2 Pitai 1 - Yipma

¹ Nya'mweihi, Saaimonɨ Pitainyɨ Jizaazai Kɨraazɨtɨyare yaasɨwa'wawɨnyainyɨ. Sahwai gannya yagaalya' Nyɨdasaabadeinyɨ Apozelɨyainyɨ. Sareinyɨ pɨkarya daza' yɨhithawasɨwaabe. Yɨ a'mweihɨrɨna, Kɨraazɨtɨyarɨ dɨragɨnna lɨmwanga nawɨ'nyabwi mena maaresaihɨrɨna yɨhithawasɨwaabe. Sarɨnnya nawɨ'nya dazabwi nemɨ maaro dɨragɨnna lɨmwanga avaala dazabulyɨ. Lɨmwanga dazabwi nemɨre Gotɨyai nevadaihasamaarakei Jizaazai Kɨraazɨtɨyare tewaanya yɨda'maraangevɨ mena yɨhɨzaavakebulyɨ.

² Gotɨyalyɨ Jizaazai nemɨre Naangelyɨ saraarɨ nebulya'na yawɨramaa'dɨvɨsavɨ sarɨmɨnyɨ yanga gaimwange'na tewaanna wia'nesɨ kwaamu'nanyaburɨ tewaanya mwaalya'nesɨ naanna yɨhwarana!

Gotɨyai jaka nejɨvwaramaasabulyɨ yune gamɨnneinaavɨ nedahɨlakyabulyɨ sawaarɨnesɨ.

³ Gannya dɨragɨnya Gotɨyarɨdaa'nyavɨ Kɨraazɨtɨyai nemɨ gaala yɨnɨga wi'na mwaalya'nejɨ Gotɨyareburɨnejɨ sa yuya yanga nejaavakelyɨ. Nemɨ Kɨraazɨtɨyai gamɨ sarɨ nebulya'na yawɨrangadaanya'ne'na yuya daza nemɨrengɨra. Yɨ gannya byaanna dɨragɨnyasɨ gannya tewaanaangesɨ nejaaya'neinaavɨ jaka nejɨvwaramaarake'nanyɨ.

⁴ Sawaarɨdaa'nyɨ nemɨnyɨne yune naanga nebulya'na daka nawɨ'nyaangejɨ yune naangejɨ mena nejaavakengɨ. Sare' dara ya'na. “Yune naanga nebulya'na dena sangɨ yɨ munyɨ' dɨkaata sabwi a'mwe Kwaaka davakɨyaraavɨ wɨwa'deraavɨ wana kayaaka wigalakadevurɨ gɨmɨ lɨkaanya yenadaava'gɨzɨ kayaaka yɨma'nade sabwi davɨlaka!” daka naanga gɨzaavakengɨ. Nabaai sara ya'gɨzɨ gaalyasɨ yune Gotɨyare yawɨsabulyɨ je'mwannamaa'de'nanyɨ. Yɨ Gotɨyaibɨsaigɨ jɨma'nade'nanyɨ. Sare'na mena nejaavakengɨ.

⁵ Sabaaibɨ' nabaai gɨmɨ dakɨnɨke dazahɨrɨvɨnajɨ nayaa yawɨ'dɨ dɨragɨnna yadɨ gɨmɨre dɨragɨnna lɨmwangeburɨjɨ tewaanyabwi je'mwagakya! Nabaai tewaanyaburɨjɨ Gotɨyare sɨdu'nakebwi je'mwagakya!

⁶ Nabaai sɨdu'nakeburɨjɨ gɨmɨre kɨlaakejɨkɨne saburɨ nayaa maremwaalyabwi je'mwagakya! Nabaai maremwaainyaburɨjɨ taanga gwa'dɨ'nyɨ dɨragɨnna daayabwi je'mwagakya! Nabaai dɨragɨnna daayaburɨjɨ Gotɨyainebwi je'mwagakya!

⁷ Nabaai Gotɨyaineburɨjɨ neya'mwerajɨ nya'mwana mwaalya sabwi je'mwagakya! Nabaai neya'mweraavɨ ye'mwannemwaala saburɨjɨ pwaraavɨna tewaanya gɨvu'nada tewaanna wiabwi je'mwagakya!

