Pilipaai 1 - Yipma

¹ Pilipaai mwaalyaihi nya'mweihi, Kɨraazɨtɨyai Jizaazarɨ wɨlamwaaihasa'neihi Gotɨyare tewaanyaihi, Polɨnyɨjɨ Timotilyɨ sainaai Kɨraazɨtɨyai Jizaazare yaasɨwa'wawɨnyainaai pɨkarɨyɨkwia da' yɨhyasɨvanaabɨholyainaalyɨ. A'mweihɨrɨna, kusɨlaanyavɨyaihɨre maremwaalyaihɨrɨnajɨ wɨdaayaihɨrɨnajɨ saihɨrɨ yɨhyasɨvanaabɨholyainaalyɨ.

² Nemɨre Gotɨyai Nenɨmaangelyɨ Naanga Jizaazai Kɨraazɨtɨyalyɨ yanga gaimwangebwi yɨhika! Sarɨmɨre sɨmunyavɨ kave kwaamu'nanya' yɨhwakika!

Polɨ Gotɨyarɨ “Su! Su!” wɨdake'nesɨ.

³ Sarɨmɨnyɨna yawɨ'dɨnyagaa' gazagaasagaa' nɨmɨre Gotɨyarɨ “Su! Su!” wɨdadɨnyainyɨ.

⁴ Yuya wɨdadɨnya sangɨ, sarɨmɨnyɨ gaimwanga yɨhya'ne wɨdadɨnyangɨ yɨlaaya yadɨ Naangerɨ yɨdaangadɨnyainyɨ.

⁵ Sare' dare'nanyɨ. Sarɨmɨ yagaala tewaanya' yamaaresagaa'daasɨ dahaa'nanneihi nɨmɨjɨ yagaala sa' a'mwera maarya'na mena nye'mwannayɨvanɨgasa'nanyɨ.

⁶ Nɨmɨ mena dara yawɨ'manɨge. Gotɨyai sarɨmɨnyɨ wawɨnya nawɨ'nya' mena yɨhivanɨ'. Sai wawɨnya' kuna kuna yɨwawojɨ wawɨnya sa' yɨ'mwannyɨna yade Yɨrɨka yune Kɨraazɨtɨya Jizaazaregaa'na.

⁷ Yo, sarɨmɨ yuyaihɨrɨna sɨmunya sara yɨbwakɨnna yɨvanɨge daza' yɨda'nanyasɨ. Sa' dare'na. Yuyagaa' nɨmɨre sɨmunyaburɨ sarɨmɨnyɨ yɨhɨlɨmwaga'dɨnyainyɨ. Yɨ sarɨmɨnyɨna tewaanya nyɨvu'nɨvanɨke'nanyɨ. Nabaai yuyaihi yanga gaimwanga naangebwi nɨmɨjɨ ye'mwannamaa'manɨga'. Yɨ yagaala tewaanya' a'mwera maarya'na yanga sabwi nye'mwannayɨvanɨgasa'nanyɨ. Nɨmɨ kalavuzavɨ mwaaidɨnyagaasɨ yagaala tewaanya sa' nebulya'na warya'ne' jalɨkurakegaasɨ a'mweraavɨre sɨmunyangɨ yagaala tewaanya sa' dɨragɨnya yɨvaimwagehaasɨ yuya sagaa' sara yadɨvɨsaihɨlyɨ.

⁸ Sare' darevɨdaa'nyɨnyɨ. Kɨraazɨtɨyai Jizaazarɨ sarɨmɨnyɨna tewaanaanga wɨvu'nɨvanɨkabaai sahwarɨ yuyaihɨrɨna tewaanaanga nyɨvu'nɨvanɨke' Gotɨyai nayaa jalɨkurakanneinyɨ. Sarɨmɨnyawɨnna yɨhwanganaawɨde'na yɨhɨthɨwa.

