Romɨ 1 - Yipma

¹ Nya'mweihi, Romɨ mwaalyaihi, Polɨnyɨ nɨmɨre paazɨya' yɨhyasɨwaabe. Yuneinyɨ Kɨraazɨtɨyai Jizaazareinyɨ gamɨre yaasɨwa'wawɨnyainyɨ. Kɨraazɨtɨyai jaka nyɨjɨvwaramaaraka nyɨdahɨlakakeinyɨ nyɨdaasakeinyɨ Apozelɨyainyɨ. Sareinyɨ Gotɨyai yagaala tewaanya' maryasaabake' wɨjɨwaakya'neinyɨ nyakakeinyɨ.

² Yagaala tewaanya daza'na sɨnnawɨ Gotɨyai yune naanga nebulya'na kujaa' gamɨnyɨ wɨ'nawɨjɨwaakya'nera pɨropetɨyara pɨkarya nawɨ'nya gɨrɨ'maaya yɨdayaasasɨ.

³ Sa' yagaala tewaanya' gamɨre Gawaalɨvaangerɨnesɨ. Sahwai yɨ, kɨlaa'nakei yɨma'nakevɨna, Ne Devitɨmɨre yɨsiwialyɨra. (Devitɨmɨre yɨta savaakɨdaasalyɨra.)

⁴ Yɨ gamɨre kurya tewaanyarɨna, Gotɨyare Gawaalɨvaangerɨnera. Sarei bainɨkeraayabadaa'nyɨ Gotɨyai yɨdɨkaavake'na dɨragɨnna wɨjɨwaainyɨna “Sahwai Gotɨyainyɨre Nyɨbwaalɨvaangelyɨra.” Sahwai Jizaazai Kɨraazɨtɨyai nemɨre Naangelyɨra.

⁵ Gotɨyai sara yawɨrakevɨ sahwarɨ yanga gaimwangebulyɨ wɨdaasakebulyɨ maaroine. Gamɨnyɨneba ya'neina ajɨmya yuyangɨya yuyara gamɨnyɨ lɨmwabɨzavɨdaa'nyɨ kumɨ wɨmɨdɨnya'ne'na sara maaroine.

⁶ Nabaai sarɨmɨ kwaihɨrɨjɨ Jizaazai Kɨraazɨtɨyai jaka yɨhɨzɨvwaramaarakeihɨlyɨ.

⁷ Yɨ sasareihi, Romɨ mwaalyaihi Gotɨyarɨ sarɨmɨnyɨna wɨvu'nadeihi Gotɨyai jaka dara yɨhɨzɨvwaramaarakeihɨlyɨ “Nɨmɨreihi, gɨrɨ'maayaihi jɨma'nyɨla!” Yɨ yuya saihɨrɨ Gotɨyai Nenɨmaangelyɨ Naangei Jizaazai Kɨraazɨtɨyalyɨ sanɨdaai yange'na nayaa yɨhɨgaimwagyɨka! Nabaai sarɨmɨre sɨmunyavɨ kwaamu'nanyabwi tewaanya yɨhwakyɨka!

Polɨ “Romɨ mwaalyaraavɨ wanganaawɨma!” yawɨrake'nesɨ.

⁸ Sɨnnawɨ davɨdaasɨ “Sarɨmɨ Kɨraazɨtɨyarɨ nayaa lɨmwamanɨgasa'na Kwaaka yuyɨmagɨ mwaalyara dɨwɨna yesaihɨlyɨ,” dena Jizaazai Kɨraazɨtɨyarɨna, nɨmɨre Gotɨyarɨ suya wɨdɨvanɨge.

⁹ Sa' nebulya' dare'nesɨ. Gotɨyai nɨmɨnyɨna “Nebulyasɨ,” jalɨkurakannelyɨ. Sahware Gawaalɨvaangerɨne yagaala tewaanya' wɨjɨwaakadɨ nɨmɨre kuryarɨ Gotɨyarɨna wɨdaayadɨnyalyɨ. Yɨ sahwai dara jalɨkurakɨna “Nɨmɨnyɨ nyɨja'ne gazagaasagaa' Polɨ Romɨ mwaalyaraavɨna nyɨdadelyɨ.”

¹⁰ Yuyagaa' Gotɨyarɨ wɨdadɨnyagaa' dara wɨdɨna “Gotɨyaigɨ sɨmunyavɨ sara yawɨ'dɨzaigɨ ‘Romɨna wawana!’ nɨmɨnne tusa' kyavada'gala'gɨzɨ sagaa' sahwaraayawɨnna yɨlekaanya wɨdeinyɨ.” Sara wɨdɨna yadɨnyainyɨ.

