Yosea 7 - WEN GBAŊKA

¹ Diipo meena ate mi ale tebi Izirali la, Ɛfraim wabaataŋa nyiem nyini ka peelim ate Samaria tuim kaasimaŋa a nye jassi. Ba a nye ka venta tuima, ate zueba a wɛ a jo yie po. Varidɔba a vari nuruba suitaŋa po.

² Alege ba kan miŋ ayen mi a teeri ba tuimbaataŋa meena. Ba wabaataŋa a gilim ba kama. Ba biemu a kasim bo ka mi niŋ.

³ <

⁴ Ba meena ka kaboŋ nyeerisa, a dɛ ase boroborok dɔk bolim buui ate boroborok seerɔwa an magsi wa choa a nyoro ate boroboroku a ga magsi beka.

⁵ Naawa tigini danni nabisaŋa a jam jo daam po ate bu chɔgsi ba ase bolim ŋiak la, ate wa pai wa nisa a gum baai ale nye nuruba a la la po.

⁶ Ba suiniimaŋa a nye ase ka boroborok dɔk la. Ba a cheŋ wa jigi ale ka wasusuga po. Ku a daani ba yokku meena po, ate bu nyiem yaa chɔgsi saluik ase bolim ŋiak la.

⁷ Ba meena a tuila kama nna se boroborok dɔk la. Ba a nɛ ba kpaŋŋa kama. Ba nalimaŋa meena a lo kama, ate ba waai a kan wi mi.

⁸ <<Ɛfraim a dam ka wadek ale tɛŋ kpieŋsaŋa. Ɛfraim a nye ase ka maasi paglak la di kan labri.

⁹ Nicham a dari wa pagrimu kama, alege wa kan miŋi. Zui piila ale bo wa zukku po meena, alege wa zɛ.

¹⁰ Izirali kanjantaŋa a ta ka chaab ale wa, alege kude meena po wa kan cheŋ Naawen wa Wenni jigi yaase wa gisi wa.

¹¹ <<Ɛfraim a nye ase ka nangbaŋ la, ate ba a paasi wa nna nwuli ale ka yammoa a yaaba wi Ejipiti ale a cheem Assiria jigi.

¹² Ase ba dan cheŋ, m le yuk ŋmiaka a basi ba zuk. M le dari ba ase nuinsaŋa ale bo wenzukku la. Ase m dan wom ayen ba va chaab a cheŋ, m le yik ba.

¹³ Ku ale toa a te ba, dii nyiŋla ba an bo ale mi! Kaasuŋ a cheŋ ba jigi dii nyiŋla ba ta ka chaab ale mi! Mi yaali kama ayen m da tuesi ba alege ba a biisi ka venta a te mi.

¹⁴ Ba kan kum a wi mi a nyini ba suiniima po, alege a kaari ba gaduataŋa zuk. Ba a tigsi kama a yaali ŋanbie ale da paalik alege cheem kpai a te mi.

¹⁵ Mi ale sak ba ale te ba pagrim, alege ba a zɔkka biem a te mu.

¹⁶ Ba kan cheŋ Wen Dii Ale Bo Wenŋmazuk La jigi ya. Ba a nye ase ka tom ale kan nala la. Gebik woŋ ale lɔnsi ba niŋdeerɔma tɛŋ ba kanjanta wieŋa nyiŋ. Nya kude nyiŋ ba ale ta ba a la Ejipiti tɛŋka po.