Jemɨzai 1 - Yipma

¹ Yɨzɨrelɨdaa'nya sɨvɨlɨrɨdaa'nyɨ pwaraala yɨsavaakɨdaa'nyaihi, Jemɨzainyɨ Gotɨyarɨjɨ Naanga Jizaazai Kɨraazɨtɨyarɨjɨ yaasɨwa'wawɨnyainyɨ yɨda'mwesɨ. Sarɨmɨ sarɨnnya anga naangeba yagalya'ma'dɨvɨ' kwaaka maave pɨwɨ pɨwɨ mwaimanaawɨgasaihɨrɨnesɨ. Sareihɨrɨ yɨhɨthɨma! “Nya'mweihi!”

Yɨjɨwaalyabwi kɨrɨ' dɨragɨnya yɨvaimwanga neyadevwinesɨ.

² Nɨmɨre nya'mweihi, yaamɨjɨ yɨjɨwaala dala pɨnɨnnanyabwi kayɨhima'nojɨ yɨ sarɨmɨ dara yawɨpɨja “Sa nemɨ yune yɨlaaya ya'nennanyangɨra.”

³ Sare' sarɨmɨ dara yawɨ'manɨga'. Sarɨmɨnyɨ yɨjɨwaala ya'ne yɨma'naabada sarɨmɨre dɨragɨnna lɨmwangebwi yaamɨjɨ yɨhyade. Sara yɨhyaja sabwi “Taanginya yuyangɨne'na dɨragɨnna daavɨna yɨwaava!” nejɨwɨrya'nebulyɨ.

⁴ Nabaai Gotɨyai “Sarɨmɨ naanga yune nebulya'nanyaihi jɨma'nyɨla! Sɨmunyavɨ yunebanna pada'galemwaalya'neihi yuyagaa' dɨragɨnna daayabwi tewaanna tɨvi'na yɨhɨmwaaihana!” kada' sara yɨma'nɨvanɨ'. Yɨ dɨragɨnyaihi mwaaibɨza' sarɨmɨnyɨ Gotɨyare aane pɨbwina aane kɨbwina yɨhɨmudaasadeihi mɨ'.

⁵ Nabaai sarɨmɨnyɨdaa'nyɨ a'mwe pwai kwarɨ sɨmunya nawɨ'nyabwina wɨmudaasaja' sai sɨmunya wɨjaavade'na Gotɨyarɨ yɨdaanganana! Sara yɨdaanganaja' Gotɨyai sahwarɨ wɨjaavadelyɨ. Gotɨyai sai yuyaraavɨna yanga kwalaalya nayaa wɨjaavadei, nabaai sai a'mwe wɨmudaasaderaavɨna mayagaala dadei mɨ'.

⁶ Kɨrɨ' a'mwe dazai Gotɨyarɨ nayaa dɨragɨnna lɨmwada yɨdaanganana! Dara nyawɨralɨmwagathɨka! “Nɨmɨ yɨdaangamwe daza' Gotɨyai nyɨjaavadeinyɨ dɨngaka? Aawa!” Sare' dare'nanyɨ. A'mwei sɨmunya pɨrɨwaai kɨnɨnnakei, saalaalyavɨ yɨhusa' pwaladɨkaa'da aalɨmavajɨnaake' akinamuna yadevaaibɨ' gamɨre sɨmunya' sasarelyɨ. Sahwai taabɨrɨwaizɨmunyasɨyai.

⁷ Sare' darevɨnyɨ. A'mwe sasarei kwaasɨ dara myawɨranna! “Naangei nawɨ'nya pɨnɨ nyɨjaavadeinyɨra.”

⁸ Aawa. A'mwe dazare sɨmunya' yaasɨwa' yɨwɨnakamarya yadesɨ. Yuya gamɨ yade saburɨ sai tuta yune gave pɨrɨvɨna mɨdɨdei mɨ'.

⁹ Neya'mwei gɨlyɨvɨta maayai dalaangevɨ mwaalɨkei Kɨraazɨtɨyarɨna yɨlaaya yadelyɨ. Kɨraazɨtɨyarɨna Gotɨyai sahwarɨ munyaba makimwake'na yɨlaaya yana!

¹⁰ Nabaai neya'mwe gɨlyɨvɨkɨravɨnakei Kɨraazɨtɨyarɨna yɨlaaya yadelyɨ. Gotɨyai sahwarɨ gamɨre gɨlyɨvɨsanna dalaangevɨ marulawakaka kɨrɨ' sahwarɨ maa'mwake'na yɨlaaya yana! Kurɨvaarɨyangɨre pwata yɨ'nade bwalapɨraihɨra'na yadevaaibɨ' gamɨre gɨlyɨvɨsajɨ yɨwawade'nanyɨ.