¹¹ Sare' dare'nesɨ. Sarɨmɨnyɨ yɨhwanganɨde'na nyɨvu'nɨvanɨ'. Sarɨmɨnyɨna “Kuryaraavɨ dɨragɨnya pada'galayɨvaimwagɨma!” dada Gotɨyare Kuryai yanga kanyɨjaavojɨ nawɨ'nya sa' yɨhɨzaavɨdeinyɨ.

¹² Sa' da'dare'na “Nɨmɨ dara yawɨ'manɨge. Nɨmɨnyɨjɨ Romɨ mwaalyaraavɨjɨ yuyainaavɨ negaimwadaawori nɨmɨ Kɨraazɨtɨyarɨ lɨmwadɨnyabulyɨ nabaai sarɨmɨ lɨmwadɨvɨsabulyɨ nemɨre sɨmunyavɨ dɨragɨnya pada'galayɨvaimwanga neyadesɨ.”

¹³ Nabaai da'mujɨyainyɨ “A'mwe nya'mweihi dara nyawɨpɨdɨka! ‘Polɨmɨ dara muvu'nyɨvanɨ' “Romɨ mwaalyaraayawɨnna wɨlaawɨma!” ’ ” Nɨmɨ sainyɨ kwalaalyagaa' “Romɨna wɨlaawɨma!” wɨdɨ wɨja yena yɨweinyɨra. Yɨsɨla mari'bwarakadɨvɨsabwibɨ' ajɨmya yuyangɨya pwaraavɨ kujɨwaake sahwara wɨlɨmwagetabaaibɨ' sarɨmɨnyawɨnna wɨlaawa'mujɨ “Kɨraazɨtɨyarɨ lɨmwabɨka!” dena Romɨyavaakɨdaa'nya pwaraavɨ wɨjɨwaakɨdeinyɨ.

¹⁴ A'mwe kunya yawɨ'nɨka kwaraavɨnajɨ kunya myawɨrya kwaraavɨnajɨ yɨ yɨwɨridɨvɨsaraavɨnajɨ miwɨrinyadɨvɨsaraavɨnajɨ nɨmɨ tɨvɨkɨta kɨnɨnnakeinyɨ. Tɨvɨkɨta sa' Gotɨyai “Pwaraavɨ duzɨwaakya!” nyɨdakevɨne tɨvɨkɨsasɨ.

¹⁵ Nabaai sasare savɨdaasɨ nɨmɨ sainyɨ yawɨsabwi mɨdɨnya'neinyɨ yɨ Romɨ mwaalya saihɨlyɨyaraavɨjɨ yagaala tewaanya' wɨjɨwaakya'ne saburɨ sɨmunya kuna naanga yawɨ'manɨge.

¹⁶ Yo, sare' dare'nesɨ. Nɨmɨ yagaala tewaanyavɨna wagɨla manyɨvwa'nyadeinyɨ. Sare' dare'nesɨ. Yagaala tewaanya sa' gazarazara lɨmwaga'bɨzaraavɨ Gotɨyai wɨvadaihasamaarya'ne sa' Gotɨyare dɨragɨnya dɨ'nakesɨ. Dɨragɨnya Juyaraavɨdaasɨ nabaai Juyara mamwaalyɨgasaraavɨjɨ wɨvadaihasamaarya'nesɨ.

¹⁷ Sare' dare'nesɨ. Yagaala tewaanya sahɨrɨsavɨ Gotɨyai gamɨnyɨna a'mwe yɨda'maraangeinaavɨ nemwaaihya'neburɨ yoima'desɨ. Kɨraazɨtɨyarɨ lɨmwagawaari nemɨre sɨmunyarɨ yavada'galakade'nanyɨ. Lɨmwangebwi gave sabwine'nanyɨ. Aayawɨdaa'nyɨ yunegaa'nannevɨ lɨmwangebwine'nanyɨ. Sare' Gotɨyare bukuyavɨ dara dɨnɨkabaaibɨ'nanyɨ “Pwai Gotɨyarɨ lɨmwade sarerɨna ‘Yɨda'maraangerɨ wɨmwaaihɨwa,’ dozɨyai yuyagaa' gaala mwaaladelyɨ.”

A'mwe yuyaraavɨna Gotɨyarɨ sɨnna tɨka wɨda'de'nesɨ.

