Yiila 88 - WEN GBAŊKA

¹ Naawen yaa, fi ale Wen dii ale kasim a vari mu a basi la. Yok ale kantueŋ meena m kaari a wi fu.

² M puusaŋa abe paari fu ate fi lak turi a wom m kaarika,

³ dii nyiŋla m chiika a sueri ale ka wamirima ate kum nyiini a yaa moata mu.

⁴ Ba yaa chiim mu a gum ka kpilima po m yaa nye ase ka nuru waai ale wobsa la.

⁵ Ba pai mu a chim ase ka baai ate ba ko dueni vie po la, fi kan ŋman a teeri ba wie, ba pai mu a chim ka baai ate ba niŋ ŋman ka fi nyaasimu po la.

⁶ Fi ta mu siŋ gu ka vɔrup po, vɔrup buui ale limisa ale chim legi.

⁷ Fi suipuurum a dobra m zuk, fi suipuurumu a gilim mu ase ka viok la.

⁸ Fi basi ate m doama a zɛri mu, fi nye mu veesiveesiga a te ba, ate ba an ŋmaa moata mu. Ba yik mu a lik kama ate mi an ŋman baga nyini chali a bɛ.

⁹ M ninaŋa yaa kum a jiak kama. Naawen yaa, daa meena mi a wi fu m zak nisa a sak fu.

¹⁰ Fi a tom fi wakinkaglaŋa ka kpieba zuk moa? Baai le kpi la le baga yiti pak fu?

¹¹ Baai le kpi la a biisi fi ŋmanteka wie? Ba a biisi fi wensieŋa wieŋa kpiluŋŋoa?

¹² Ba seba fi wakinkaglaŋa wie juijui ale ka legi la po? Yaa ba seba fi wayɔrisimaŋa tɛŋ kaai nuruba le kpi nueri ate ba baŋ ka wie la po?

¹³ Alege m kum a yaali maarika fi Naawen jigi. Saluik m puusaŋa a paari fu.

¹⁴ Naawen yaa, ka boan dek chekki nyiŋ ate fi a zɛri mu ale cheem ŋaaŋ a te mu?

¹⁵ A nyini m buli, mi kasim a nam kama a nye m kpi. M yaa jiak kama ale fi ale namsi mu la, m ŋman ka maarɔ.

¹⁶ Fi suipuurumu buk mu ka nna kuligi fi wapagriŋa ate fi pai tu mu la a kaasi mu kama.

¹⁷ Danni meena ŋa gilim mu ase ka nyiam ale mobi pimpanta diila, ŋa din bola miiri mu a zaani ka giŋŋ ate m ka viriŋka jigi ya.

¹⁸ Fi basi ate baai ale a bani mu la ale baai ale a yaali mu la meena a zɛri mu, mi ale maliŋ baai la a bo ka legi po.