Yiila 85 - WEN GBAŊKA

¹ Naawen, fi sak fi tɛŋka jiirim. Fi pilim pai Jekob paaruŋku a te wa.

² Fi jam vɔŋ nuruma kaasuŋku a te ba, ale lik ba wabaataŋa a dueni.

³ Fi pai buusaŋa boka a dueni ka nakpiak fi pai fi suinni ale a kab ale ti la a basi kama.

⁴ Wen ti Varibasidɔ, pilim tigsi ti ta jam jigi yeŋ abe fi kan ta sui ale ti.

⁵ Fi suinni a yaali di puuri ale ti ka taam wuu? Fi suinni a yaali di a puuri ale ka ti buuni meena ta cheŋ?

⁶ Fi kan ŋman te ti pagrimoa? Fi kan ŋman basi ate fi nuruma a ŋman naŋi?

⁷ Naawen yaa, sak ti fi ŋmanteka, abe fi te ti varibasika.

⁸ M le goori wom Wen, Naawen ale weeni diila. Wa le nye suiyɔgni ale wa nuruma, wa nuruma abe kan ŋmani a cheŋ betta wie tomka po.

⁹ Wensie wa varibasika a moata baai ale a chali yɔgsum ale wa tom kaasika la kama, ate wa pimpaukku ale sueri ti tɛŋa po.

¹⁰ Ŋmanteka ale wensie ale tu chaab ate wayɔrisima ale suiyɔgni a puusi chaab.

¹¹ Wensie a nyini ka tɛŋzuk de ate wayɔrisima a kali wenŋmazuk a chuiri a nya.

¹² Naawen le sum te dii ale nala la, ate ti kaduksaŋa ŋandiintaŋa a bɛ.

¹³ Wayɔrisima ale dɛ wa niŋ a cheŋ a gomsi wa suiku a te wa ate wa cheŋ.