⁹ “Sarɨmɨre tewaanya yɨhɨvu'nyabwi naanga naanga kuna yɨma'nana! Nebulya'na jawɨranganyidesɨ yuya sɨmunya tewaanya naangejɨ naanga kuna yɨhɨmaremwaalana!” dena nɨmɨ Naangerɨ sara yɨdaangadɨnyainyɨ.

¹⁰ Nabaai gevwi gevwi nayaa yawɨranganya'neihɨrɨ yɨhɨmaremwaaladengɨ. “Kɨraazɨtɨyarɨne Yɨrɨkerɨkɨ sarɨmɨ nawɨ'nya tewaanyaihi yɨwetawakya maayaihi dɨmwaalyideihɨlyɨra,” dena Naangerɨ wɨdadɨnyainyɨ.

¹¹ Yɨ Jizaazai Kɨraazɨtɨyarɨ yɨsɨ' yɨsɨla nawɨ'nya yɨ'nadevaaibɨ' yɨda'maraangebwi sarɨmɨnyɨ yunebanna kuna yɨhwaradevulyɨ. Yɨ sasare sabwi yadaapɨjɨ Gotɨyarɨne yaya' munyaba makɨlya'najɨ “Byaannakei!” dadaa Gotɨyarɨ yɨlaaya wɨmarya'najɨ sara wɨdadɨnya'nanyɨ.

Polɨ kalavuzangevɨ mwaalake' daza' yagaala tewaanyavɨ gaimwanga yake'nesɨ.

¹² Nya'mweihi, sarɨmɨ yawɨramaasavɨna dara nyɨvu'nɨvanɨ'. Nɨmɨnyɨ taanga nyɨma'nade datha kɨrɨ' yagaala tewaanya' yawɨranganya'na marihɨri. Aawa. A'mwe kwaala kwalaalyara yagaala sa' kadɨka kuna wɨ'nɨvanɨgasasɨ.

¹³ Yɨ sare'na dame maredaata yuyara Sizaare angevɨna dame daa'dɨvɨsarajɨ a'mwe pwara kwarajɨ sara “Kɨraazɨtɨyarɨna wɨdake'na kalavuzavɨ mwaaidelyɨ,” nɨmɨnyɨna mena nayaa yawɨ'dɨvɨsare.

¹⁴ Nabaai kalavuzavɨ mwaaideri Naangei nɨmɨnyɨ nayaa nyɨgaimwade' Naangerɨne neya'mwe kwalaalyara tɨnna wangadɨvɨsa'na kumɨnyɨ wɨgaimwange'na yawɨ'dɨvɨ' kumɨre sɨmunya' dɨragɨnya maa'dɨvɨsa'na lɨka yabwi yagalya'ma'dɨvɨ' Gotɨyare yagaalya' wɨjɨwaakya'na dɨragɨnna yadɨvɨsare.

¹⁵ Dare' nebulyasɨ. Pwara nɨmɨre wawɨnya Gotɨyarɨne'na tɨganaarya yadɨvɨ' nɨmɨnyɨna “Sai kalavuzavɨna nayaa mujadei. Sahwarɨ wavɨlavaana!” yawɨ'dɨvɨta dazavɨ Kɨraazɨtɨyarɨne yagaalya' wɨjɨwaakadɨvɨsasɨ. Kɨrɨ' pwara nɨmɨnyɨna sɨmunya nawɨ'nya kɨnɨnnakera wɨjɨwaakɨna.

¹⁶ A'mwe dazara nɨmɨnyɨna wɨvu'nɨvanɨke'najɨ yagaala tewaanya' nebulya'na warya'ne wawɨnya naange' nyɨjaavakevɨna yawɨ'dɨvɨsa'najɨ sara wɨjɨwaakɨvanɨgasare.

¹⁷ Kɨrɨ' pwara sara “Polɨmɨna nemɨnne yaya naangenna yaana!” deva Kɨraazɨtɨyarɨna wɨjɨwaakɨna. Sahwara sɨmunya tewaanya kɨnɨnnakera yawɨta gɨrɨkita'nanya maayara sara wɨjɨwaakadɨvɨsara mɨka! Aawa. Nɨmɨre kalavuzɨwawɨnyavɨ “Taanginya pɨnɨjɨ yɨbwa'mwagaana!” yawɨ'dɨvɨ' sara wɨjɨwaakadɨvɨsa'nanyɨ.

