Zakaria 14 - WEN GBAŊKA

¹ Naawen danni a cheena ate ni ale jam koalim ŋan baai la, ba ale lab ŋa a te ni.

² Mi ale tigsi tɛŋ kpieŋsaŋa mɛ ate ba cheŋ a ga kpaliŋ ale Jerusalem, ba ale nak ba tɛŋ kpieŋka a vari ba ale ŋman tuesi ba yeeŋa, ba ale fɛ a goa ale ba pooma. Tɛŋka demma geli po ale cheŋ a ga bo tɛŋ yoŋ po, alege baai ale za ba tali la ale boro.

³ Naawen yaa ale nyini a kpaliŋ ale tɛŋ kpieŋsaŋa de, ase wa ale a kpaliŋ dai diila.

⁴ Dai dila danni wa naŋsaŋa a za si tabi ka Olivi Guuku zuk, ku ale chim ka Jerusalem kori geŋ, ate Olivi Guuku ale lab buye a ta nyini kori a cheŋ yeniŋ a dueni va kpieŋ ate ku geli mɛ a cheŋ wiilukku ate ku geli mɛ a cheŋ yeseoku.

⁵ Ni le chali va mi guuku viaka tɛŋ diila ku le teeri a paari Azel. Ni le chali ase ni le jam chali nyini tɛŋka choaka po diipo ate Yuzaya a jam ka Juda naab la. Ate Naawen mi Wenni ale baai meena ale welema la ale jam ale wa.

⁶ Dai dila danni bolim a kan boro, ŋoota yaase pik a kan boro.

⁷ Ku ale chim ka dai di tɔga ku be kan chim kantueŋ yaase legi ya. Ka Naawen nyiini ale seba dai dila danni. Ase junɔi dan boro a paari, bolim ale jam.

⁸ Dai dila danni nyuvuri nyiam ale nyini Jerusalem, bu geli ale cheŋ nyakpiemu kori geŋsa, ate bu geli a cheŋ nyakpiemu yeniŋka geŋsa wenkarik ale yoei po.

⁹ Naawen ale chim ka naab tɛŋka meena zuk. Dai dila danni, ku ale chim ka Naawen nyiini, wa yuenni nyiini ale yuei.

¹⁰ Tɛŋka meena, a nyini Geba a ga paari Arimmon, Jerusalem yeseok ale nye ase ka Araba la. Alege Jerusalem ale jueli ka ŋmai a yaa bo ka nyiem boka jigini, a nyini Benjamin nansuiŋku a ga paari tɛŋ kaai ale dɛ niŋ la nansuiŋku, a paari Gugoruku Nansuiŋku ale Yananel Yewɔŋku a ga paari nalima daamu ŋmiaka jigini.

¹¹ Nuruma ale kali dula. Ka kan ŋman kaasi diipo diipo. Jerusalem ale nya likka.

¹² Nyiŋtuilaŋa de ale Naawen a za wa pai a nye tɛŋ kpieŋ sii meena ale jam ta chaab ale Jerusalem la: Ba nyiŋsaŋa ale yuati ale ba diem za ba naŋsa zuk, ba ninaŋa ale poak, ba num kunkooŋa po, ate ba giŋgeluŋtaŋa ale poak ba noaŋa po.

¹³ Dai dila danni Naawen a za wa nye kama ate nuruba kpaziita a nak. Ate waai meena a cheem a ta chaab ale wa choa.

¹⁴ Juda demma mɛ ale kpaliŋ a maari Jerusalem. Ba ale tuesi tɛŋ sii ale moata la nitalimu ale ba ligmɔniŋka ale ba kpanaŋa ale ba gattaŋa.

¹⁵ Namsika de dekdek ale za ku jam wusumaŋa ale wusumbonsaŋa ale laalaakomima ale bonsaŋa ale duŋ sii meena ale bo tigsuŋtaŋa de la zuk.

¹⁶ Ate baai ale vuuk a nyini tɛŋsa meena po a jam siti Jerusalem la, ale cheŋ jueli ben meena po a ga puusi Naawa, Naawen Dii Ale A Dɛ Tugurik Tɔŋdɔma Niŋ La a ga dɛ Viitaŋa Tigini.

¹⁷ Nuruma waai a dan kan cheŋ a ga puusi Naawa ya, Naawen Dii Ale A Dɛ Tugurik Tɔŋdɔma Niŋ La ŋmoruk a kan ni ba tɛŋka zuk a te ba.

¹⁸ Ejipiti demma a dan kan cheŋ a ga maa gum du ba kan nya ŋmoruk ate ku a ni a te ba. Naawen ale te ka namsi kaai choa ale jam paari tɛŋ sii ale kan jam cheŋ a ga maa a dɛ Viitaŋa Tigini la a jam ba jigi.

¹⁹ Nya kude ale chim ka namsika a te Ejipiti ale tɛŋ sii meena ale kan cheŋ a ga maa dɛ Viitaŋa Tigini la.

²⁰ Dai dila danni ba ale ŋmarisi a nyo wusumaŋa lɔŋa nyiŋsa kama ayen, Ta Tuilum A Te Naawen, ate bimbilisaŋa ate ba ta a dik Naawen yenni la ale nye ase ka chin ŋaai ate ba pai zaani kaabka kuŋkuŋku niŋ la.

²¹ Samɔnsa meena ale bo Jerusalem ale Juda la a za si ta tuilum kama a te Naawen Dii Ale A Dɛ Tugurik Tɔŋdɔma Niŋ La ale baai meena ale jam a nye kaabka la ale pai si kama a dik ba ŋandiintaŋa. Ate dai dila danni Keenan denɔ a kan ŋman bo Naawen Dii Ale A Dɛ Tugurik Tɔŋdɔma Niŋ La yenni po.