Juthɨyai 1 - Yipma

¹ Nya'mweihi, Juthɨyainyɨ, nɨmɨ Jizaazai Kɨraazɨtɨyare yaasɨwa'wawɨnyainyɨ, Jemɨzarɨ gahwaalaangeinyɨ. Sareinyɨ pɨkarɨyɨkwia da' Gotɨyai jaka yɨhɨzɨvwaramaarakeihɨrɨ yɨhithawasɨwaabe. Gotɨyai Nɨmwai sahwarɨ sarɨmɨnyɨna wɨvu'nada Jizaazai Kɨraazɨtɨyai gamɨ sahwai sarɨmɨnyɨ yɨhɨmaredaa'manɨkelyɨ.

² Gotɨyai sarɨmɨnyɨna kale'na gaimwangebulyɨ kwaamu'nanyabulyɨ sarɨmɨnyɨna wɨvu'nyabulyɨ yɨhɨzaavana! Sasare sahɨbwi sarɨmɨnyɨ naanga kuna yɨhima'nana!

Yagaala tewaanyavɨna yɨkamaanga yadɨvɨsaraavɨna dɨnɨkebwinesɨ.

³ Nɨmɨre nya'mweihɨrɨna tewaanya nyɨvu'nadeihi, aayagaa' sarɨmɨnyɨ wɨja ya'ne sɨmunya naanga yawɨrena “Gotɨyare tewaanyaraavɨna Kɨraazɨtɨyai nemɨ yuyainaavɨ padaihasamaata sa'na pɨkarɨyɨkwia' yarai yɨdavɨma!” dena yɨweinyɨ. Dahaa' yawɨ'manɨge. Sarɨmɨnyɨna yagaala pɨrɨ' pɨkarya dara yɨdavɨdeinyɨ “Sarɨmɨ dɨragɨnna jɨla! Nemɨre dɨragɨnna lɨmwangebwi maremwaalya'na yagaala tewaanyavɨne yɨkamaanga yɨma'nadɨvɨsaraavɨ nayaa tɨvɨkɨrasɨ'naana! Yune gave pɨgaa'na Gotɨyai dɨragɨnna lɨmwanga dazabwi gamɨre a'mwe tewaanyainaavɨna nejaavakebulyɨ. Sare'na yɨhɨthɨhaa'bwarɨma!”

⁴ Sare' darevɨnyɨ. A'mwe akwara Naangerɨna lɨmwaga'daanyainaayawɨnna “Nemɨ Kɨraazɨtɨyareina,” dadɨvɨ' kɨma'nyɨkaanya bwina. Sɨnnawɨ kɨgaakuna Bukuyavɨ a'mwe sasare dazara Gotɨyarɨna bule'na wɨjaavadɨvɨsara Gotɨyare jɨdasavɨ yɨ'mavapɨjɨyara yɨnahu yɨwɨna yɨpɨ'deraavɨna dɨnɨkesɨ. Sahwara Gotɨyare yanga gaimwanga sa' maroyɨmaa'nya yadɨvɨ' nabinya pɨbwibɨ' yadɨvɨ' yɨ kumɨre munyɨ' dɨka yɨdada kayaa'na gɨrɨkita'nanyabwi yadɨvɨsare. Darerera. “Gotɨyai nemɨnyɨna yanga gaimwangeburɨna nemɨre gɨrɨkita'nanyabwi yaasɨwa'na nemarasɨ'nade'na sarebwi naanna yaana!” kwaasɨ dadɨvɨ' yadɨvɨsaburɨ. A'mwe sasare dazara kwaasɨ sara yadɨvɨ' nemaremwaaide gave pwai, nemɨre Naangei Jizaazai Kɨraazɨtɨyarɨna “Aala!” dadɨvɨsare. Navɨka yɨbwaakadɨvɨsare.