¹⁸ Kɨrɨ' maajɨmunya myawɨriwana! Baa'nana! Yuya saburaavɨ, nɨmɨnyɨna yawɨta kayaa'nanyangɨnajɨ nɨmɨnyɨna yawɨta tewaanyangɨnajɨ Kɨraazɨtɨyarɨna wɨjɨwaakadɨvɨsare. Dazavɨ nɨmɨ yɨlaaya yɨvanɨge. Yo, nɨmɨ yɨlaaya naanga kuna yɨdeinyɨ.

¹⁹ Sare' darevɨdaa'nyɨnyɨ. Nɨmɨ mena yawɨ'manɨge. Nɨmɨnyɨ gaimwange'na sarɨmɨ Naangerɨ wɨdadɨvɨsavɨjɨ Jizaazai Kɨraazɨtɨyare Kuryai nɨmɨnyɨ dɨragɨnya nyɨvaimwadevɨjɨ dahaa' nyɨma'nɨwaka daza sa kayaaka nyɨgalade mɨ'. Naangei nyɨvadaihasamaaradeinyɨ.

²⁰ Yɨ “Yɨma'nadenna tɨlɨjaaya baihanarɨma!” yawɨ'dɨ dazanna yemwaaimanɨge. Dare' yemwaaimanɨgeinyɨ. Nɨmɨ wagɨla maalɨka aane pɨmɨlɨ' kɨmɨlɨ' maarɨdeinyɨ mɨ'. Aawa. Yuyagaa' sara yadɨnyabaaibɨ' dahaa' yuya nɨmɨre kɨlaakejɨkɨ yɨdevɨ Kɨraazɨtɨyarɨne yaya' makɨlya'neinyɨ dɨragɨnna daa'dɨ nayaa jalɨkurakɨma! “Nɨmɨ gaala mwaaimujainyɨ sara yɨdeinyɨ dɨngaka? Nɨmɨ baimuja kwainyɨ sara yɨdeinyɨ dɨngaka?” dena nayaa yɨvanɨge.

²¹ Sare' darevɨdaa'nyɨnyɨ. Nɨmɨ gaala mwaala'mujɨyainyɨ Kɨraazɨtɨyalyɨ ye'mwannamwaaihe. Nabaai nɨmɨ bala'mujɨyainyɨ Kɨraazɨtɨyarɨne yaya' dɨragɨnna makɨlɨdeinyɨ. Yɨ sa' nɨmɨre mwaalyabwi wavɨlavade nɨmɨnyɨne'nanyɨ.

²² Nabaai nɨmɨre kɨlaakejɨkɨ kuna mwaaimujainyɨ Kɨraazɨtɨyarɨne'na tewaanya nawɨ'nyaanga yɨsɨlyabɨta yɨdeinyɨ. Kɨrɨ' nɨmɨ be tutarɨkɨ mɨdɨnɨdeinyaka? “Balɨma!” yawɨrɨdeinyɨ dɨngaka? “Mwaalɨma!” yawɨrɨdeinyɨ dɨngaka? Nɨmɨ myawɨriwa.

²³ Yɨ savɨna nɨmɨ sɨmunya pɨrɨwaai yawɨ'manɨge. Kwaaka davakɨ yagalya'ma'mujainyɨ Kɨraazɨtɨyalyɨ ye'mwannamwaaimuja'. Darevɨnyɨ. Sa' tewaanya naangesɨ.

²⁴ Kɨrɨ' sara yɨwɨjainyɨ gara yɨhɨgaimwagɨdeinyaka! Sare' kɨlaakejɨkɨ sarɨmɨnyɨne'na yɨhɨmudaasɨvanɨke'na kuna mwaalɨma!

