Yiila 98 - WEN GBAŊKA

¹ Ni leni yipaali a te Naawen, dii nyiŋla wa tom ka wakinkagla, wa tuilum juga nisaŋa a tom varibasika a te wa.

² Naawen a basi ate nuruba a nya wa varibasika tuimaŋa, wa pai wa wayɔrisima tuimaŋa a sak satɛŋsaŋa.

³ Wa teeri wa ŋmanteka ale wa wensie wieŋa ate wa tara ale Izirali demma la. Tɛŋka meena ale doa ga saari la a nya tama Wenni varibasika tuimaŋa kama.

⁴ Ni nye nuem ka masim ate Naawen, ni lɔnsi yiila waaŋ ale masim a te wa.

⁵ Ni leni yiila a te Naawen ale kpanuŋ, pai kpanuŋ a leni yiila.

⁶ Peeri damunsa a pai padiak nyiili a nye masim nuemka a te Naawen dii ale ka Naab.

⁷ Basi ate nyakpiemu a nuem, jaab meena ale bo bu po la, tɛŋka ale baai meena ale bo ka po la.

⁸ Basi ate belaŋa a nak nichaala, abe guutaŋa a pilim chaab a lenni yiila ale masim.

⁹ Basi ate ba leni yiila Naawen niŋ ale wa cheena kama ayen wa bo tɛŋka buusa, wa le bo tɛŋka meena buusa ka wayɔrisima po, abe wa bo nuruma buusa wensie po.