⁵ Sarɨmɨ yuya datha mena yawɨ'dɨvɨ' kɨrɨ' “Dazangɨ ayɨna yawɨpɨka!” dena dɨhaa'bwata yɨhide'nanyɨ. Pɨrɨ' daresɨ. Sɨnnawɨ kɨgaa' Naangei gamɨre a'mweraavɨ padaihasamaaraka Anga Yɨzɨpɨ yagalya'maveveraavɨ makwiaakere. Sara yaka kɨrɨ' dɨvidaa'nyɨ gamɨnyɨ dɨragɨnna malɨmwagyesaraavɨ tamakɨna ya'. Yɨ sahwara kayaaka yɨnyɨna ye'.

⁶ Nabaai pɨrɨ' daresɨ. Kɨgaakuna Gotɨyare mamaaya ejelɨya pwarajɨ kumɨre wawɨnya aaya mudɨ'nanya savɨ nayaa mwaaletara mɨ'. Aawa. Kunnya angeba yagalya'ma'na yesare. Sarevɨdaa'nyɨ Gotɨyai kwaari'mawɨlyasɨ wɨla pwɨyaka kalavuzavɨ wɨmwaaihakera yuyagaa' yuyagaa' mwalɨbainɨga'. Sareraavɨ jɨhɨnya yuna kayaa'nanaangewɨ kewewɨnɨ wɨlawɨmwaaiha'. Sahwara Gotɨyare Yɨrɨka Naangerɨkɨna yawɨbwarya'negaa' daapɨ'dehaa'na yemwaaiha'.

⁷ Nabaai pɨrɨ' daresɨ. Kɨgaakuna a'mwe Sothomɨ mwaalyarajɨ Gomora mwaalyarajɨ anga naanga aya kɨba mannɨkebajɨyarajɨ sahwara avaainanyabwi yesare. Kayaa'nanya gɨrɨkita'nanyabwi mɨdɨnna. Kumɨre sɨmunyai wɨdɨka'daa'nyɨ avaanna kayaa'nanyabwi a'mwe yaasɨwaka pwarajɨ wɨlaye'mwannayamarina. Sarevɨdaa'nyɨ Gotɨyai kayaa'nanya' wɨrɨvɨkɨrakera dɨka yuyagaa' mwalɨbainya'nevɨ wɨmwaaihɨna. Kayaa'nanya' wɨrɨvɨkɨta daza' nemɨ tɨnna wangadaa kumɨre sabwi mamɨdɨnyɨ yaade'na ku'maayaba sɨmunya yawɨramaarya'ne' yɨnɨkesɨ.

⁸ Sahɨbaaibɨ' a'mwe dahaa' sarɨmɨnyawɨ mwaaihata dazara da'dare sabwina yadɨvɨsare. Kumɨre waja nabinabinya saza sahwaraavɨ wɨdɨhaa'bwa'da kumɨre kɨlaakejɨkɨ kayaa'nanya gɨrɨkita'nanyabwi yadɨvɨsare. Sahwara naangeraavɨ pihadɨka yadɨvɨ' mamaaya byaannakeraavɨ bɨraiyagaala wɨdangadɨvɨsare.

⁹ Kɨrɨ' kɨgaa' mamaaya aaya mudɨ'nanyai Maaikelɨ sasara mi. Sai Saataanɨjɨ tɨvɨkɨta yɨnyelyagaa' “Ne Mozɨzare kɨlaakejɨ' aaihwai maaradezɨ' dɨngaka?” dahɨla yagaaikwalaalya dɨnagɨleraalyɨ. Kɨrɨ' Maaikelɨ kayaa'na mi yaka Saataanɨmɨ bɨraiyagaala kayaa'nanya' ayɨna murɨvɨkɨryaakelyɨ. Aawa. Sai dara wɨdɨna “Yune Naangeina maiyagaalya' gɨthana!”

