Yiila 78 - WEN GBAŊKA

¹ M nuruba, ni wom m sinsaŋŋa ni chelsi wom m nɔi po wieŋa.

² M le lak m nɔnni a weeni wamagsima a sak ni. M le weeni ni wasusugi ŋaai ale boro a nyini ŋiaka la.

³ Wie ŋaai ate ti wom ale seba, wie ŋaai ate ti koma a weeni sak ti la,

⁴ ti kan pai ŋa a suk ti bisa. Ti ni weeni ŋa a sak gaŋ sii ale pai a saŋ la. Ti le biisi Naawen pimpauk tuimaŋa, wa pagrim tuimaŋa, ale wa wakinkagla tuimaŋa ate wa tom la.

⁵ Wa te Jekob ka kaamka, ale te Izirali demma sinsaŋŋa, a weeni ti kokpieŋsaŋa ayen ba pai ŋa a sak ba bisaŋa,

⁶ ate gaŋ sii ale pai a saŋ la a seba ŋa, biik sii ate ba poom za ba biak la, ba sak ba ate ba mɛ yiti weeni ŋa wie a sak ba bisa.

⁷ Ate ba yaa ta sebchakka ale Wen ate ba kan baŋ wa tuim kperisaŋa, alege ba le kasim a siak a va Wen sinsaŋŋa.

⁸ Ba kan chim ba koma ale jam ka diila ba jam kan nik Wen yaa, ba jam ka tukpari gaŋsa, gaŋ sii suiniima ale jam yalima ale Wen, ba chiisaŋa a jam ka wensie ale Wen ya.

⁹ Ɛfraim nidoama ale ba timaŋa meena, kpaliŋka danni ba le chali ale basi kpaliŋka nyeka.

¹⁰ Ba zɛri nɔiyeŋka ate ba nye ale Wen la kama. Ba zɛri wa sinsaŋŋa mɛ kama.

¹¹ Ba baŋ Naawen ale nye dii a te ba la kama, ba baŋ wa wakperikaliisaŋa ate wa yeeri a sak ba la kama.

¹² Wa tom wakinkagla ba koma nina po, wa tom wakinkagla Zoan ale bo Ejipiti tɛŋka po la kama ate ba nya.

¹³ Wa yik nyakpiemu a lab buye a dɛ niŋ ta wa nuruma a va du taam jueli, wa nye ate nyiamu a zaani ase parik ate ba sɛ zaani diila.

¹⁴ Wa basi ate chiŋmari a dɛ ba niŋ danni po ale basi ate bolim ŋiak a dɛ ba niŋ yokku meena.

¹⁵ Wa kabri pinaŋa sagni po, a te ba nyiam nna yegayega ase bu nyini nyakpiemu po la.

¹⁶ Wa pai pina muulisa a chim beli naŋsa ate nyiam va si po a nyini, ase bela nyiam ale a chali a taam diila.

¹⁷ Alege dila meena, wa nuruma a diem tom a kaasi wa kama, ba zɛri Wen Dii Ale Bo Wenŋmazuk La nɔi sagni po.

¹⁸ Ba potim seba ale nye Wen nya ale ba le bek wa ŋandiin tii ate badek kɔrisa a bo ale ti la.

¹⁹ Ba biisi kaasi Wen a weeni ayen, <

²⁰ Wa ale nak piuŋku la, nyiam ale burinti nyini, ate bela a sueri mobi pimpanta. Alege wa a baga a te ŋandiinta moa? Wa baga yaali lanta a te wa nuruma moa?>>

²¹ Naawen ale wom ba la, wa sui yaa puuri, wa yaa basi ate wa bolimu a lo Jekob zuk, wa pai suipuurum a bo Izirali demma buusa.

²² Dii nyiŋla ba ka siaka ale Wen ya, ba ka sebchakka ayen wa ale vari ba a basi.

²³ Alege wa weeni chiŋmaaŋa, ate wenŋmazukku a lak ku tuataŋa,

²⁴ a ni ŋandiinta ate nuruma ayen ba dɛ, wa te ba wenŋmazuk ŋandiinta ayen ba dɛ.

²⁵ Nuruba a dɛ Wen maarɔba ŋandiinta, wa tom ŋandiinta ate ti paari ba taŋa.

²⁶ Wa weeni koni vioku ate ku a fuk ale pai wa pagrimu a dɛ yeseoku vioku niŋ.

²⁷ Wa te lanta a siŋ kaasi tɛŋ ase tanta la a te ba, wa basi ate yeŋsa a lo pati tiak ase beli po tintain busuŋ la ate ba pisi a dik.

²⁸ Wa nye ate si yiri a lo ba suŋsuŋ a gilim viitaŋa meena.

²⁹ Ba dɛ ŋandiinta a paari ba paara an ŋmaa yaali dii nyiŋla wa te ba, ba kɔrisaŋa ale bo ale ŋan baai la kama.

³⁰ Alege jigi ate ba dɛ ŋandiin tii ate ba kɔrisa a bo ale ti la, ti le diem bo ba noaŋa po la,

³¹ Wen suinni a yaa kabi ale ba ate wa ko ba pagrɔma meena ale bo ba po la. Wa ko ba bi paalukku ale bo Izirali demma po la.

³² Wa le waali ba nnala meena la, ba diem a nye ba biemu kama wa le daa tom wakinkagla ate ba nya la, ba diem ka siaka ale wa.

³³ Wa yaa basi ate ba daaŋa chim kinla a te ba, ale basi ate ba benaŋa po ba yɔgsa.

³⁴ Wen dan pilim boro a ko ba, ba nyiem yaa ŋman viriŋ a gisi wa nna a wuli.

