Yiila 9 - WEN GBAŊKA

¹ M le pak fu, Naawen yaa ale m suinum meena. M le weeni fi wakinkaglaŋa meena wari.

² M sui peenti kama ale a naŋ fi nyiŋ. M le yi yiila a pak fi yuenni, Fi Wen Dii Ale Bo Wenŋmazuk La.

³ Mi dachaasaŋa a cheem ka ŋaaŋ, alege ba nak naŋsa a lɔ kpi fi niŋ.

⁴ Fi ta wensie kama ale fi buusaŋa boka. Fi bo a te mu kama. Fi be kali fi naamu zukpaglika zuk kama a bo wensie buusa.

⁵ Fi toariŋ tɛŋsa kama alege a kaasi wabaata nyama. Fi yeeri ba yue kama basi ate ŋa kan ŋman boro diipo diipo.

⁶ Kaasuŋ kuui ale kan ta kpeglimka la a jam dachiaka zuk. Fi kaasi ba tɛŋsaŋa ate ba baŋ ba wie meena.

⁷ Naawen a kasim a dɛ wa naamu kama a cheŋ diipo meena. Wa nye wa naamu zukpaglika kama a magsi buusa boka.

⁸ Wa le bo tɛŋka buusa ale wensie. Wa le ta nuruma a nya ale nyemagsika.

⁹ Naawen ka jachɔgsim a te baai ate ba a namsi la, waai ale pagra a lik ba diipo ate ba a tu daanika la.

¹⁰ Baai ale seba fi yuenni la ale ta sebchakka ale fu. Dila, Naawen yaa, fi kan zɛri baai ale a gisi fu la diipo diipo.

¹¹ Siak yiila a pak Naawen ale kali wa naamu zukpaglika zuk Zayon la. Ni mooli tɛŋsaŋa po wa le tom diila.

¹² Wa lala ale a teeri baai ale a nam la wari. Wa kan zɛri ba kumsaŋa alege a namsi baai ale a namsi ba la.

¹³ Naawen yaa, nya m dachaasaŋa ale a namsi mu diila. Ta jiirim ale mu abe fi zak mu a ta nyini kum nansuiŋtaŋa po,

¹⁴ ate mi zaani Zayon nuruma niŋ a weeni ba, mi ale a pak fu dii nyiŋla. Mi le kasim ta suipeentik fi varibasika nyiŋ.

¹⁵ Tɛŋsaŋa a lɔ goluk kuui ate ba tu la po. Ŋmiak kaai ate ba pai suk la a yik ba naŋsaŋa.

¹⁶ Ba seba Naawen kama wa wensie buusaŋa nyiŋ. Wabaata nyama a bari yik badek kama ale ba nisima tuima.

¹⁷ Wabaata nyama a ŋman cheŋ kpiluŋ, tɛŋ sii meena ale baŋ Wen wari la.

¹⁸ Alege baai ale a silim ŋanta la wa kan baŋ ba wariya, yaase baai ale a nam la yiila a bɛ.

¹⁹ Vaari yiti, Naawen yaa, kan te nurubiik a nya pagrimoa. Te ti tɛŋsaŋa nya buusa fi niŋ.

²⁰ Basi ate yɔgsum a yik ba, Naawen yaa. Basi ate tɛŋsaŋa demma a seba ayen ba ka nurubisa, ba daa Naawen ya.