Yiila 97 - WEN GBAŊKA

¹ Naawen ka naab, basi ate tɛŋka a dɛ masim, basi ate satɛŋ sii ale yaalima la dɛ masim.

² Chiŋma ale legi nna kpitɔ ale gilim wa. Wa wayɔrisima ale wensie ale chim wa naam zukpaglika nyubini.

³ Ka bolim ale a dɛ wa niŋ, a dɛ wa dachaasaŋa jigi meena.

⁴ Wa nyaksika a nyiem nyaksi a gilim tɛŋka meena kama, ate tɛŋka demma nya ate ba nyiŋsa a gɔk nna pampam.

⁵ Guutaŋa a nyaliŋ ase samparima la Naawen niŋ, waai ale ka Nyɔnɔ tɛŋka meena zuk la niŋ.

⁶ Wenŋmazukku a mooli wa wayɔrisimaŋa wie, nuruma meena a nya wa zulaŋa.

⁷ Baai meena ale a kaab bɔgta ale a kuulim ti nyiŋla ale jo chivie po. Nama wena, ni puusi Naawen.

⁸ Naawen yaa, Zayon demma a wom ale a dɛ masim, Juda tɛŋ kpaŋsaŋa sue a peenti, fi buusaŋa nyiŋ.

⁹ Naawen, ka fi ale Wen Dii Ale Bo Wenŋmazuk La tɛŋka meena zuk, fi nya zak zaanika wena meena zuk.

¹⁰ Basi ate baai meena ale a yaali Naawen la a kisi biem, dii nyiŋla wa nya wensie nuruma zuk ale yeeri ba a nyini nuru gaasa nisima po.

¹¹ Wa toati ka bolim ate wayɔrisima nyama, ale te baai suiniima ale nala la masim.

¹² Ni dɛ masim Naawen po, nama wayɔrisima nyama abe ni pak wa tuilum yuenni.