka wakesaihɨlyɨ. Yɨ dahaa' sarɨmɨre kɨlaakejɨkɨya sa tewaanya nawɨ'nyaanga yɨma'nya'neihi Gotɨyareihi, yɨda'maraangeburɨne yaasɨwa'wawɨnyajɨka nayaa dakyɨla!

²⁰ Sare' dare'nesɨ. Kayaa'nanyabure yaasɨwa'wawɨnyaihi mwaalesagaa' yɨda'maraangeburɨne yaasɨwa'wawɨnyaihi mamwaalyesaihɨlyɨ.

²¹ Sarevɨdaa'nyɨ kayaa'na yesagaa' sarɨmɨ yɨsɨlya'bɨ' berɨ' maaretavaka! Dahaa' yeta sa' yawɨreva wagɨla yɨhɨvwa'nɨvanɨka! Sare' dare'nesɨ. Dazabwi yune naanga balya'nebwina marima'naabadevulyɨ.

²² Dahaa' kayaa'nanyabure kalavuzɨkurɨsavɨ Gotɨyai mena yɨhyaramaarakeihɨlyɨ. Sara yada gamɨ sare yaasɨwa'wawɨnyaihɨrɨ mena yɨhɨmwaaihakeihɨlyɨ. Yɨ sasareihi tewaanya nawɨ'nya' yɨsɨlya'bɨ' dara dɨmaaryide “Tewaanya nawɨ'nyaanga yɨma'nya'neihi Gotɨyareihi mwaaidɨvɨsasɨ. Yɨ dazabwi yune yuyagaa' yuyagaa'ne gaalyabwina marima'naabadevulyɨ.”

²³ Sare' dare'nesɨ. Kayaa'nanya' gannya yaasɨwa'wawɨnyaraavɨ kumɨre wawɨnya'ne tɨvɨkɨta wɨjaavadesɨ. Tɨvɨkɨta sa' yune naanga balya sahɨrɨ'na. Nabaai Gotɨyare gaimwanga tewaanya' yange' wɨjaavɨna neyadelyɨ. Sa' gaala yuyagaa' yuyagaa' mwaalya'ne'na. Kɨraazɨtɨyai Jizaazai nemɨre Naangerɨ wɨlamwaalajavɨ gaala daza' nejaavade'nanyɨ.