1 Jonɨ 1 - Yipma

Gaalyaburɨ Aaya Kaavɨlyai, Gotɨyare Yagaalyarɨnesɨ.

¹ Darei sɨnnawɨ kɨgaakuna Kwaaka dava' mima'nyawɨ aayawɨdaa'nyɨ mwalyaakerɨnesɨ. Sarerɨ Nedasaabadeina wɨmɨdɨnoi kadɨka wɨ'norɨna. Sarerɨ nemɨre tɨnna wanganorɨna. Sarerɨ yawɨranganorɨna. Sarerɨ nemɨre asa mwanganorɨna. Sahwai Gotɨyare Yagaalyai yuyagaa' yuyagaa'ne gaalyaburɨ aaya kaavɨlyarɨnesɨ.

² Gaalyaburɨ aaya kaavɨla dazahwai ku'maayabanna yɨma'naabɨna kya' nemɨ tɨnna wanganorɨna. Tɨnna wangano'na nayaa jalɨkurakadaa yɨhɨthadaanyɨ. Yuyagaa' yuyagaa'ne gaalyaburɨ aaya kaavɨlyai kɨgaakuna Nɨmwalyɨ ye'mwannamwalyaakelyɨ. Sare sai ku'maayaba neyɨjɨwainnadaa'nyɨ sarɨ tɨnna wanganorɨna.

³ Sahwarɨ tɨnna wanganona kadɨka wɨ'no sarɨna sarɨmɨnyɨjɨ yɨhɨthɨvanɨgo. “Nemɨjɨ avaaizɨmunya ye'mwannamwalaana!” dona yɨhɨthɨvanɨgo. Nabaai nemɨre ye'mwannamwaalya' daresɨ. Nɨmwalyɨ gamɨre Gawaalɨ' Jizaazai Kɨraazɨtɨyalyɨ nemɨ avaaizɨmunya ye'mwannamwaaihoinera.

⁴ “Avaaizɨmunya ye'mwannamwaalya'nevɨna yɨlaaya naanga yunebanna newarana!” dona yagaala daza' yɨda'manɨgo.

Gotɨyai Baakerɨnesɨ.

⁵ Yagaala da' Kɨraazɨtɨyai kaneda' kadɨka wɨ'nona yɨhɨthɨvanɨgo. Sa' daresɨ. Gotɨyai baakevɨ aaya kaavɨlyalyɨ. Sahwarɨ jɨhɨnya maalɨka aane pɨmɨlɨ' kɨmɨlɨ' muwarikelyɨ.

⁶ Sare'na jɨhɨnyavɨ kayaa'na mwaidaa kwaasɨ daaza' “Sahwalyɨ avaaizɨmunya ye'mwannamwaaiheinyɨ,” kwaasɨ yagaala dadaa yagaala nebwina ja'neburɨ mivanɨgo.

⁷ Aawa. Baakevɨ tewaanna mwaaidevaaibɨ' baakevɨ tewaanna mwalaaja'na Kɨraazɨtɨyare pwarajɨ avaaizɨmunya je'mwannamwaaiho. Nabaai tewaanna mwalaaja'na Gotɨyare Gawaalɨvaangei Jizaazare tawevɨ nemɨre kayaa'nanya yuyabwi nemarasɨ'nada tawe sahɨrɨ' gɨrɨka neduimwagasɨ'nade'nanyɨ.

⁸ Nemɨ dɨnyɨna “Nɨmɨ kayaa'nanyabwi maayainyɨra,” dɨnaaja' sɨmunyangɨ kwaasɨ yawɨ'daanyainera. Sarevɨ nebulya' nemɨre sɨmunyangɨ wɨlanewa'de' mɨ'.

⁹ Nemɨre kayaa'nanyanna jalɨkurakɨnaaja' Gotɨyai “Kumɨre kayaa'nanya marasɨ'nɨma! Kumɨre gɨrɨkita'nanya yuya, yɨ yɨda'maraangebwi maaya yuyabwi duimwagasɨ'nɨma!” dozɨ “Kayaa'nanya marasɨ'nɨdeinyɨ,” dɨnɨke'na nayaa lɨmwannɨkei, yɨda'maraangei mwaalɨkei sara yadelyɨ.

¹⁰ Nabaai Gotɨyai nedɨnɨ' “Yuyaihi kayaa'nanya yɨgasaihɨlyɨ.” Sarevɨdaa'nyɨ nemɨ “Kayaa'nanya migeinyɨ,” dɨnaaja' Gotɨyarɨna dɨna “Sahwai kwaasɨ yagaala dadelyɨ.” Nemɨ kwaasɨ sara daaza' gamɨre yagaalya' nemɨre sɨmunyavɨ wɨlanewa'de' mɨ'.