1 Timoti 1 - Yipma

¹ Polɨnyɨ pɨkarya yɨda'manɨgeinyɨ. Kɨraazɨtɨyai Jizaazai nyɨdaasadeinyɨ. Gotɨyai nevadaihasamaa'delyɨ Jizaazai Kɨraazɨtɨyarɨ yemwaidaanyalyɨ dɨragɨnna nyɨdahɨla “Apozelɨyaigɨnyɨ gɨthaasakadeigɨnyɨ,” nyɨdahɨlakagɨlyainyɨ.

² Sareinyɨ Timotigɨnyɨ pɨkarya datha' githawasɨwaabe. Kagɨthe Naangereigɨ yɨma'nagɨna gamɨre yagaalya' mɨdɨdɨnya'na nɨnnya kaimɨraaya nawɨ'nyaigɨ mwaaihɨ. Sareigɨnyɨ Gotɨyai Nɨmwalyɨ Kɨraazɨtɨyai Jizaazai nemɨre Naangelyɨ yange'na tewaanya gɨhaimwagika! Kale'na gɨhaimwagika! Kɨrɨmɨre kwaamu'nanyabwi gɨzaayɨka!

Kwaasɨya wɨjɨwaakadɨvɨta sabwi wasɨta'nesɨ.

³ Kɨgaa' “Maazathonɨyana wɨma!” dena mena gɨthe sasarevɨ nabaai dahaakɨgaa' ayahi dɨragɨnna gɨthɨvanɨge. Anga Epazaazɨ kuna mwaala'gɨzɨ a'mwe pwaraavɨ dɨragɨnna dara duthatheigɨnyɨra “Kwaasɨya ge sabwina nujɨwaakɨpɨka!”

⁴ Sahwara wajɨngyagaala yaasɨwa'na wɨjɨwaakɨna. Kumɨrebwine yaya sabwi yuyabwi wɨjɨwaakɨna. A'mwe gazaizai mɨjɨma'nɨgaveta saraavɨne yayanna wɨjɨwaakɨna. Wɨjɨwaakɨna yɨvanɨgata kɨrɨ' yaasɨwa'nanyangɨna yawɨta kwalaalya yɨvanɨga'. Gengɨra. Sasareraavɨ dɨragɨnna duthatheigɨnyɨ “Sabwina mujɨwaakɨpɨna!” Gotɨyarɨna dɨragɨnna lɨmwanga saburɨ wɨgaimwade mɨ'.

⁵ Sare' a'mwe pɨmɨlɨkaavɨ wɨgaimwabɨ'de'najɨ kumɨre kale wiadevwi dɨragɨnya yune'na yɨma'nade'najɨ sara dɨragɨnna duthathe'nanyɨ. Kale wia'ne sa' sɨmunya tewaanyavɨdaa'nyasɨ. Nabaai sɨmunyai padaihɨrakya nawɨ'nyarɨdaa'nyasɨ. Nabaai Gotɨyarɨ wɨ'nalɨmwanga nebulyavɨdaa'nyasɨ. Yagaala dɨragɨnya saburɨ yɨdɨkavɨmwaaihya yadesɨ.

⁶ A'mwe sahwara sasare sabwi yagalya'ma'na yadɨvɨ' yaasɨwa' yagaalyanna yɨraataate yamaryadɨvɨsare.

⁷ “Gotɨyare Kɨwɨnya dɨnɨkengɨ naangeina mwalaana!” yawɨ'dɨvɨ' dɨragɨnna dara dadɨvɨsare “Nemɨre yagaalya' nebulyasɨ.” Kɨrɨ' kɨwɨnya yagaala sa' myawɨranganyara, aaya kaavɨlya' myawɨranganyara.

⁸ Nemɨ mi'na yawɨ'manɨgo. Gotɨyare Kɨwɨnya' tewaanna marayaaja' nawɨ'nyasɨ. Kɨrɨ' a'mwe sahwara kayaa'na dakadɨvɨsasɨ.

⁹ Kɨwɨnyangɨne' yawɨraana! Gotɨyai kɨwɨnya dɨnɨke a'mwe yɨda'maraangerɨnanne'na mɨ'. Aawa. A'mwe kɨwɨnya galazekɨvaidɨvɨ' Gotɨyarɨ yagaala mamɨdɨnyadɨvɨsaraavɨnesɨ. Gotɨyarɨ bule'na wɨjaavadɨvɨ' kayaa'nanyabwi yadɨvɨsaraavɨnesɨ. Gotɨyarebwina “Aala!” dadɨvɨ' Kwaakevakɨyabwi mɨdɨdɨvɨsaraavɨnesɨ. Ganɨmaangerɨ tamakadɨvɨsaraavɨne', ganaangevɨ tamakadɨvɨsaraavɨne', a'mwe pwaraavɨ tamakadɨvɨsaraavɨnesɨ.

¹⁰ A'mwengɨ ata lɨmwadɨvɨsaraavɨne', a'mweraavɨ ata lɨmwadɨvɨsaraavɨnesɨ. A'mwera a'mweraavɨjɨ a'mwengɨjɨ kuka maa'dɨvɨsaraavɨnesɨ. Kwaasɨ yagaala dadɨvɨsaraavɨne', kwaasɨ yagaala jalɨkurakadɨvɨsaraavɨnesɨ. Yɨ dazabulyɨ pɨbulyɨ yadɨvɨ' wɨjɨwaakya maamɨdaryavɨ yɨkamaangebwina yadɨvɨsaraavɨnesɨ. Sasareraavɨna kɨwɨnya dɨnɨke'nanyɨ.