¹¹ Sare' darevɨnyɨ. Nyɨlyai bilyɨrɨ'daa'nyɨ dɨ'daanya naanga wi'nadaa'nyɨ kurɨvaarɨya daza yɨnahu yawaka balasɨ'na yadengɨ. Gamɨre pwata kɨnɨjɨ bwalaraawɨna yada gamɨre tewaanya wannade sajɨ yɨnahu kayaaka yɨma'nyɨna. Sasare sahɨbaaibɨ' a'mwe gɨlyɨvɨta kwalaalyajɨyai sai tɨnnyaba gamɨre wawɨnya yade yuya sangɨ yɨwawadelyɨ.

¹² A'mwei yaamɨjɨ yɨjɨwaala yuya sangɨ taanginya maarajai kwai dɨragɨnna daa'dei yɨlaaya yada tewaanaanga yɨnɨkelyɨ. Sare' dare'nanyɨ. Yɨjɨwaala yuya mena wavɨlavojɨyai kuna dɨragɨnna lɨmwagarojɨyai, sarɨna Gotɨyai gaalyabwi wɨjaavadelyɨ. A'mwe gavamarasɨ'nyɨkaanya' wavɨla'dɨvɨsaraavɨne tɨvɨkɨsa' wɨjaavadɨvɨtabaaibɨ' Gotɨyai mena yawɨramaa'dei gaala sa' wɨjaavadelyɨ. Yɨ sɨnnawɨ Gotɨyai gaala daza' a'mwe yuyara gamɨnyɨna wɨvu'naderaavɨna wɨjaaya'na yune naanga nebulya'na wɨdakelyɨ.

¹³ Nabaai yɨjɨwaala sa a'mwe pwai kware sɨmunyavɨ yɨdɨkaavojɨ kayaa'nanyabwi ya'na kumwagi'nojɨ aane pwai kwai dara madanna! “Dazabwi ya'na Gotɨyai nyɨmwagi'nɨwake'nanyɨ.” Aawa. Sare' darevɨnyɨ. Kayaa'nanyabwi Gotɨyarɨdaa'nyɨ mwagi'nadevwi mɨ'. Nabaai Gotɨyai a'mwei kayaa'nanya yajarɨ mwagi'nadei mɨ'.

¹⁴ Aawa. Nemɨnyɨdaa'nya gazaizare sɨmunyavɨdaa'nyɨ dɨkaa'da wɨmwagi'nadelyɨ. Yune nennya yawɨta kayaa'nanya dazabwi nemɨnyɨ wabwiwanga neyadevulyɨ. Sara yada nemɨnyɨ kwaasɨ nedada kayaa'nanyabwi ya'na nedɨhaa'bwa'devulyɨ.

¹⁵ Nabaai sɨmunya' dɨkaata dazabwi, kaimɨraavɨmunyabɨ' wannada dɨvidaa'nyɨ gamɨre kaimɨraavɨbwaranyabɨ' kayaa'nanya dala pɨnɨnnanya maa'desɨ. Dɨvidaa'nyɨ kayaa'nanyabwi naanga yɨma'nada barya ya'nebwi marima'naabadevulyɨ.

¹⁶ Nɨmɨre nya'mweihɨrɨna tewaanya nyɨvu'nadeihi, kwaasɨya sabwi sarɨmɨ wanganakɨna yadaapi sarɨmɨnyɨ kwaasɨ nayɨhɨthathɨka! Gotɨyai kayaa'nanya ya'na mwagi'nadei mɨ'.

¹⁷ Yuya tewaanya yanga wɨjaaya sabulyɨ yuya sɨhumale naanga yune nebulya'nanya sabulyɨ yuya daza Gotɨyai Sɨgunyavɨ mwaalɨkeryawɨdaa'nyɨ waidaavadengɨra. Baaka yuya, yɨ nyɨlyalyɨ lawelyɨ sɨlɨngaamɨnyajɨ yuyaraavɨne Gyakwalaangei daza nemɨnyawɨnna maryasaabadengɨra. Nenɨmaanga dazai gamɨre sabwi yaasɨwa' maroyɨmaa'nya yadei mɨ'. Sai pɨnɨ nyɨlyayaba a'mabaala yɨ'devaaibɨtai mɨ'. Saamɨnaanga wannada ayɨna tuta yɨbwa'mwadevaaibɨtai mɨ'.

