Yiila 91 - WEN GBAŊKA

¹ Waai ale a kali Wen Dii Ale Bo Wenŋmazuk La yɔgsummu po la, ale kasim a vuusi a chak kama Wen Dii Ale A Niak La yisuŋku po.

² Mi le weeni ayen, Naawen ka likka jigi, ale ŋman chim yepagrik a te mu. Fi ka mi Wen dii ate m ta sebchakka ale fu.

³ Wensie wa le vari fu a ta nyini batta po a basi, wa le vari fu kum po a basi.

⁴ Wa le pob fu ale wa kinkaŋŋa a tanla, wa wensieŋa ale ŋa chim fi ja kasim ale parik a gilim fu.

⁵ Fi kan chali yok nyigsika, fi be kan chali pein ŋaai ate ba a tɔŋ kantueŋka la,

⁶ yaase nyiŋtuila a nak fu legi po, yaase yuam buui ale a jam fi jigi kantueŋ la.

⁷ Tusidi ale lo fi gauŋ, tusa pi (10,000) ale lo fi juga, alege wari a kan paari fu.

⁸ Fi le nya ale ka fi nina nyiini, a nya wabaata nyama namsika.

⁹ Ase fi nin basi ate Naawen dii ale ka mi sukka jigi la. Wen Dii Ale Bo Wenŋmazuk La a chim fi boka jigi.

¹⁰ Dila nyiŋ biem kan paari fu, kaasuŋ a kan jam moata fi viuku.

¹¹ Wa le weeni wa maarɔma fi nyiŋ ate ba a nya fi zuk fi suitaŋa meena po.

¹² Ba le zak fu ta nisa po ate fi kan pai fi naŋ a nak tintain ya.

¹³ Fi le tabi gbeŋli ale jinkpaŋ zuk, fi le tabi gbeŋli kpienni ale waamu.

¹⁴ Naawen weeni ayen, wa le a yaali mi la nyiŋ, m le vari wa basi, m le lik wa diila, wa siak te mi yuenni kama.

¹⁵ Wa le wi mi, ate m tulisi wa, m le bo ale wa daanika po, m le vari wa basi abe m zuli wa.

¹⁶ M le te wa chak ale nyuvu woŋ, abe m sak wa m varibasika.