Yiila 96 - WEN GBAŊKA

¹ Leni yipaali a te Naawen tɛŋ meena demma. Ni lenni yiili a te Naawen.

² Ni lenni yiili a te Naawen. Ni pak wa yuenni. Ni mooli wa varibasika wie daa meena.

³ Ni weeni wa zulaŋa a sak tɛŋsa meena po. Ni weeni wa wakinkaglaŋa ate nuru meena a wom.

⁴ Dii nyiŋla Naawen a zuak ka nna yega ale magsi pimpauk. Ku magsi ayen waai meena a chali wa yɔgsum ale wa gaam wena meena kama.

⁵ Dii nyiŋla tɛŋsaŋa meena wenaŋa ka bɔgta alege ka Naawen ale nye wenŋmazuk.

⁶ Zula ale zuaka a bo ale wa kama, pagrim ale nalim a bo wa yenni po.

⁷ Ni pak Naawen tɛŋsa meena tɛŋzuk de ni pak Naawen zulaŋa ale wa pagrimu,

⁸ ni te Naawen zula ŋaai ale magsi wa yuenni la, ni ta tiirim a jam wa niŋ, ni puusi Naawen nalim weleŋsaŋa po.

⁹ Ni puusi Naawen wa nalim weleŋsaŋa po. Nama tɛŋsaŋa meena, ni basi ate ni nyiŋsa a gɔg wa niŋ.

¹⁰ Ni te ni nyiŋsa a gɔk wa niŋ tɛŋzuk de meena tɛŋka a feri paari kama, ka kan choa. Wa le bo nuruba meena buusa ale wensie.

¹¹ Basi ate wenŋmazukku a dɛ masim, basi ate tɛŋzuk de sui a peenti. Basi ate nyakpiemu a pilim nuem ale ŋan baai meena ale bo bu po la.

¹² Basi ate tattaŋa ale jaab meena ale bo ti po la a naŋ. Ate tiisaŋa meena ale bo sagni po la lenni yiila ale masim,

¹³ Naawen ale cheen la nyiŋ si leni yiila wa niŋ. Wa cheen kama ayen wa bo tɛŋka buusa. Wa le bo tɛŋka buusa ale wayɔrisima ale wensieŋa.