Yiila 95 - WEN GBAŊKA

¹ Ni jam ate ti lenni masim yiila a seni Naawen. Ni basi ate ti nuem a te Piuŋ kuui ale ka ti varibasidɔ la.

² Ni te ti jam wa niŋ ale jiam teka abe ti pak wa ale yiila leŋka.

³ Dii nyiŋla Naawen ka Wen Kpienni wa ka Naab kpioŋ a zuak a gaam wena meena.

⁴ Tɛŋka liuŋku a bo ka wa nisima po. Guuk kpientaŋa zukpattaŋa ka wala ale soa.

⁵ Nyakpiemu ka wala ale soa, dii nyiŋla ka wa ale nye bu. Ka wa nisimaŋa mɛ ale nye tɛŋ kosikka.

⁶ Ni jam, ni basi ate ti koori tɛŋ a zuli Wen, ni basi ate ti kpi dunduna ti Naawen ti Nyeerɔwa niŋ.

⁷ Wa ka ti Wen, ate tama chim wa nuruba ale wa piisa ate wa taa nya. Ni dan wom wa lueluku jinla,

⁸ ni kan basi ate ni suiniimaŋa a pagra ase ni le jam nye dii Meriba ale Massaya sagni po la,

⁹ juijui ate ni koma a nye mu nya la, ba be jam nya mi ale nye diila kama.

¹⁰ Bena pisinaansi ate mi sui a jam puuri ale gaŋ kala. M jam weeni ba ayen, ba ka nuru baai ate ba suiniima an bo ale mi, ba zɛ mi suitaŋa.

¹¹ Dila ate m yaa jam ka ale m suipuurumu ayen, ba kan jo m vuusumu jigini.