¹⁰ Kɨrɨ' a'mwe dazara kwaasɨ yagaala dadɨvɨsara bɨraiyagaala wɨdadɨvɨsare. Yɨ yuya pɨnɨngɨne aaya kaavɨlya myawɨranganyadɨvɨsangɨna bɨraiyagaala dadɨvɨsare. Nabaai yuya kumɨ yawɨ'dɨvɨta sabwi yɨkurɨyaawia sɨmunya maayaraavɨrebulyɨ. Sarera kɨlaakejɨ'na mɨdɨnna yadɨvɨ' sarevɨdaa'nyɨ sasare dazabwi yuna kayaaka wigalakadevulyɨ.

¹¹ We'! Sasare sara mala nayaa yɨwannɨpɨka! Sare' dare'nanyɨ. Ne Kenɨ Gotɨyarɨ navɨka yɨbwakyaakabaaibɨ' sahwara navɨka yɨbwaakɨvanɨgasare. Yɨ Ne Kenɨmɨre saburɨ yamaryadɨvɨsare. Nabaai Ne Belaamɨ nɨgwia maarya sanne'na kwaasɨyabwi wɨjɨwakyaakabaaibɨ' dazahwara yune nɨgwia maarya'na yawɨ'dɨvɨ' Gotɨyareraavɨ kwaasɨ wɨjɨwaakadɨvɨsare. Yɨ yɨme'nya'bɨ' nɨgwia'na kwaasɨ wɨjɨwaakya'nera kumɨre kɨlaakejɨ' wɨjaavadɨvɨsare. Nabaai sɨnnawɨ kɨgaa' Ne Koraa Ne Mozɨzarɨjɨ maiyagaala wɨjaakabaaibɨ' sahwara Gotɨyarɨ pihadɨka yadɨvɨ' sasare dazaburɨ wana yɨwɨna yɨpɨ'derera.

¹² Yuyagaa' sarɨmɨ yɨ'bwa'nemwaaidɨvɨ' tɨka munnejɨ yadɨvɨ' avaaizɨmunya yawɨsa'najɨ sɨrya'mweraavɨ gaimwagya'najɨ yadɨvɨsagaa' a'mwe dazara yɨ'bwa'nemwaala dazavɨ gɨrɨkita yɨgaidɨvɨsare. Sahwara tɨka sarɨmɨjɨ yɨhye'mwannanadɨvɨ' kɨrɨ' sahwara kumɨre tɨka wapaaya sa maremwaainya'na yadɨvɨ' lɨka aane pɨmɨlɨ' kɨmɨlɨ' yadɨvɨtara mɨ'. Yɨ pwaraavɨna myawɨryadɨvɨ' kumɨnyɨna, kumɨnyɨna yawɨ'dɨvɨsare. Jarɨsagaa' yɨraaya yɨhusa' yaasɨwa' mariwɨnakamarya burɨke' mabwalari ya'ne yadevaaibɨsarera. Sahwara yagaala deva kɨrɨ' nayaa sara myadɨvɨsare. Nabaai yɨsɨka kumɨregaa' yɨsɨlya mi'nyadevaaibɨsarera. Yɨ yɨta sɨka yawaka mena bainɨkikaavɨ a'mwera kaavɨlyawɨ mena lamaipurasɨ'nɨkerabɨsare. Sasare sɨka pɨgasaai bainɨkerera.

¹³ Sahwara wagɨla wɨvwa'nya'ne kɨnɨnnaka sabwi yadɨvɨsare. Sasare daza' saalaalya' aalɨmavajɨnaaka naange' yada aalɨmaagwalya' yɨma'nadevaaibɨsabulyɨ. Nabaai sɨgunyavɨ sɨlɨngaamɨnyarɨka mwaaidɨvɨ' kunnya tusa' yagalya'ma'dɨvɨ' a'mweraavɨ kayaa'na yɨbwarɨdaakwadɨvɨtabaaibɨsare. Sare'na Gotɨyai anga jɨhɨnya kayaa'nanyaba mena yovɨrawakɨvanɨkeba warɨ'. Yuna jɨhɨnya naangeba dazahɨba yuyagaa' yuyagaa' mwaaibɨ'deva.

