1 Koridɨ 1 - Yipma

¹ Nya'mweihi, Koridɨ mwaalyaihi, Polɨnyɨ paazɨya' yɨhyasɨwaabe. Gotɨyai sɨmunya sara yawɨrakevɨ Kɨraazɨtɨyai Jizaazai nyɨdaasadeinyɨ apozelɨyainyɨ yɨma'nya'neinyɨ nyɨjɨvwaramaarakeinyɨ. Nabaai Sozɨthenɨzai neya'mwei nɨmɨjɨ mwaalɨkelyɨ.

² Gotɨyare kusɨlaanyavɨyaihi Koridɨ mwaalyaihɨrɨna yɨhithawasɨvanaabɨhe. Kɨraazɨtɨyai Jizaazarɨ sarɨmɨre gɨrɨkita'nanya duimwagasɨ'nɨkeihɨrɨ Gotɨyai yɨhɨzɨvwaramaarake'na Gotɨyareihi yuna tewaanyaihi yɨma'nesaihɨlyɨ. Nabaai anga yuyabanya yuyara nemɨre Naangei Jizaazai Kɨraazɨtɨyarɨne yayavɨ yɨlaaya wɨdadɨvɨsara Gotɨyare tewaanyara yɨma'nesare. Yɨ sahwai kumɨnyɨ Naangei yaka nemɨnyɨ Naangelyɨ.

³ Nemɨre Nenɨmaangei Gotɨyalyɨ Naanga Jizaazai Kɨraazɨtɨyai kwalyɨ tewaanya yange'na yɨhɨgaimwagika! Kɨrɨmɨre kwaamu'nanyabwi yɨhwarana!

Polɨ Gotɨyarɨ “Su! Su!” wɨdake'nesɨ.

⁴ Kɨraazɨtɨyai Jizaazarɨ wɨlamwaaihasa'na Gotɨyai gamɨre tewaanya yangebwi sɨhumale yɨhɨzaavakelyɨ. Sarevɨ yuyagaa' sarɨmɨnyɨna Gotɨyarɨ “Su! Su!” wɨdadɨnyainyɨ.

⁵ Sare' dare'nanyɨ. Kɨraazɨtɨyarɨ wɨlamwaalesavɨ Gotɨyai sarɨmɨnyɨne yuya yunebanna yɨhyakelyɨ. Yɨ yuya yagaala wɨjɨwaakya sajɨ yuya kunya yawɨta sajɨ kɨnɨnnakeihɨlyɨ.

⁶ Kɨraazɨtɨyarɨna yɨhɨzalɨkurakobaaibɨ' sarɨmɨre sɨmunyavɨ mena dɨragɨnya yɨhwarake'na sahɨnɨ kɨnɨnnakeihɨlyɨ.

⁷ Sarevɨdaa'nyɨ nemɨre Naangei Jizaazai Kɨraazɨtɨyai ku'maayabanna yɨma'naabathe' sarɨmɨ yemwaaihasagaa' Kurya Tewaanyare sɨhumale aane pɨrɨ' kɨrɨ' yɨhɨgainadeihi mɨ'.

⁸ Nemɨre Naangei Jizaazai Kɨraazɨtɨyai sarɨmɨnyɨ dɨragɨnya yɨvaimwanga yɨhyathelyɨ. Sara kuna kihyojɨ aayagaa'nanyɨ. Yɨ sagaa' Yɨrɨka Naangegaa' sahwai walaabathehaa' Gotɨyai yɨhyɨvaimwade'na sarɨmɨ kayaa'na yɨwetawakya maayaihɨrɨ Gotɨyai yɨhɨzɨdavadei mɨ'.

⁹ Sare' dare'nanyɨ. Gotɨyai gamɨre Gawaalɨvaangei Jizaazai Kɨraazɨtɨyai nemɨre Naangelyɨ yɨhye'mwannamwaalya'neihɨrɨ jaka yɨhɨzɨvwaramaarakelyɨ. Yɨ sahwai sara dake' “Sara yɨdeinyɨ,” yɨ sara neyɨvanɨkelyɨ. Nebulya'nanyalyɨ. Sare'na dɨragɨnna yɨhivaimwannɨkeihi, yɨ, yɨwetawakya maayaihi dɨmwaalyideihɨlyɨ.