⁸ Sare' dare'nanyɨ. Gɨmɨnyɨ yuya sa kuna gwa'dɨ'nyɨ sasare sabwi kuna naanga yɨma'nadevulyɨ. Nabaai yawɨta sa' yaasɨwa'na warade' mɨ'. Savɨ tɨka munne kwalaalya yɨma'nadengɨ. Sarevɨdaa'nyɨ nemɨ Jizaazai Kɨraazɨtɨyai nemɨre Naangerɨ nebulya'na yawɨranganaade'nanyɨ.

⁹ Nabaai sare' dare'nanyɨ. A'mwe sasare sabura maayai yuya Sɨgunyaba warɨke tɨnna wangadei mɨ'. Sai tɨnna tɨbɨnyalyɨ. Gotɨyai gamɨre yuya kayaa'nanya sɨnnawɨ yake sa duimwagasɨ'nake' navɨka mena yadelyɨ.

¹⁰ Nya'mweigɨ, sarevɨdaa'nyɨ sabwi minna! Aawa. Dɨragɨnaanga yadɨ dara jawɨramaaka! “Gotɨyai jaka nejɨvwaramaaraka sabulyɨ gamɨ sahwarɨneinaavɨ nedahɨlakaka sabulyɨ kuna dɨragɨnna yawɨraana! Sareina dazaburaavɨ nayaa yamaryaana!” Sare' dare'nanyɨ. Gɨmɨ sara yɨja' mwalaraawi jɨtheigɨnyɨ. Arɨkewɨ.

¹¹ Nabaai sare' dare'nanyɨ. Gɨmɨ sasare sabwi mɨdɨdɨza' nemɨre Naangei nevadaihasamaa'dei Jizaazai Kɨraazɨtɨyai maremwaaidevɨ tɨkurya' yunebanna baasada nawɨ'nya sahɨrɨvɨ yanga naange'na gɨmwaaihozɨ gɨmɨ yuyagaa' yuyagaa'nevɨ dɨmwaaide'nanyɨ.

Kɨraazɨtɨyarɨne Wɨdaasadera tɨnna wanganesa'nesɨ.

¹² Sasarevɨdaa'nyɨ sarɨmɨ yuya dazangɨ mena yawɨrangadɨvɨ' mena maa'dɨvɨ' yagaala nebula dazavɨ dɨragɨnna daaveta kɨrɨ' sarɨmɨnyɨ ayɨna yɨdɨkavɨmwaaihya' yuya sagaa' sa'na jawɨryide'na “Sarɨmɨnyɨ ayɨna yɨhɨthɨma!” dadɨ yɨhithawasɨvanaabɨhe.

^13-14 Nemɨre Naangei Jizaazai Kɨraazɨtɨyai nyɨbwarɨdaakwake' nɨmɨre kɨlaakejɨ' sɨmɨnya'bɨsajɨ' yagalya'mavɨdehaa' maalɨkegaa' wa'dozɨ yune maalɨkegaa'na balɨdeinyɨ. Sara yawɨ'manɨge'najɨ nabaai nɨmɨ “Darebwi nawɨ'nyabulyɨ. ‘Yuyagaa' kɨlaaka sajɨkɨna nɨmɨ kuna mwaaidɨ sarɨmɨre sɨmunyangɨ yɨdɨkavɨmwaaihya'na ayɨna sara yɨhɨthɨdeinyɨ,’ ” yawɨ'manɨge'najɨ kuna sara yɨhɨthɨdeinyɨ. Sare' nawɨ'nyasɨ.

¹⁵ Sare'na sarɨmɨnyɨ wɨjɨwaakya' dɨragɨnna yɨde'nanyɨ. Nabaai dɨvi nɨmɨ mena kabala'muri yuyagaa' sarɨmɨ yagaala daza' ayɨna jawɨryide'nanyɨ. Yɨ sarɨmɨ tɨnna wanganapɨjɨ “O, Pitai sara nedakesɨ,” jawɨryide'na yɨhithawasɨvanaabɨhe.