¹⁴ Ataamɨmɨdaa'nyɨ mɨjɨyɨma'nɨgaveva ata purɨdaa'nyɨ pwaraalyai Ne Yɨnokɨ yɨma'nakelyɨ. Sare sai a'mwe dazahwaraavɨna sɨnnawɨ Gotɨyarɨ wɨ'nakenna a'mweraavɨ wɨjɨwakyaakelyɨ. Sai dɨna “Yɨthaanyi! Nɨmɨ tɨnna wangadaari Naangei gamɨre mamaaya tewaanya kwalaalya taawɨzanɨyarajɨ ye'mwannɨgwalaabɨpɨ'delyɨ.

¹⁵ Sai a'mwe yuyaraavɨ yawɨbwasagaa' kayaa'nanya' naanna wɨrɨvɨkɨradelyɨ. Sai a'mwe gamɨnyɨ bule'na wɨjaavadɨvɨsara jɨdavade'na sahwara kumɨre bule wɨjaaya sabwina yadɨvɨsanna nayaa yɨbwakɨbɨ'dere. Yɨ yuya sanna bule wɨjaayabwina jawɨbwarya'negaa'. Nabaai kayaa'nanya dazara bule'na wɨjaavadɨvɨsara Naangerɨ yagaala kayaa'nanya dala pɨnɨnna pɨnɨnnanya mena wɨdesanna jɨdavade'na walaabathelyɨ.”

¹⁶ A'mwe dazara naangeraavɨ bulayagaala dadɨvɨsare. Sahwara yuya kumɨnyɨ yɨma'nade sanna jɨkurya yɨna yadɨvɨ' munyɨ' kayaa'na yadɨvɨsare. Kumɨre munyɨ' dɨkaa'da dɨkebɨ' yɨdamaryadikɨ. Sara yadɨvɨ' sahɨbwi mɨdɨdɨvɨsare. Sahwara yaasɨwa' kumɨnne yaya' jaka danganamaryadɨvɨ' kumɨnne yayanna makinadɨvɨsare. Pɨgaa' a'mwe pwaraavɨ wabwiwayagaala wɨdadɨvɨ' kumɨre gɨlyɨvɨsa mwagi'nya'nenna. Sarerera.

Dɨragɨnna lɨmwangebwi nayaa dɨragɨnna lɨmwagarya'nebwinesɨ.

¹⁷ Kɨrɨ', nya'mweihɨrɨna tewaanya nyɨvu'nadeihi, nemɨre Naangei Jizaazai Kɨraazɨtɨyare wɨdaasaderaavɨre yagaalya ayɨna nayaa jawɨrila! Sɨnnawɨ kɨgaa' wɨjɨwaakesasɨ.

¹⁸ Dara yɨhɨthesaihɨlyɨ “Dɨvi aaya yɨma'nadehaa' a'mwe pwara puri'nyarabɨ' Gotɨyare sabwina jɨka gyangadɨvɨ' bɨraiyagaala dɨpɨ'derera. Sara yadɨvɨ' Gotɨyarɨna bule'na wɨjaavadɨvɨ' kumɨre munyɨ' yaasɨwa' dɨke'bɨ' yɨdamaryadikɨ.”

¹⁹ A'mwe dazara Naangereraavɨ jaapaidɨvɨsare. Sahwara a'mwe Kwaakevakɨyaraavɨre sɨmunyabwi mɨdɨdɨvɨ', yɨ Kurya Tewaanyai maayara.

