Yiila 79 - WEN GBAŊKA

¹ Wen yaa, nuruma a vari fi tɛŋka ba taŋ fi tuilum yenni ba nye ate Jerusalem a yaa chim ka guuk.

² Ba pai fi yɔmma nyiŋsaŋa a chim ka nuinsa ŋandiinta. Baai ale siak a te fu la, nyiŋ lantaŋa a yaa chim ka gɔi duŋsa ŋandiinta.

³ Ba burinti ziim a waaŋ a gilim Jerusalem ase ka nyiam la. Nuru a be an taliya ayen wa gu kpilimaŋa.

⁴ Ti kali mɔtidɔma a yaa ta ti a lɛ kama ti ka ŋanlaama baai ale gilim ti la jigi.

⁵ Naawen yaa, ku a yaa ku beni soa ka sɛ? Fi suinni a yaa daa puuri ale ti, ka dila taam wuu? Fi nyunni dɛka a yaa di kab ase bolim la paari ka dimpo?

⁶ Pai fi suipuurumu a kaasi tɛŋ sii nuruba ale kan seba fu la, tɛŋ sii ale ka puusi a te fu la.

⁷ Dii nyiŋla, ba ko Jekob, ale kaasi wa tɛŋka meena.

⁸ Kan pai ti koma biemu nyiŋŋa a waali ti, te fi jiirimu a cheŋ paari ti a wuli, ale ti ŋman ka yiila.

⁹ Wen, ti Varibasidɔ, maari ti, fi yuenni zula nyiŋ, vari ti a basi abe fi vɔŋ ti wabaata a te ti fi yuenni zula nyiŋ.

¹⁰ Ka boa ale soa ate tɛŋsaŋa nuruma a weeni ayen, <> Te ti nina nya fi le a waali ba, ba le ko fi nuruma la nyiŋ.

¹¹ Goori a wom fi nuru baai ate ba yik lik la ale a ŋuuni diila, fi pagrimu nyiŋ vari baai ale ba kpi la a basi.

¹² Tuni ti kali mɔtidɔma ku naŋtuok nɔi buyopɔi dii nyiŋla ba lɛ fi Nyɔnɔwa ka yegayega.

¹³ Ate tama fi nuruma, tama fi piisaŋa ŋaai ale a dɛ fi wuuku la, yaa pak fu taam wuu. A nyini gaŋsa meena po ti le pak fu.