³⁵ Dila ate ba teeri ayen Wen ka ba Piuŋ, ayen Wen Dii Ale Bo Wenŋmazuk La ka ba Da Tuesirɔ.

³⁶ Alege ka ba noaŋa pai ate ba nye, ba ka velimvendisa.

³⁷ Ba an lak ba suiniimaŋa a te Wen ya ba ka nimmuna ale nɔiyeŋka ate wa nye ale ba la.

³⁸ Alege wa diem ta jiirim ale ba, wa vɔŋ ba biemu a te ba wa an kaasi ba. Diipo meena wa kasim duŋ wa suinni wa an sak wa suipuurumu.

³⁹ Wa teeri ayen ba ka nyiŋ lam ba ka viok kuui ale a taam a kan pilim a ŋmani la.

⁴⁰ Diipo meena ba kasim a zɛri wa nɔi ka dila sagni po ale nye ate wa suinni a dom gɔnni po.

⁴¹ Ba kasim ta Wen nye a nya kama ale nye ate Izirali Waai Ale Welema La sui a puuri.

⁴² Ba kan teeri wa pagrimu wie ba kan teeri dai dii danni ate wa tuesi ba ba namsidɔma nisima po a basi la.

⁴³ Dai dii dai ate Wen a sak wa wakperikaliisaŋa ale wa wakinkaglaŋa Zoan ale bo Ejipiti tɛŋka po la.

⁴⁴ Wa tulim ba belaŋa ate ŋa chim ziim, ate ba an baga a nyu nyiam beli naŋsaŋa po.

⁴⁵ Wa tom kabsa ate si jam namsi ba, ale baŋuuna ate ŋa jam kaasi ba tɛŋka.

⁴⁶ Wa basi ate nanchoŋta a jam dɛ ba kpanni ŋantaŋa ate tintue a kaasi ba laŋsaŋa.

⁴⁷ Wa kaasi ba yɔnaŋa ale ŋmoruk tana, ale ba kinkaŋsaŋa ale ŋmoruk viok.

⁴⁸ Wa ko ba niiŋa ale ŋmoruk tana, ate ŋmoruk a na ba piisaŋa.

⁴⁹ Wa sak wa suipuurumu nna yegayega ale ba, ale basi ate wa suipuurumu a siŋ ba zuk, ate Wen maarɔ boari a jam ba zuk ale kaasuŋ.

⁵⁰ Wa an yik wa suipuurumu, wa abe m vɔŋ ba nyuvooŋa, alege kaasi ba.

⁵¹ Wa ko bi kpaŋŋa meena Ejipiti tɛŋka po, nidoama ale liŋ biak baai la Yɛm viitaŋa po.

⁵² Alege a ta wa nuruma a nyini ase piisa la, wa ta ba kama ase piisa la a va sagni po a nyini.

⁵³ Wa jam gani ba kama, dila nyiŋ ba jam kan chali yɔgsummoa, alege nyakpiemu a lim ba dachaasaŋa.

⁵⁴ Dila nyiŋ Wen yaa ta ba jam wa tɛŋ weleŋka po, wa ta ba jo tɛŋ kaai ate guutaŋa a bo ka po la ale wadek pagrim.

⁵⁵ Wa yiak tɛŋsa ba niŋ, alege chari ba ba tɛŋsaŋa ate ba tuesi. Wa basi ate Izirali dɔkdemma a kali ba viitaŋa po.

⁵⁶ Alege ba nye Wen a nya a kan wom wa nɔi ya a ta chaab ale Wen Dii Ale Bo Wenŋmazuk La, ba an ta wa sinsaŋŋa.

⁵⁷ Ase ba koma la, ba jam ka zula ba be ka siaka, ba cheem ŋaaŋ a te ase tom buui ale kan gori magsi la.

⁵⁸ Ba basi ate wa sui a puuri ale ba bɔgtaŋa, ba basi ate wa a dɛ nyuri ale ba bɔgtaŋa.

⁵⁹ Wen ale wom ba wari la, wa sui kasim a puuri nna yegayega, ate wa zɛri Izirali.

⁶⁰ Ate wa basi Siilo viuku, viuk kuui ate wa ti nuruba suŋsuŋ la.

⁶¹ Wa basi ate ba tuesi nɔiyeŋka dakanni a ta cheŋ. Wa zulaŋa a ga jo dachiak nisa po.

⁶² Wa pai wa nuruma a te gebika, wa sui ale ŋmasi a puuri ale wa nuruma.

⁶³ Bolim a dɛ ba nuru paalukku, ate ba kalaasaŋa a ka yalika yiila.

⁶⁴ Dachaasaŋa a ko ba kaabteerɔma ale ka gebisa, ate ba pukɔŋŋa an baga a kum.

⁶⁵ Ate Nyɔnɔwa a nak ti yiti goom po ase nuru ale yiti dabugla po diila.

⁶⁶ Wa nak ate wa dachaasaŋa a ŋmani. Wa pai ba nyo ka chivie po taam wuu.

⁶⁷ Ate wa zɛri Josefi viitaŋa, wa an lueri Ɛfraim buuni.

⁶⁸ Alege wa lueri Juda buuni, Zayon guuku, ate wa a yaali la.

⁶⁹ Wa sɛ wa yenni kama ase wenŋmazuk la. Wa sɛ di kama giŋgiŋ tɛŋzuk de.

⁷⁰ Wa lueri wa yɔmawa Deevid kama, a yeeri wa piisa boka jigi.

⁷¹ Deevid ale jam boro a nya piisaŋa la, ate wa lueri wa ayen wa dɛ Jekob nuruma, wadek nuruma Izirali demma niŋ.

⁷² Ate Deevid a kasi ba ase piisa la, ale wensie wa suinum po. Wa jam dɛ ba niŋ ale ka yam.