¹¹ Wɨjɨwaakya tewaanya daza' yagaala tewaanyavɨ warɨkesɨ. Yagaala tewaanya sa' Gotɨyai kanyɨjaava' wɨjɨwaakadɨnyasɨ. Gotɨyai byaanna dɨragɨnya kɨnɨnnakei yɨlaaya yada tewaanaanga yɨnɨkei yagaala tewaanya' nyɨjaavakeinyɨ.

Polɨmɨ Gotɨyai tewaanna wiake'na “Su! Su!” wɨdake'nesɨ.

¹² “Su! Su!” yawɨ'dɨ wawɨnya sa' yadɨnyainyɨ. Kɨraazɨtɨyai Jizaazai nemɨre Naangei nɨmɨnyɨna dɨragɨnya kanyɨjaava' yadɨnyainyɨ. Sai nɨmɨnyɨna yawɨ'na “Nɨmɨre wawɨnya' kuna lɨmwadelyɨra,” sara yawɨ'na yaka wawɨnya wɨdaaya dazavɨ nyɨmwaaihakeinyɨ. Sare'na “Su! Su!” wɨdadɨ yadɨnyainyɨ.

¹³ Sɨnnawɨ kɨgaa' Kɨraazɨtɨyarɨna kayaa'nanyanna wɨdadɨ gamɨnyɨ lɨmwadɨvɨsaraavɨ kayaaka yɨgaidɨ bɨraiyagaala wɨdeinyɨ. Sareinyɨ kɨrɨ' Naangei nɨmɨnyɨna kale'na nyɨgaimwagakelyɨ. Nɨmɨ nayaa myawɨryainyɨ, gamɨnyɨna malɨmwagyadɨ sara ye'na kale'na nyɨgaimwaga'.

¹⁴ Nemɨre Naangei nɨmɨnyɨ yanga naange'na yunebanna nyɨgaimwagaka Kɨraazɨtɨyai Jizaazarɨ lɨmwangebulyɨ yɨlaaya wɨvu'nyabulyɨ yanga nyɨjaavakelyɨ.

¹⁵ Yagaala gɨthɨde datha' naanga nebulyasɨ. A'mwe yuya kwara kadɨka wɨ'napɨjɨ dɨragɨnna lɨmwabɨ'de'na tewaanyasɨ. Da'dare'. Kwaakevakɨna Kɨraazɨtɨyai Jizaazai walaabakelyɨ a'mwe kayaa'nanyabwi yadaanyainaavɨ nevadaihasamaarya'nei. Kayaa'nanyabwina aaya mudɨ'nanyainyɨ nɨmɨ sahwainyɨ.

¹⁶ Sareinyɨ kɨrɨ' Naangei nɨmɨnyɨna kale'na nyɨgaimwadei nayaa nyakelyɨ. Sare'na Jizaazai Kɨraazɨtɨyai “Nɨmɨnyɨ dɨragɨnna nyɨlɨmwagapɨ'dera yuyagaa' yuyagaa'ne gaalyabwina maapɨ'deraavɨne ke'ba'nanyai Polɨ yɨma'nana! Sarevɨ sɨnnawɨ Polɨmɨna sɨnna tɨka yarai manyɨdayadevwi sahwaraavɨ wɨjɨwaainɨma!” daka gamɨre kale wɨgaimwangebwi nyɨjaava'.

¹⁷ Gotɨyai kayaa'nanyaraavɨ padaihasamaa'derɨ maryasaabake'na sahwarɨ yɨlaaya wiaana! Kingɨyai yuyagasa maremwaaidelyɨ. Sahwai yuyagaa'nei mabalyadelyɨ. Sahwarɨ tɨnna mwanganyadaanyalyɨ. Sahwai gave pwainanyai Gotɨyalyɨ. Sahwarɨ yuyagaa' yuyagaa' gamɨre yaya' makɨlaana! Sahwarɨ yuyagaa' yuyagaa' “Byaannakeigɨ!” wɨdaana! Naanga nebulyasɨ.

Timoti dɨragɨnna lɨmwada kayaa'nanyabwi maratɨvɨkɨrasɨ'nya'nesɨ.

¹⁸ “Dɨragɨnna duthatheigɨnyɨra,” gɨthena wawɨnya sa' gɨzaawa nɨmɨre kaimɨraayaigɨ Timotigɨ. Kɨgaa' Gotɨyai Kɨraazɨtɨyareraavɨ dara kujɨwaaka' “Dɨvi Timoti Gotɨyare wawɨnya' tewaanna yadelyɨ.” Gɨmɨnyɨna “Sahwai aawɨlasai yɨkamaangeraavɨ malya' dɨragɨnna bwa'devaaibɨ' mala dɨragɨnna bwarana!” dena wawɨnya sa' gɨzaawa.

¹⁹ Gotɨyare mala tewaanya' bwa'dɨ Naangerɨ kuna lɨmwadɨ sɨmunyai tewaanyai kuna gɨvadaihɨrakana! Pwara “Nɨmɨre sɨmunyai tewaanyai nanyɨvadaihɨrakadɨka! Waramaryana!” yawɨreva sarevɨdaa'nyɨ kumɨre lɨmwangebwi sɨpɨya' sɨlyavɨ kayaaka mɨlɨki'devaaibɨ' kayaaka yakebulyɨ.

²⁰ Sasarerajɨyaraai Aaimenaayazalyɨ Alekɨzaadelyɨ saraai sara yagɨlyaraalyɨ. “Saataanɨ yɨhɨmaremwaalanneraaihɨlyɨ,” kude Saataanɨ taanga wɨjaavanɨ'. “Taanga kujaavojɨ saraai Gotɨyarɨna kayaa'nanya majɨ yɨka!” dena saraarɨna sara wɨde.