Yiila 94 - WEN GBAŊKA

¹ Naawen yaa, Wen dii ale a namsi la. Wen dii ale a namsi la nyini tuni kanjanta nyama dii ale magsi ba la.

² Yiti ŋmai, tɛŋzuk de buusa boorɔ a waali baai meena ale a nak suinum la ale waali kaai ale magsi ba la.

³ Gaasa nyama ale beni a paari ka dimpo. Naawen yaa, ku le paari ka dimpo ate gaasa nyama a basi naŋ ka?

⁴ Ba kasim a biisi ka kanjanta wie nyiini tuim kaasima nyam meena a kasim a kuulim kama.

⁵ Naawen yaa, ba namsi fi nuruma ba ta baai ate fi so la a tom ka kanpiinta.

⁶ Ba a ko pukɔga ale nicham ale kpiŋsa.

⁷ Ba biisi ba nɔngbaaŋa po ayen Naawen a kan nya ba ale a nye diila, ba weeni ayen Jekob Wenni niŋ karo.

⁸ Ni kpesi nidek nama baai ale kan ta yam a bo nuruba po la. Nama betta, ka dimpo ate nama ale miŋ yammoa?

⁹ Nama a yaa ni weeni kama ayen waai ale nye tuni la a kan wom? Nama a yaali ayen ni weeni kama ayen waai ale a sak nuruba a silim yammoa?

¹⁰ Nama a poli kama ayen waai ale namsi satɛŋsa la ale pai nama a basi kama? Nama a poli kama ayen waai ale a sak nuruba la a ka miŋ la?

¹¹ Naawen ale seba nuru popola, wa seba kama ayen ŋa ka kiriya.

¹² Naawen yaa, nuru waai ate fi a te wa turi darika ale a te wa fi sinsaŋŋa la a ta suipeentik kama.

¹³ Nuru waai ate fi a sak wa an nyini fi sinsaŋŋa po la, fi yeeri wa kama a nyini daanika po, a ga paari diipo ate ba ale tu goluk a gu gaasa nyama la.

¹⁴ Naawen a kan jɛ wa nuruma a basi yaase wa zɛri ba.

¹⁵ Buusa boka ale ŋman pilim bo a nyini wayɔrisima po, ate baai meena ale ka cheri ba suiniima po la ale va ŋa.

¹⁶ Ka wana ale wa yiti zaani a tu chaab ale nuru baataŋa a te mi? Ka wana ale wa zaani a tu chaab ale tuim kaasima nyama a te mi?

¹⁷ Naawen a dan kan jam maari mu, ku ate kan beni m ti kpi ya.

¹⁸ Naawen yaa, ase m dan weeni ayen, <> ka fi ŋmanteka ale a yik mu a ta.

¹⁹ Daanika ale zuak a bo m po la, ka fi wieŋa ale te m chiika masim.

²⁰ Niŋdeerɔ baai ale bie ale a dueni wie ate ŋa daani tɛŋ dem ate ba a nam la an baga a tom ale fi.

²¹ Ba zɔk ale chaab nye a kaasi wayɔrisima nyama ale ko baai ale kan seba wari nɔi po la.

²² Alege Naawen a chim ka yepagrik ale m Wen m piuŋ ate m suk wa po.

²³ Wa le tuni ba a magsi chaab ale ba biemu. Wa le kaasi ba, ba gaasaŋa nyiŋ. Naawen, tama Wenni ale kaasi ba.