¹⁸ Sare' yuya dare'nanyɨ. Gotɨyarɨ myawɨryaraavɨre sɨmunyangɨ kayaa'nanyabwi wɨla'dennajɨ yɨda'maraangebwi maayanna yadɨvɨsannajɨ Gotɨyai gamɨrebadaasɨ, Sɨgunyavɨdaasɨ gamɨre sɨnna tɨkebwi daanga wɨjaaya'nebwi yoima'devulyɨ. A'mwe sarera kumɨre saburajɨ Gotɨyare nebula sabwi dathɨvaina yadɨvɨsarera.

¹⁹ Daanga wɨjaaya'nebwinanya'na yɨhɨthɨma! A'mwera Gotɨyarɨ yawɨramaata sabura lɨka yulyarɨka' mɨ'. Sare' dare'nesɨ. Gotɨyai sahwaraavɨ sɨmunyavɨ mena yɨbwarɨdaakwakengɨ.

²⁰ Sare' dare'nesɨ. Sɨnnawɨ sagaa' Gotɨyai yuya sa wakyaakegaa'daasɨ a'mwera Gotɨyare dɨragɨnya dɨ'nake' waragothevɨjɨ gamɨ sahwai Gotɨyare aaya kaavɨlya' a'mweraavɨre'bɨsa' mwarikevɨjɨ yawɨramaapɨnerera. “Sahwai Gotɨyalyɨra,” yawɨpɨnerera. Sarewaarɨ tɨnna wangadaanyawaai mɨ'. Kɨrɨ' Gotɨyai yuyangɨ wakyaakenna tɨnna wangadɨvɨ' yawɨramaapɨnewaalyɨ. Sasare savɨdaasɨ “Nɨmɨ myawɨriwa,” dɨpɨnera mɨka! Kumɨresɨra. Yagaainakera mɨka!

²¹ Daanga wɨjaaya'nebwinanya'na pɨrɨ' yɨhɨthɨma! Gotɨyarɨna yawɨrangadɨvɨ' kɨrɨ' “Sai nebwina Gotɨya naangelyɨra,” yawɨrangadɨvɨtara mɨ'. Sara yadɨvɨ' gamɨnne yaya' munya ke'ba makidɨvɨtara mɨ'. “Su! Su!” dadɨvɨtara mɨ'. Aawaawa. Kumɨre yawɨta sabwi wana navɨ'navɨka wiadere. Sara yada kumɨre sɨmunya sa' kayaa'na yɨma'nyɨna yada jɨhɨnya' yɨma'nyɨna yadere.

²² Kumɨ kayaa'na yadɨvɨ' dɨragɨnna dɨna “Nemɨ sɨdu'nakeinera.” Sara yadɨvɨ' kɨrɨ' sare'na sɨdu'maayara mwaalɨna.

²³ Sasarera Gotɨyai mabalyɨ yaderɨ, byaanna naanga kɨnɨnnakerɨ yaya' makina yadɨvɨsabwi bule'na wɨjaavadɨvɨ' yɨvanɨga'. Sara yadɨvɨsagaa' yɨlaaya'ne a'mwa'mwe, a'mwe balya'ne saraavɨjɨ yusaraavɨjɨ yɨkurɨyaawiaraavɨjɨ kamaala saraavɨjɨ a'mwa'mwengɨ yaya makina yadɨvɨsare.

²⁴ Sasare savɨ yawɨbwa'dei yɨ'naraderɨ pɨlɨzɨmaanɨyaraavɨ marɨmwangɨna yadevaaibɨ' Gotɨyai sahwaraavɨre kayaa'nanya kaavɨlyaburɨ yɨ'dɨvalamwaaihɨna kya' kunnya sɨmunya kayaa'nanya saburɨ mwagi'namakabada gɨrɨkita'nanyabwi wagɨla wɨvwa'nadevwi marɨmwangɨna yadɨvɨsare. Sare yadɨvɨ' kumɨ sara pwaraavɨ gɨrɨkita'nanyabwi yɨdɨvɨ' kunnya kɨlaakejɨkɨ kwaakeba makwaidaawadɨvɨsare.