²⁵ Sare' dɨragɨnna yawɨ'manɨgevɨdaa'nyɨ dara yawɨramaa'manɨge. Nɨmɨ kuna mwaaidɨ sarɨmɨjɨ wawɨnya yɨhye'mwannayɨdeinyɨ. Naangerɨ dɨragɨnna lɨmwangebwi naanga yɨma'nya'najɨ dɨragɨnaanga lɨmwadɨvɨ' yɨlaaya yɨhya'najɨ yɨhɨgaimwagɨde'nanyɨ.

²⁶ Nɨmɨ sarɨmɨnyawɨnna ayɨna mwaalɨdevɨ sarɨmɨ nɨmɨnyɨna yɨlaaya yadɨvɨ' “Nemɨnyawɨ mena mwaalɨke'na Kɨraazɨtɨyai Jizaazarɨne yaya' munyaba naanna makɨlaana!” dɨzide' yɨhye'mwannamwaalɨde'nanyɨ.

Yagaala tewaanya' lɨmwadɨvɨsara yabwinesɨ.

²⁷ Yuya yɨma'nadengɨ sarɨmɨ “Kɨraazɨtɨyare yagaala tewaanyavɨ lɨmwadaanyainera,” dadɨvɨ' Gotɨyarera yɨpɨnebwi nayaa yɨda'maraangebwina jɨla! Sarevɨ nɨmɨ yɨhwanganaawɨdeinyɨ dɨngaka? Sarɨmɨnyɨ kuna yɨbwa'nɨdeinyɨ dɨngaka? Yɨ sareinyɨ sarɨmɨnyɨna kadɨka sara wɨ'nya'ne'na sara jɨla! Dara wɨ'nya'neinyɨ nyɨvu'nɨvanɨ'! Sahwara avaaizɨmunya'na daa'dɨvɨ' yagaala tewaanya' lɨmwaga'manɨgasarera. Yɨ yuyara, yagaala tewaanya'na kwɨya'mwera dɨragɨnna lɨmwange'na dɨhaa'bwata yɨmanɨgasarera. Malyavɨ ye'mwannadɨvɨtabaaibɨ' yuyara sara yɨvanɨgasarera.

²⁸ Sahwaraavɨna taanga wɨjaavadɨvɨsara aane pɨrɨvɨ kɨrɨvɨ sahwaraavɨ lɨka wirɨ'gaimanɨgasara mɨka! Sahwara saraavɨna lɨka myɨvanɨgasara. Nabaai sarɨmɨ lɨka mi yɨpɨja' daza' yɨkamaangeraavɨ yɨbwarɨdaakwia dara yadesɨ. Sahwara kayaaka yɨnɨpɨ'dere. Nabaai sarɨmɨnyɨ dara yɨhibwarɨdaakuvanɨ'. Gotɨyai sarɨmɨ tewaanya mwaalya'na yɨhɨvadaihasamaaradelyɨ. Yɨ Gotɨyai sahwaraavɨjɨ sarɨmɨnyɨjɨ sara yɨhyadelyɨ.

²⁹ Sare' dare'nanyɨ. Sarɨmɨnyɨna Kɨraazɨtɨyare wawɨnya ya'ne'na Gotɨyai tewaanyabwi yɨhɨzaavanɨkelyɨ. Kɨraazɨtɨyarɨ dɨragɨnna lɨmwagya'ne gavebwina yɨhɨzaavada mɨ'. Aawa. Gamɨnyɨ daanga maarya'ne kɨbulyɨ yɨhɨzaavanɨkelyɨ. Sarevɨdaa'nyɨ yagaala tewaanya' kuna dɨlɨmwagarila!

³⁰ Yɨ sɨnnawɨ nɨmɨ Gotɨyarɨne mala bwa'daazɨya' sarɨmɨ tɨnna wangane'. Nabaai dahaakɨgaa' nɨmɨ mala kuna bwa'manɨge'na sarɨmɨ kadɨka wɨ'nɨvanɨgasasɨ. Mala yune gave savɨna avaainanyavɨna sarɨmɨ bwa'nɨvanɨgasaihɨlyɨ.