Kɨraazɨtɨyare kusɨlaanyavɨyara jaapainesa'nesɨ.

¹⁰ Nya'mweihi, nemɨre Naangei Jizaazai Kɨraazɨtɨyare dɨragɨnya' nyɨjaavake'na dɨragɨnna dara yɨhɨthɨma! Sarɨmɨ yuyaihi yagaala avaainanyanna nayaa dɨzɨla! Sarɨmɨ kuna jaapainadɨvɨ' yagaala ge ge madɨbɨnera! Sɨmunya avaainanyaburɨjɨ yawɨbwarya'ne avaainanyaburɨjɨ je'mwannamwaalyɨla!

¹¹ Nya'mweihi sara yɨhɨthɨwe' darevɨnyɨ. Kɨlowiyavɨrera sarɨmɨnyɨna dara nyɨdɨwa'daa' “Sahwaraavɨ mayagaalya kuna warɨka.”

¹² Nyɨdɨwa'daata yuyangɨna dɨvanɨge. Sarɨmɨjɨya gazarazara ge gengɨ dara dɨvanɨga'. Pwara dɨna “Yɨ, nɨmɨ Polɨmɨreinyɨra.” Nabaai pwara dɨna “Yɨ, nɨmɨ Aapolɨzareinyɨra.” Nabaai pwara dɨna “Yɨ, nɨmɨ Pitareinyɨra.” Nabaai pwara dɨna “Yɨ, nɨmɨ Kɨraazɨtɨyareinyɨra.”

¹³ Kɨrɨ' nɨmɨ yɨhɨthɨma! Kɨraazɨtɨyarɨ japalaannei daaka! Sarevɨ be'na jaapainɨwaa'! Polɨnyɨ sarɨmɨnyɨneba yɨsavɨri maratamarɨmwesainyɨ daa! Polɨnyɨne yayavɨ bavɨtaazɨyabwi maaresavɨ daaka!

¹⁴ Sarɨmɨnyawɨ nɨmɨ Kɨrɨzɨpaazalyɨ Gaayaazalyɨ yune saraarɨna bavɨtaazɨya' ye. Yɨ a'mwe pwara aawa. Daza'na Gotɨyarɨ “Su! Su! Sare' tewaanna ye,” wɨdɨvanɨge.

¹⁵ Sarevɨ yɨ aane pwai kwai yagaala yɨnɨga wi'na dara nadathɨka! “Polɨmɨne yayavɨ bavɨtaazɨya' nyake'na sahwareinyɨ.” Sara majɨ ya'ne'na yɨlaaya yɨvanɨge.

¹⁶ O, navɨka nyɨwaka! Nabaai Sɨtepaanazare angevɨya pwaraavɨjɨ bavɨtaazɨya' yeinyɨ. Yena ayahi pwarɨjɨ kwaraarɨjɨ bavɨtaazɨya' yeinyɨ dɨngaka? Sa' nɨmɨ myawɨriwa.

¹⁷ Sare' darevɨnyɨ. Nɨmɨ a'mweraavɨ bavɨtaazɨya' ya'neinyɨ Kɨraazɨtɨyai nyɨmaryasaabakeinyɨ mɨ'. Aawa. Gamɨre yagaala tewaanya wɨjɨwaakya'neinyɨ nyɨmaryasaabakeinyɨ. Yagaala sa' wɨdadɨnyavɨna a'mwe sɨmunnakera Kwaaka davakɨyangɨna dadɨvɨtabaaibɨ' nɨmɨ sara majɨwana. “Kɨraazɨtɨyai yɨsavɨ balake' saba sana yaasɨwaka nyɨma'nadɨka!” dena a'mweraavɨre yawɨsabwi sara madɨwɨneinyɨ.