¹⁸ Sai yune gannya sɨmunya saburɨna mɨdɨda gamɨre yagaala nebulyavɨ neyɨma'naabakelyɨ. A'mwe yuya gamɨ wɨmwaaihade saraavɨna aaya mudɨ'nanyaina mwaalya'neinaavɨ neyɨma'naabakeine.

Nemɨ kadɨka nayaa wɨ'nadaa nayaa sara yaade'nesɨ.

¹⁹ Nɨmɨre nya'mweihɨrɨna tewaanya nyɨvu'nadeihi, darengɨ nayaa jawɨramaarila! Gazaigɨzaigɨ yagaalya' kadɨka wɨ'nya'na yarai yemwaala ja! Kɨrɨ' yagaala ja'na yɨme'nya'bɨ' nadɨthɨka! Nabaai mayagaalya' yɨme'nya'bɨ' nadɨthɨka!

²⁰ Sare' darevɨnyɨ. A'mwere sɨnna tɨke' Gotɨyare yɨda'maraangebwi sahwarɨ wɨvu'nadevwi marima'naabade' mɨka.

²¹ Sarevɨ gɨrɨkita'nanya yuya sabulyɨ kayaa'nanya kwalaalya naanga yɨma'nade sabulyɨ sasare daza dasɨ'nyɨla! Nabaai sarɨmɨ saihi kwaamu'nanyabwi nayaa mɨdɨdɨvɨ' yagaala Gotɨyai sarɨmɨre sɨmunyavɨ wia yɨhɨburɨmanɨke nayaa dɨmaaryɨla! Yagaala daza' sarɨmɨre kuryaraavɨ yɨnɨga wi'na yɨhɨvadaihasamaaradesɨ.

²² Kɨrɨ' sarɨmɨ yagaala daza' nayaa jɨla! Sarɨmɨ yune kadɨki'na mu'nakɨpɨnera! Kadɨki'na wɨ'nakɨpɨja' sarɨmɨ saihɨrɨna kwaasɨ yɨmanɨgava.

²³ Dare'nanyɨ. A'mwe pwai Gotɨyare yagaalya' yaasɨwa'na wɨ'nakajai sai nayaa mamɨdɨnyajai sai dare'bɨsalyɨ. A'mwei gannya sɨnnyɨkɨ sɨnɨmwavananyavɨ yennadevaaibɨsalyɨ.

²⁴ Sare' darevɨnyɨ. Sai gannya sɨnnyɨkɨ yennaka sangirɨ' kɨbawebanna woda yɨme'nya'bɨ' navɨka yɨwannyɨna yakelyɨ “Sɨnnyɨ' nɨmɨ gatha'dareinyɨ dɨngaka?” Sabaaibɨ' sai Gotɨyare wɨja navɨka yarai yadelyɨ.

²⁵ Kɨrɨ' kɨwɨnya daza' kayaa'nanyabure kalavuzɨwawɨnyavɨ ayɨna nemaa'de' sa' yune yɨda'maraange' yɨ dɨnɨka dazavɨre aaya kaavɨlya' a'mwei nayaa yawɨranganojɨ kuna mɨdɨnajai yɨ a'mwe dazai yɨlaaya yada tewaanaanga yɨnɨkei mwaaladelyɨ. Sai yaasɨwa' kadɨke'na mu'nakyada navɨka myanna! Aawa. Gotɨyare yagaala tewaanya' sara yana! Yɨ dazarerɨ Gotɨyai tewaanya wiadelyɨ.

²⁶ A'mwe pwai kwai dara yawɨ'na “Nɨmɨ yɨda'maraanga tewaanyainyɨ. Gotɨyarɨ yɨlaaya nebwina yadɨnyainyɨra,” kɨrɨ' gamɨre maangevɨ nayaa mamaremwaainyai sare sai gannya sɨmunyavɨ kwaasɨ dɨdelyɨ. A'mwe dazare dɨragɨnna lɨmwangebwi, yɨlaaya maryabwi yaasɨwakebulyɨra.

²⁷ Yɨda'maraangebwi nawɨ'nya gɨrɨ'maaya mwaalyabwi Gotɨyai Nenɨmaangere tɨnnyarɨ yɨwetawakya maaya yɨma'nya' daresɨ. Sɨgɨraayaraavɨjɨ yaanyɨwaakengɨjɨ sare samɨlɨka taanginya maa'manɨgasamɨlɨkaavɨna nemɨ nayaa gaimwagaatheine. Nabaai nemɨre kaanya yamaryabwi nayaa maremwainaana! Kwaaka davakɨya dazabwi nemɨre sɨmunyangɨ gɨrɨkita naneyɨgaladɨka! Sasaresɨ.