¹⁶ Sare' dare'nesɨ. Nemɨ mena yɨhɨthɨvanɨgo nemɨre Naangei Jizaazai Kɨraazɨtɨyare dɨragɨnya'na, nabaai sahwai ayɨna bathevwinesɨ sarɨmɨ mena yawɨ'dɨvɨsaihɨlyɨ. Kɨrɨ' nemɨ yaasɨwa' wajɨngyagaala sɨdu'nakebɨ' dɨnɨka mamɨdɨnyadaa gamɨre yagaala daza' mihɨzo. Aawaawa. Nemɨre tɨnnyarɨ Gotɨyare dɨragɨnya' maarakerɨ nemɨ tɨnna wanganorɨna. Sarevɨdaa'nyɨ nemɨ jalɨkurakɨvanɨgo.

¹⁷ Sare' dare'nanyɨ. Ganɨmaangei Gotɨyai sahwarɨne yaya' munyaba makida byaanna nawɨ'nya' wɨjaavaka gamɨre Sɨgunyavɨya byaanna naange' gamɨre maremwaalyaburɨne' savɨ mwaalakebadaa'nyɨ Gotɨyai dake yagaala datha' Jizaazarɨna yasaaba' “Dazai nɨmɨre Nyɨbwaalɨvaangelyɨ. Sahwarɨna tewaanya nyɨvu'nɨvanɨ'. Sahwai yɨlaaya nyɨgaidelyɨ.”

¹⁸ Nemɨ gamɨjɨ mugunya nawɨ'nya' gɨrɨka maaya' savɨ ye'mwannemwaalona yagaaimaangwɨraaya daza' Sɨgunyavɨdaa'nyɨ kinnɨgava' nemɨ kadɨka mena wɨ'nagovɨnera.

¹⁹ Sarevɨdaa'nyɨ nemɨ Gotɨyarɨ wɨ'nawɨjɨwakyaasaraavɨre yagaalya' dɨragɨnna naanna yawɨrama'daanyaine “Yo. Sa' naanga nebulyasɨ.” Nabaai sarɨmɨ kwaihɨlyɨ kumɨre yagaalya' dɨragɨnna lɨmwabɨza', sa' naangesɨ. Mugunyavɨ tɨnna wangano sa' maalɨkesɨ. Gotɨyarɨ wɨ'nawɨjɨwakyaasaraavɨre yagaalya' wavɨla'nɨke' dɨ'baakei jɨhɨnyawɨ baaka wɨlalɨwarɨkeibɨsasɨ. Yɨ sa' kuna lɨwa'da yune Kɨraazɨtɨyarɨne yɨrɨkegaa'na. Sara yada yɨrɨkevakɨ bilyɨrɨ'de kaabwe' wannadevaaibɨ' Kɨraazɨtɨyai walaabathehaa' gamɨre byaanna sarɨmɨre sɨmunyangɨ yuna wɨlayɨhɨthɨkaavadelyɨ.

²⁰ Yagaala dazavɨne yawɨta sɨnnawɨnya' daresɨ. Nayaa yawɨranganna ja! “Gotɨyare Bukuyavɨ Gotɨyarɨ wɨ'nawɨjɨwakyaasaraavɨre yagaala gazasavɨ aaya kaavɨlyavɨna nennya yune sɨmunya gavengɨna mamɨdɨnaanna!”

²¹ Sare' dare'nanyɨ. Kɨgaakuna a'mwe pwai gamɨre sɨmunyavɨdaa'nyɨ Gotɨyarɨ wɨ'nawɨjɨwaakɨyagaalya dakai mɨ'. Aawa. Kurya Tewaanyai a'mweraavɨ kadɨhaa'bwara' yagaala Gotɨyai wɨjaavaka sa a'mwe tewaanyara pwaraavɨ wɨjɨwaakɨna yɨna yesangɨ. Sare'na Gotɨyare Kuryai negaimwadaawojɨ aaya kaavɨla sa' yawɨramaraade'nanyɨ.