Kɨraazɨtɨyai Gotɨyare dɨragɨnaangei sɨmunyavɨ yune aaya kaavɨlyarɨnesɨ.

¹⁸ Sare' darevɨdaa'nyɨnyɨ. Pɨrɨ' daresɨ. A'mwe pwara, Dɨkevɨnera kayaaka yɨnɨkevɨ tusavɨ wɨvanɨgasara Kɨraazɨtɨyai yɨta yovihɨrarannɨkevɨ balakevɨne yagaalya'na dara yawɨ'dɨvɨsare “Yagaala sa' sɨmumaayasɨ.” Pɨrɨ' daresɨ. Nemɨ a'mweina, Gotɨyai nemɨnyɨ nevadaihasamaa'manɨkeina dara yawɨ'daanyaine “Yagaala sa' Gotɨyare dɨragɨnaange' neyɨbwarɨdaakuvanɨkesɨ.”

¹⁹ Sare' darevɨdaa'nyɨnyɨ. Gotɨyare bukuyavɨ sɨnnawɨ Gotɨyai jaake' dara dɨnɨ' “Sɨmunnakeraavɨre sɨmunyabwi kayaaka yɨgalɨdeinyɨ. Sɨmunya yawɨ'nɨkeraavɨre sɨdusabwi yaasɨwa'nanya yɨbwarɨdaakudeinyɨ.”

²⁰ Sarevɨ dahaasara sɨmunnakeraavɨna gatha'darevaka! Bukuyangɨ pada'galayawɨrangadɨvɨta sɨdu'nakeraavɨna gatha'darevaka! A'mwe dathahaasara gavamarasɨ'nyɨyagaala dɨdɨvɨsaraavɨna gatha'darevaka! A'mwe Kwaaka davakɨyaraavɨre sɨmunya' Gotɨyai sɨmumaaya' wakake' midaaka!

²¹ Sare' darevɨdaa'nyɨnyɨ. Gotɨyai sɨmunya nebulya' kɨnɨnnakei dara yawɨ'na “A'mwe Kwaakevakɨyara yune sɨmunya kunyabwina nɨmɨnyɨ myawɨramaari yɨpɨnere.” Sara yawɨ'na yakevɨ, Gotɨyarɨ dara wɨvu'nakesɨ. Nɨmɨrera nɨmɨre yagaalya' wɨjɨwaakɨpɨ'devɨ pwara Kɨraazɨtɨyarɨ lɨmwabɨ'deraavɨ padaihasamaarɨdeinyɨ. Kwaakevakɨyara wɨjɨwaakya dazavɨna kwaasɨ dara yawɨ'manɨga' “Yagaala sa' sɨmumaayasɨ.”

²² Juyara yɨjɨwaainya atɨka maru'nasangɨ yɨdaangadɨvɨ' yawɨ'dɨvɨsare “Sahɨnɨ tɨnna wanganawaajɨ yagaalya' lɨmwagaraadera.” Gɨrikɨyara sɨmunya' bɨ'dɨvɨ' “Sarɨmɨre yagaalyavɨ aaya kaavɨlya' nemɨre sɨmunyavɨ yawɨramarawaajɨ ‘Nebulya' dɨngaka? Nebulya' midɨngaka?’ yɨhɨthaadera.”

²³ Nabaai sare kɨrɨwaarɨ nemɨ saina Kɨraazɨtɨyarɨ yɨta yovihɨrarannɨkevɨ maratamarɨmwesarɨne yagaalya' wɨjɨwakadaanyaine. Pɨrɨ' daresɨ. Yagaala daza' Juyara kayaasɨmunya wima'naderera. Nabaai pɨrɨ' daresɨ. Ajɨmya yuyangɨyara yawɨ'dɨvɨsare “Sɨmumaayasɨra.”

