Yiila 89 - WEN GBAŊKA

¹ M le pai Naawen ŋmanteka a leni yiili taam wuu m le pai m nɔnni a biisi fi wensieŋa wieŋa a sak gaŋsa meena wuu.

² M le weeni sak nuruba ayen fi ŋmanteka a za ka giŋŋ taam wuu, fi wensieŋa mɛ a bo wenŋmazukku dek po.

³ Fi weeni ayen, <

⁴ m weeni wa ayen, M le nye ate fi buuni po kan maari a kpeglim diipo diipo abe m nye ate fi naam zukpaglika a kasim boro a te gaŋsa meena wuu.> >>

⁵ Naawen yaa, wenŋmazuk nuruma a pak fu fi wakinkaglaŋa nyiŋ, nuruma a pak fu fi wensieŋa nyiŋ, nuru weleŋsaŋa ale tigsi chaab la niŋ.

⁶ Ka wana ale bo wenzukku ate ba le pai a magsi chaab ale Naawen yaa? Ka wana ale a nye ase Naawen la bo wa nidoabilisaŋa po.

⁷ Baai meena ale chim Wen maarɔba tigsuŋ kpioŋku po la a chali Wen yɔgsum ka nna yegayega, ba a chali ka wa lala yɔgsum a gaam baai meena ale za gilim wa la.

⁸ Naawen yaa, Wen Dii Ale A Dɛ Tugurik Tɔŋdɔma Niŋ La, ka wana ale ta pagrim ase fi la? Naawen yaa, fi wensieŋa a gilim fu.

⁹ Nyakpiemu ale doa ale bu pagrimu la, ka fi ale a wi ate bu a siak fu. Bu nyiem dan yiri ayen bu fɔb bu nanpansaŋa, fi nyiem weeni bu kama ate bu duak baliyaa.

¹⁰ Fi bugsi Arayab ase ka baai ate ba ko la fi pai fi ni sii ale pagra la a kati fi dachaasaŋa a waaŋ.

¹¹ Wenŋmazuk ka fi ale soa, tɛŋzuk de mɛ ka dila, jaab meena ale bo tɛŋka po la ka fi la soa, fi le nye ba meena.

¹² Fi le nye yeseoku ale wiilukku, Tabor guuku ale Yermon guuku a leni yiila ale popeentik a seni fi yuenni.

¹³ Fi ka pagrim nyɔnɔ, fi nisaŋa pagra, fi juga nisa a nak a dɛ.

¹⁴ Wayɔrisima ale nyemagsika ale chim fi naam zukpaglika nyubini, ŋmanteka ale wensie ale bo fi jigi.

¹⁵ Suipeentik a bo le ka nuru baai ale seba fi pakka la. Naawen yaa, basi ate ba bo fi bolimu po.

¹⁶ Ba a naŋ fi yuenni nyiŋ daa meena, ale a pak fu fi wayɔrisimaŋa po,

¹⁷ dii nyiŋla, ka fi ale ba pimpauk ale ba pagrim fi jiirim nyiŋ ale soa ate ti ta pagrim.

¹⁸ Wensie ti jachɔgsimu ka Naawen ale soa. Ka Izirali Waai Ale Welema La ale soa ti naawa.

¹⁹ Gɔdaasima po fi jam biisi ale fi nuruma baai ale a puusi fu la. Fi weeni ayen, mi te tugurik tɔŋdɔwa ka pagrim, m zak ka nuru paalik a nyini m nuruma po.

²⁰ M gisi nya ka Deevid m tomteerɔwa a yaa pai m tuilum kpaam a kpiiri tagli wa a bobi wa ayen wa chim naab.

²¹ M le bobi wa tanla ale wensie, m nisa ale te wa pagrim.

²² Dachiak an kan baga a fɛ wa ate wa siak a te wa, nuru biok karo wa fɛ wa.

²³ M le num wa dachaasa ate wa nina nya abe m nak wa kisidɔma a lɔnsi.

²⁴ M wensie ale ŋmanteka ale bo ale wa, abe m pai m yuenni nyiŋ a zak wa pagrimu a zaani.

²⁵ M le pai nyiam kpioŋku a nyo wa nisima po, m le pai belaŋa a te wa.

²⁶ Wa le wi mu a weeni ayen,

²⁷ M le basi ate wa a chim m bikpagi, naab kpioŋ tɛŋzuk meena.

²⁸ M le ta m ŋmanteka ale wa diipo meena wuu, nɔiyeŋ kaai ate ti dueni ale chaab la a ka maari a kaasi.

²⁹ Mi le basi ate wa ŋaaŋbisa tomini a boro taam wuu, wa naam zukpaglika ale boro ka dila ase wenŋmazuk ale boro diila.

³⁰ Wa bisaŋa a dan zɛri m sinsaŋŋa an va m buusaŋa,

³¹ ba dan zɛri m ŋmarisika alege an ta m wieŋa,

³² m le namsi ba ba biemu nyiŋ ale doari, ba kaasuŋku ale miiri ba.

³³ Alege m kan tuesi m ŋmanteka wa jigi, m bɛ kan pai wensieŋa a da diipo diipo.

³⁴ M kan kaasi m nɔiyeŋka yaase m basi m nɔnni ale weeni diila.

³⁵ M pɛ m weleŋsa nyiŋ, ayen m kan velim a te Deevid.

³⁶ Wa tomini ale kasim ka dila a cheŋ, wa naamu ale kasim boro mi niŋ ase ka wenbinni la.

³⁷ Bu le boro ka dila taam wuu ase chiika la, ase wensie seerɔ waai ale bo wenŋmazukku la.

³⁸ Alege fi zɛri naab waai ate fi lueri la. Fi sui ale a puuri nna yegayega ale waai ate fi a bobi la.

³⁹ Fi pai fi nɔiyeŋka ale wa a te kama, ale taŋ wa naam zutɔkka ale tanta.

⁴⁰ Fi wɛ wa parisaŋa meena a jo a kaasi, wa pari pagrisaŋa meena dueni.

⁴¹ Baai meena ale a taam la vari wa, baai ale moata wa la a nye wa a la kama.

⁴² Fi zak wa dachaasaŋa juka nisa, fi basi ate wa dachaasaŋa meena a naŋ.

⁴³ Fi yik wa gebika nɔnni a tulim fi an maari wa kpaliŋ po.

⁴⁴ Fi basi ate wa zulaŋa a kpeglim ale yuk wa naam zukpaglika a lɔnsi tɛŋ.

⁴⁵ Fi gebi wa bimbain daaŋa a basi, ale pai chivie garuk a lik wa.

⁴⁶ Naawen yaa, fi le suk fidek mi jigi a soa ka sɛ?

⁴⁷ Teeri m nyuvunni ale a kpabi diila. Fi nye nurubiik ate wa ka kiri ya.

⁴⁸ Ka nuru boa ale boro ayen wa kan nya kummoa, yaase wa vari wadek vɔrup pagrim po a basi?

⁴⁹ M Nyɔnɔ, fi nyiem ŋmanteka a bo ka be, kaai ate fi wensie po fi puulim ale Deevid la?

⁵⁰ M Nyɔnɔ, teeri fi tomteerɔma ate ba nye ba a la diila. Mi ale ji tɛŋsaŋa meena nye laka mi suinum po diila.

⁵¹ Fi dachaasaŋa a nye mu a la la, Naawen yaa, ba nye waai ate fi lueri la a la kama juijui meena ate wa a cheŋ la.

⁵² Pimpauk a cheŋ Naawen jigi taam wuu! Ku be nye dila. Ku be nye dila.