²⁰ Kɨrɨ', nya'mweihɨrɨna tewaanya nyɨvu'nadeihi, yuyagaa' sarɨmɨre dɨragɨnna lɨmwanga yune nawɨ'nyaanga saburɨne'na yune sarɨmɨre sɨmunya' dɨragɨnya nayaa jɨvaimwagila! Yɨ lɨkɨlyavɨ a'ba madɨvɨtabaaibɨ' yagaala Gotɨyai nedake dɨragɨnya je'mwagyɨla! Sara yadɨvɨ' nabaai yuyagaa' Kurya Tewaanyai wɨlayɨhɨmwaaidori ye'mwagakɨyagaalyavɨna nayaa jɨthaanganyideihɨlyɨ.

²¹ Sarɨmɨ Gotɨyai sarɨmɨnyɨna wɨvu'nadevurɨ nayaa kuna dɨmwaalyɨla! Yuyagaa' Gotɨyare wɨvu'nya'nebwi nyagalya'mapɨdɨka! Nemɨre Naangei Jizaazai Kɨraazɨtɨyai gamɨre kale gaimwange' ku'maayaba maryalɨku'naraabathevɨna jemwaalyidehaa'na kuna sara jɨla! Sarevɨ nabaai sarɨmɨ yuyagaa' yuyagaa' nayaa dɨvada'galemwaalyide gaala nebulyabwi maarya'neihɨlyɨ.

²² Sarɨmɨ a'mwe pwara dɨragɨnna lɨmwangebwi nayaa tɨhu'na malɨmwagi, maalɨ'na yagalya'ma'dɨvɨsaraavɨna kale nayaa yɨhyana! Nayaa duhaimwagyɨla!

²³ A'mwe pwara dɨkevɨbɨ' mwaaidapi sarevɨ sahwaraavɨ yɨme'nya'bɨ' dɨvadaihasamaarila! “Nɨmɨ kayaa'nanya sa' nyɨwɨdɨka!” dɨdɨvɨ' lɨka nayaa yadɨvɨ' a'mwe saraavɨna kale nayaa yɨhyana! Kɨrɨ' mala nayaa jɨwannyɨla! Kumɨre kɨlaakevɨya sɨmunya sabwi kumɨre baazɨ'ma'nya gɨrɨkita'nanya sabɨsabulyɨ. Sahwaraavɨ wɨgaimwadɨvɨ' sasare dazaburɨna sarɨmɨ yuyagaa' menyaba dɨmwaalyɨla!

Gotɨyarɨne yaya' munyaba makɨlya'nebwinesɨ.

²⁴ Gotɨyai sai sarɨmɨnyɨ yɨnɨga wi'na yɨhɨmaremwaaidori yɨ yɨhɨmaredaa'dori sarɨmɨ mwalaraawi jideihɨlyɨ. Sai sarɨmɨnyɨ yɨnɨga wi'na yɨhɨmakwawojɨ gannyaba nawɨ'nya byaannakeryawɨ yɨhɨmwaaihadeihɨlyɨ. Nabaai sarɨmɨ yɨwetawakya pɨnɨ mwari yɨhyana! Sarevɨdaa'nyɨ nabaai yɨlaaya naangebwi yɨhwaradeihɨlyɨ.

²⁵ Gotɨyai yune gavei sahwaina mwaalɨkei. Sare sai Jizaazai Kɨraazɨtɨyare wawɨnyavɨna nemɨnyɨ nevadaihasamaarakelyɨ nemɨre Naangerɨna. Nemɨ gamɨnyɨne yaya' munyaba nayaa makɨlaana! Sai nemaremwaaide Kingɨya gavei kuna mwaalana! Sarei dɨragɨnya naange' kɨnɨnnakei kuna mwaalana! Yuya sangɨne'na aaya kaavɨlyai kuna mwaalana! Yuya sɨnnawɨ kɨgaasɨ nabaai dahaa' kɨgaasɨ nabaai dɨvi yuya kɨgaakɨgaasɨ sarei kuna mwalɨbainagwona! Sahɨrɨsɨ. Nebula naangesɨ. Juthɨyai