²⁴ Kɨrɨ' a'mwe pwara Gotɨyai jaka jɨvwaramaa'nɨkera sahwara Juyarajɨ Gɨrikɨyarajɨ saraavɨne Kɨraazɨtɨyai sai Gotɨyare dɨragɨnaangei yaka Gotɨyare sɨmunyavɨ aaya kaavɨlyalyɨ.

²⁵ Sare' dare'nanyɨ. Yagaala daza' “Sɨmumaayasɨreva,” Gotɨyare yagaala sa' sɨmunya naange' kɨnɨnnakesɨ. Yɨ a'mweraavɨre sɨmunya savɨ wavɨlavɨkesɨ. Nabaai “Waryaanyasɨreva,” Gotɨyare yagaala sa' dɨragɨnya naange' kɨnɨnnakesɨ. Yɨ a'mweraavɨre dɨragɨnyavɨ wavɨlavɨkesɨ.

²⁶ Sare' aaya kaavɨla daresɨ. Nya'mweihi, Gotɨyai jaka yɨhɨzɨvwaramaarakegaa' sarɨmɨre mwaalyabwine'na ayɨna jawɨranganyɨla! Sarɨmɨjɨya a'mweraavɨre kɨlaakejɨkɨya sɨmunyabwi kɨnɨnnakera a'mwe kwalaalyara mwaalesara daaka! A'mwe naangera dɨragɨnnakera sarɨmɨjɨya sara a'mwe kwalaalyara daaka! Yaya munyaba yɨnɨkera sarɨmɨjɨya sara kwalaalyara daaka!

²⁷ Aawa. “Sɨmunnakeraavɨna makinyaburɨ bwalawiekɨrakɨma!” daka Gotɨyai a'mwe Kwaaka davakɨyara sarɨmɨnyɨna “Sɨmumaayarera,” dadɨvɨsaihɨrɨ yɨhɨthahɨlakakelyɨ. Nabaai “Dɨragɨnyaraavɨna makinyaburɨ bwalawiekɨrakɨma!” daka Gotɨyai a'mwe Kwaaka davakɨyara sarɨmɨnyɨna “Waryaanyare,” dadɨvɨsaihɨrɨ yɨhɨthahɨlakakelyɨ.

²⁸ “A'mwe naangeraavɨ kuneraavɨ wɨmwaaihɨma!” daka Gotɨyai a'mwe Kwaakevakɨyara sarɨmɨnyɨna “Yaya kwaakebanyara yaasɨwakere,” yɨ “A'mwe angwangwere,” yɨ “Kunerera,” dadɨvɨsaihɨrɨ yɨhɨthahɨlakakelyɨ.

²⁹ Sarevɨdaa'nyɨ Gotɨyaryaba a'mwe kɨlaa'naka yuyarajɨya aane pwai kwai gamɨnne yaya' munyabanna mamakɨlyɨ yannelyɨra gamɨre sɨmunya pɨburɨna, gamɨre dɨragɨnya kɨburɨna.

³⁰ Kɨraazɨtɨyai Jizaazarɨ wɨlamwaaihya'neihɨrɨ Gotɨyai yɨhɨmwaaihakelyɨ. Gotɨyarɨ nemɨnyɨne'na Kɨraazɨtɨyai Gotɨyare sɨmunyavɨ aaya kaavɨlyai yɨma'nakelyɨ. Yɨ sahwarɨ nemɨnyɨna Gotɨyai dadelyɨ “Yɨda'maraangeihi nɨmɨreihɨlyɨ.” Yɨ sahwarɨ nemɨ a'mwe tewaanyaina Gotɨyareina yɨma'nya'neinaavɨ nemwaaihakelyɨ. Yɨ sahwarɨ nemɨre kayaa'nanyangɨna ayahi nemubamaarakelyɨ.

³¹ Sarevɨdaa'nyɨ “Sara yaana!” daanneinaavɨna Gotɨyare bukuya' dara dɨnɨkabaaibɨsasɨ. A'mwe gamɨnne yaya' munyaba makidei Naangerɨna gaverɨna nayaa sara makɨlana!