²⁵ Sasarera Gotɨyarɨne nebulyabwi yagalya'ma'na yadɨvɨ' kwaasɨyabwi maralɨmwanna yadɨvɨsare. Gotɨyai yuyangɨ wakyaakerɨ yaya' mamakɨlyɨ yadɨvɨ' Aaya Kaavɨlyarɨ yɨlaaya yadɨvɨtara mɨ'. Aawa. Wakyaaka yuya sangɨna yɨlaaya yadɨvɨsare. Wakyaaka sahwai yuyagaa' yuyagaa' gamɨnne yaya sa' munya ke'banna nemɨ makɨlya'nei nawɨ'nya naangelyɨra. Naanga nebulyasɨ.

²⁶ Nabaai kayaa'nanya sarevɨ Gotɨyai sahwaraavɨ kayaa'nanya kaavɨlyaburɨ yɨ'dɨvalamwaaihɨna. Sara kya' wagɨla wɨvwa'nya'nera kayaa'nanyabwina dɨka widevwi yadɨvɨsarera. Sare' dare'nesɨ. Yɨ kumɨre a'mwe samɨlɨka a'mweraavɨrebwina marasɨ'na yeva pɨmɨlɨkajɨ kwaiyagaala dɨdɨvɨsamɨlɨke.

²⁷ Nabaai sabaaibɨ' kumɨre a'mwe kwara a'mwengɨ ya'nebwi yagalya'ma'na yadɨvɨ' kumɨre munya sɨ' kumɨre pwaraavɨna dɨka naange' widada kwala sara kwala pwarajɨ gevwi kayaa'nanyabwina wagɨla kɨnɨnnaka sa pwarajɨ yadɨvɨsare. Nabaai kumɨ saraavɨ gɨrɨkita'nanyabwina Gotɨyai wɨrɨvɨkɨrya'ne daanga kayaa'nanya maa'dɨvɨsara.

²⁸ Sareraavɨ Gotɨyai kayaa'nanya kaavɨlyaburɨ yɨ'dɨvalamwaaihɨna. Kunnya sɨmunyaburɨ Gotɨyarɨna “Nayaa yawɨralɨmwagaana!” myawɨri yadɨvɨtabaaibɨ' Gotɨyai “Sahwara sɨmunya pinabɨsa' maapɨka!” dada yɨ'dɨvalamwaaihɨna. Sara kya' a'mwe sara mya'ne yuya kayaa'nanya dala pɨnɨnna pɨnɨnna yadɨvɨsangɨ.

²⁹ Yɨ dara yadɨvɨsangɨ. Kumɨ yuya kayaa'nanya sa, yuya gɨrɨkita'nanya sa, yuya tɨganaarya sa, yuya wana kayaa'nanaanga sa yadɨvɨsare. Gɨlyɨvɨkɨravɨnakeraavɨna munyɨ' kayaa'na wiadere. A'mweraavɨ tamakɨna, mayagaala yaasɨwa' damarina, kwaasɨya dɨnyɨna, pwaraavɨna kayaa'na yawɨ'na. Yuya sasare kayaa'nanya sa kumɨnyɨ yunebanna warɨkengɨ. Yɨ bulayagaala dadɨvɨsara,

³⁰ “A'mwe pwaraavɨre yaya kayaaka yɨgalaana!” dɨna, ku'maayaba wɨdadɨvɨsara, Gotɨyarɨna sɨmɨlɨka wimwaaidera, yagaaibɨraizɨka wɨdadɨvɨsara, “Nɨmɨ pwarabɨtainyɨ mɨ',” yawɨ'dɨvɨsara, kumɨnne yaya' munya ke'banna makinyɨna yadɨvɨsara, kayaa'nanya mudɨka sabwi wakɨna yadɨvɨsara, kuvɨnɨmaangeyuraavɨre yagaala sangɨ galazekɨvaina yadɨvɨsara,

³¹ sɨmunya maayara, kunnya yune naanga nebulyava'nanyangɨ nayaa mamɨdɨnyadɨvɨsara, kunnya avaaitawanakeraavɨ nayaa myadɨvɨsara, a'mwe pwaraavɨna kale mwiaderera.

³² Sasarera Gotɨyare yagaalya' dakɨnɨke' nayaa yawɨ'dɨvɨsare. Dara dɨnɨ' “A'mwe sasare sabwi yadɨvɨsara tɨvɨkɨsa'na yuna naanga baibɨka! Daanga maapɨka!” Sara yawɨ'dɨvɨ' kɨrɨ' kayaa'nanya sabwi sara yadɨvɨta gavenna mɨ'. Aawa. A'mwe kayaa'nanya sasara yadɨvɨta kwaraavɨ “Tewaanna yɨvanɨga'. Kuna sana jɨla!” wɨdadɨvɨsare.